រាជធានីភ្នំពេញ ៖ ពុទ្ធ ឆាយរិទ្ធី មកពីក្លឹបពុទ្ធសេរីវង្សកីឡា បានប្រើស្នៀតកណ្តាប់ដៃវាយផ្តួល Leonard Nganga កីឡាករកេនយ៉ា ឱ្យសន្លប់នៅទឹកទី២ ក្នុងការប្រកួតនៅលើសង្វៀនស្ថានីយទូរទស្សន៍ប៉ុស្តិ៍លេខ៣កាលពីថ្ងៃសៅរ៍ទី២១ មករា កន្លងមកនេះ ។ Leonard ក៏ជាកំពូលអ្នកលេងស្នៀតកណ្តាប់ដៃយ៉ាងល្អម្នាក់ដែរ ប៉ុន្តែសម្រាប់ការមកប៉ះឆាយរិទ្ធីនាពេលនេះទៅអត់រួចឡើយ។ Leonard បានវាយសម្រុកចូលមុខឆាយរិទ្ធីពេញៗនៅទឹកទី១ និងទី២ ប៉ុន្តែត្រូវឆាយរិទ្ធីគេចផុតរហូត ។
នៅចុងទឹកទី២ ឆាយរិទ្ធីបានសម្រុកចូលកៀកបញ្ជូនស្នៀតដៃវាយចូលគុម្ពថ្គាម Leonard យ៉ាងពេញទំហឹងបណ្តាលឱ្យដួលនៅលើរេញ អាជ្ញាកណ្តាលរាប់ដល់១០ ហើយនៅតែមិនអាចក្រោកកើតទៀត។ សេន ប៊ុនថេន អ្នកលេងស្នៀតជើងមកពីក្លឹបក្រសួងមហាផ្ទៃយកឈ្នះគង់សំប៊ុត នុនតាកន កីឡាករថៃ នៅមុនស្នូរជួងបញ្ចប់ទឹកទី៥ ។ នុនតាកន មើលទៅហាក់បីដូចជាចាញ់ប្រៀបប៊ុនថេន តាំងពីទឹកទី១ ម៉្លេះ ប៉ុន្តែគេបានព្យាយាមវាយបកសងមកលើប៊ុនថេនវិញ មិនបង្អង់ឡើយ ។
ស្នៀតប្រយុទ្ធរបស់នុនតាកនល្អគ្រាន់បើ តែកម្លាំងរបស់គេអន់បន្តិច ។ ប៊ុនថេនចាប់ផ្តើមទាត់សម្រុកកាន់តែខ្លាំងនៅទឹកទី៣ និងទី៤ ។ ចំណែកនុនតាកន បានបាត់បង់កម្លាំងជាបណ្តើរៗនៅទឹកទី៤ និងទី៥ ជាពិសេសនៅទឹកទី៥ តែម្តងនុនតាកនត្រូវប៊ុនថេនបង្ខំឱ្យលើកទង់ជ័យសទាល់តែបាន ។ សាំង ស៊ីថា មកពីក្លឹបកីឡាប្រដាល់ក្រសួងការពារជាតិ យកឈ្នះខុន ឆៃលាង មកពីក្លឹបកងពលធំអន្តរាគមន៍លេខ៣ព្រះវិហារដោយពិន្ទុ ។ ឆាំ រ៉ែម មកពីក្លឹបសិង្ហកីឡា បានយកឈ្នះហ៊ុល ដារ៉ា មកពីក្លឹបសាលវ័ន្តកីឡា ដោយពិន្ទុ ។ ចេង ពន្លក មកពីក្លឹបសម្រែករាជសីហ៍បង្ក្រាបគ្រឿងញៀន យកឈ្នះធិន សុវណ្ណ មកពីក្លឹបកងពលតូចលេខ៧០ដោយពិន្ទុ ៕
ចែករំលែកព័តមាននេះ