ខេត្តស្ទឹងត្រែង ៖ នគរបាលយុត្តិធម៌នៃស្នងការដ្ឋានខេត្តស្ទឹងត្រែងឃាត់ខ្លួនស្ត្រី៣នាក់ បន្ទាប់ពីអ្នកលក់គ្រឿងអលង្ការក្នុងផ្សារស្ទឹងត្រែងចោទប្រកាន់ថា បានយកគ្រឿងអលង្ការក្លែងក្លាយមកលក់បំភាន់ភ្នែក ។
ខេត្តស្ទឹងត្រែង ៖ នគរបាលយុត្តិធម៌នៃស្នងការដ្ឋានខេត្តស្ទឹងត្រែងឃាត់ខ្លួនស្ត្រី៣នាក់ បន្ទាប់ពីអ្នកលក់គ្រឿងអលង្ការក្នុងផ្សារស្ទឹងត្រែងចោទប្រកាន់ថា បានយកគ្រឿងអលង្ការក្លែងក្លាយមកលក់បំភាន់ភ្នែក ។
ហេតុការណ៍នេះកើតឡើងកាលពីវេលាម៉ោង២និង២០នាទីរសៀលថ្ងៃទី៨ មេសា ស្ថិតនៅផ្សារស្ទឹងត្រែង ក្រុងស្ទឹងត្រែង ។ប្រភពព័ត៌មានឱ្យដឹងថា ស្ត្រីចំនួនបួននាក់ជិះម៉ូតូទៅផ្សារស្ទឹងត្រែងរួចយកកងដៃទៅលក់នៅតាមទូលក់មាស ។ ពេលអ្នកទិញដុសទឹក និងពិនិត្យមើលឃើញខុសប្រក្រតីក៏ផ្តល់ដំណឹងទៅនគរបាលឱ្យឃាត់ខ្លួននាំទៅសាកសួរតែម្តង ។
លោកហោ វុទ្ធី នាយការិយាល័យព្រហ្មទណ្ឌកម្រិតស្រាលនៃស្នងការដ្ឋានខេត្តឱ្យកោះសន្តិភាពដឹងថា ស្ត្រី៣នាក់នោះត្រូវនគរបាលព្រហ្មទណ្ឌឃាត់ខ្លួនខណៈពួកគេនិងបក្សពួកម្នាក់ទៀតយកគ្រឿងអលង្ការក្លែងក្លាយទៅលក់ឱ្យអាជីវករឈ្មោះអែល ទីរៀម ភេទស្រី អាយុ៥០ឆ្នាំ រស់នៅភូមិថ្មលាត សង្កាត់ស្រះឫស្សី ក្រុងស្ទឹងត្រែ។
លោកបន្តថាស្ត្រីទាំងនេះជាមុខសញ្ញាដែលកម្លាំងរបស់លោកតាមអង្កេតវត្តមានចេញចូលក្នុងខេត្ត ព្រោះកន្លងមកធ្លាប់ធ្វើសកម្មភាពជាច្រើនលើករួចមកហើយដូចជាការដាក់ថ្នាំសណ្តំ ធ្វើជាទម្លាក់មាសឬសំណព្រមទាំងរូបភាព
ផ្សេងៗទៀត ។
ស្ត្រីដែលត្រូវនគរបាលយុត្តិធម៌ឃាត់ខ្លួននោះ១-ឈ្មោះមុំ ភ័ណ្ឌ ភេទស្រី អាយុ២២ឆ្នាំ ស្រុកកំណើតនៅភូមិទូមាស ឃុំតាអ៊ុង ស្រុកចម្ការលើ ខេត្តកំពង់ចាម ។ ២-ឈ្មោះគ្រន ភី អាយុ៣០ឆ្នាំ រស់នៅភូមិទួលប្រាក់ ឃុំតាអ៊ុង ស្រុកចម្ការលើ ខេត្តកំពង់ចាម និងទី៣-ឈ្មោះយឿន សុភី ភេទស្រី អាយុ២៤ឆ្នាំ រស់នៅក្នុងភូមិថ្មីលើ ឃុំបារាយណ៍ ស្រុកចម្ការលើ ខេត្តកំពង់ចាម និងបក្សពួកម្នាក់ទៀតរត់គេចខ្លួនបាត់ ខណៈមានការឆោឡោ ។ស្ត្រីទាំង៣នាក់ត្រូវនគរបាលយុត្តិធម៌នៃស្នងការដ្ឋានខេត្តស្ទឹងត្រែងកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់ ។ ចំណែកបក្សពួកម្នាក់ទៀតសមត្ថកិច្ចកំពុងតាមរកចាប់ខ្លួន ៕
ចែករំលែកព័តមាននេះ