លោកគ្រូមាស សុខ បានធ្វើដំណើរទៅសហរដ្ឋអាមេរិកតាមការអញ្ជើញរបស់សហព័ន្ធគុនខ្មែរនៅរដ្ឋម៉ាសាឈូសេត ទីក្រុងឡូវែល ដែលមានលោកកាន់ វណ្ណៈ ជាប្រធានសហព័ន្ធ ។ លោកគ្រូបានបំពេញការងារបង្ហាត់សិស្សអស់រយៈពេលបីខែគឺចាប់ពីថ្ងៃទី២២ កញ្ញា ២០១១ រហូតដល់ថ្ងៃទី១៦ មករា ២០១២ ។ កោះសន្តិភាពបានធ្វើសម្ភាសន៍ជាមួយលោកគ្រូពីបញ្ហាមួយចំនួនដូចខាងក្រោម ៖
សំណួរ ៖ តើលោកគ្រូអញ្ជើញទៅនេះបង្ហាត់ក្បាច់គុនរបៀបណាខ្លះ ?
ចម្លើយ ៖ តាមការឯកភាពគ្នាជាមួយលោកកាន់ វណ្ណៈ ប្រធានសហព័ន្ធគុនខ្មែរឱ្យខ្ញុំបង្ហាត់របៀបក្បាច់បុរាណខ្មែរជំហរខ្ពស់ ។ ក្នុងទម្រង់នៃក្បាច់គុនបុរាណខ្មែរនេះ ខ្ញុំបានរៀបចំជាបីទម្រង់ ទី១-ក្បាច់គុនដៃជំហរខ្ពស់ ទី២-ក្បាច់គុនដៃជំហរទាប ទី៣-ក្បាច់គុនបុរាណដែលប្រើអាវុធ មានដំបងខ្លី-វែង គុនដាវ គុនសំកោង គុនល្បុក្កតោ ។ល។
សំណួរ ៖ តើលោកគ្រូបង្ហាត់ទម្រង់ណាដែរ ក្នុងចំណោមបីទម្រង់នេះឬបង្ហាត់ទាំងអស់ ?
ចម្លើយ ៖ បាទ ខ្ញុំបង្ហាត់តែក្បាច់គុនបុរាណជំហរខ្ពស់ដែលឱ្យឈ្មោះថា «គុនខ្មែរ» ។ ដើម្បីអាចប្រកួតជាមួយគុនថៃ គុនអាគាំង និងប្រដាល់សេរី ។
សំណួ ៖ ក្នុងឯកសាររបស់លោកគ្រូបង្ហាត់ក្បាច់ជំហរខ្ពស់នេះ មានប៉ុន្មានមេប៉ុន្មានក្បាច់ដែរ ?
ចម្លើយ ៖ ក្នុងទម្រង់នេះខ្ញុំរៀបចំឯកសារមានបីកម្រិត ដែលមានប្រើក្រមា ជាលក្ខណៈសម្គាល់មានកម្រិត ១-ក្រមាពណ៌ត្នោត ២-ក្រមាពណ៌ត្រួយចេក និង៣-ក្រមាពណ៌ក្រហមថ្នាក់ទាំងបីនេះ ហៅថា ថ្នាក់ត្រី ថ្នាក់ទោ និងថ្នាក់ឯក ។
សំណួរ ៖ ចុះការចាប់ផ្តើមពីដំបូងនឹងបន្តបន្ទាប់តើលោកគ្រូបង្ហាត់របៀបណា ?
ចម្លើយ ៖ ក្នុងទម្រង់គុនខ្មែរនេះ ដំបូងខ្ញុំបង្ហាត់ជំហរ បន្ទាប់មកជំហាន ទី៣បង្ហាត់ដំណើរ ។ កាលណាចេះជំហរជំហាននិងដំណើរហើយទើបបង្ហាត់មេមានមេស្រប មេខ្វែង មេផាត់ មេគ្រប មេសើយ ។ល។ ក្នុងកម្រិត១នេះខ្ញុំឱ្យសិស្សចេះ២០មេ ទើបបញ្ចុះក្បាច់។ ក្នុងមួយមេចំនួន៥ក្បាច សរុបនៅថ្នាក់ត្រីនេះសិស្សចេះបានលោតដល់ទ្វារបួន ចេះមេបានម្ភៃនិងចេះក្បាច់ចំនួន១០០ក្បាច់ ។
សំណួរ ៖ ពេលដែលលោកគ្រូបង្ហាត់សិស្សបានចេះ១០០ក្បាច់ហើយ តើលោកគ្រូមានធ្វើពិធីអ្វីទេ តាមរបៀបចាស់បុរាណ ?
ចម្លើយ ៖ បាទនៅពេលសិស្សហាត់ចប់មួួយត្រណម តាមឯកសារគ្រូត្រូវហាត់សមជាមួយសិស្សតាមមេនិងក្បាច់ដែលបានបង្ហាត់ លុះគ្រូសមជាមួួយសិស្សរួចហើយគ្រូអង្គុយមើលឱ្យសិស្សហាត់សមជាមួយសិស្សឃើញថា ចេះស្ទាត់ហើយទើបលោកគ្រូបំពាក់ក្រមាជូនទុកជាពិធីប្រសិទ្ធី មួយត្រណម ។
សំណួរ ៖ តើលោកគ្រូបង្ហាត់នេះបានប៉ុន្មានត្រណមដែរ ហើយសិស្សមានជនជាតិអ្វីខ្លះ ?
ចម្លើយ ៖ បេសកកម្មបីខែនេះ ខ្ញុំបង្ហាត់បានចប់មួយត្រណម «ថ្នាក់ត្រី» ហើយសិស្សមានកូនខ្មែរកូនអាមេរិកាំង កូនឡាវ និងកូនប្រេស៊ីល។
សំណួរ ៖ តើគម្រោងរបស់សហព័ន្ធនៅអាមេរិកមានផែនការបន្តដូចម្តេចដែរ ។
ចម្លើយ ៖ លោកកាន់ វណ្ណៈ បានចាត់តាំងឱ្យខ្ញុំមកស្រុកខ្មែរជ្រើសរើសរកកីឡាករណាល្អៗ ដើម្បីកែទម្រង់ពីប្រដាល់សេរីមករបៀបគុនខ្មែរ យកទៅប្រកួតនៅសហរដ្ឋអាមេរិកនិងដឹកនាំកីឡាករគុនខ្មែរពីអាមេរិកមកប្រកួតនៅស្រុកខ្មែរ ។
ពេលដែលខ្ញុំទៅនេះបានជូបជាមួយលោកគ្រូជា សារុន ដែលខ្ញុំទៅទីក្រុងឡូវែលនេះហើយក៏បានបង្ហាត់ផ្លាស់ប្តូរក្បាច់ដំបងវែងបានចេះល្អគួររសមដែរដើម្បីទុកឱ្យគាត់បង្ហាត់ក្មេងៗបន្ត ៕
ចែករំលែកព័តមាននេះ