គណៈកម្មការអូឡាំពិកកម្ពុជារៀបចំការប្រកួតរត់ពាក់កណ្តាលម៉ារ៉ាតុន
ដោយ ៖ ធីតាកោះ
ថ្ងៃអាទិត្យ ទី២២ ខែមករា ឆ្នាំ២០១២ ម៉ោង ១៧:១០
កោះសន្តិភាព
សិក្ខាកាមដែលបានចូលរួម
រាជធានីភ្នំពេញ ៖ បន្ទាប់ពីទទួលបានជោគជ័យនៅក្នុងការរៀបចំការប្រកួតរត់ពាក់កណ្តាលម៉ារ៉ាតុន នៅក្រុងអង្គរ ខេត្តសៀមរាប អស់រយៈពេលជាច្រើនឆ្នាំរួចមកនោះ គណៈកម្មការរៀបចំព្រឹត្តិការណ៍អន្តរជាតិមួយនេះ បានខិតខំពង្រីកសកម្មភាពរបស់ខ្លួនបន្ថែមទៀត គឺការរត់ពាក់កណ្តាលម៉ារ៉ាតុនអន្តរជាតិលើកទី១ នៅខេត្តព្រះសីហនុជាបន្តទៀតនៅថ្ងៃទី១១ ខែមីនា ឆ្នាំ២០១២ ។
លោកវ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា បានឱ្យដឹងថា កម្មវិធីនេះធ្វើឡើងដើម្បីអបអរសាទរចំពោះការទទួលស្គាល់របស់អន្តរជាតិអំពីឆ្នេរសមុទ្រនៃព្រះរាជាណាចក្រកម្ពុជារបស់យើងដែលបានស្ថិតនៅក្នុងចំណោមឆ្នេរដ៏ស្អាតបំផុតលើពិភពលោក នាខែឧសភា ឆ្នាំ២០១១កន្លងមក ។ លោកបានគូសបញ្ជាក់ថា ទិវារត់ម៉ារ៉ាតុនអង្គរបានផ្តោតយ៉ាងសំខាន់នៅលើការជួយឧបត្ថម្ភជនរងគ្រោះដោយសារគ្រាប់មីន ។
ដោយឡែក ទិវារត់ម៉ារ៉ាតុនខេត្តព្រះសីហនុនាពេលនេះ បាននាំមកនូវបាវចនាកីឡាម៉ារ៉ាតុន គឺការពារធម្មជាតិសង្គ្រោះដែនដី និងសុខុមាលភាពរបស់មនុស្សលោក ។ បច្ចុប្បន្នមនុស្សលោកកំពុងតែស្ថិតនៅក្នុងការគំរាមកំហែងដោយសារគ្រោះធម្មជាតិរញ្ជួយដី រលកយក្សស៊ូណាមី ភាពរាំងស្ងួត និងទឹកជំនន់ ដែលបានបំផ្លាញជីវិតមនុស្សរាប់លាននាក់ ។
ការរត់ប្រណាំងពាក់កណ្តាលម៉ារ៉ាតុនអន្តរជាតិ នៅខេត្តព្រះសីហនុ នឹងរួមចំណែកយ៉ាងសកម្មក្នុងការតស៊ូការពារធម្មជាតិ ដោយបានអំពាវនាវឱ្យកីឡាករ និងអ្នកចូលរួមគាំទ្រទាំងក្នុងនិងក្រៅប្រទេសមកជួបជុំគ្នា ដើម្បីសម្តែងចេញនូវសុុច្ឆន្ទៈការពារធម្មជាតិ និងសុខុមាលភាពនៃមនុស្សលោកក្នុងសតវត្សទី២១នេះ ។ ទិវាមួយនេះក៏ជាចំណែកមួយក្នុងការជួយឧបត្ថម្ភជាលក្ខណៈមនុស្សធម៌ដល់ជនរងគ្រោះដោយធម្មជាតិ ជួយដល់ការអប់រំជាមូលដ្ឋាន និងផ្តល់នូវចំណេះដឹងសម្រាប់ក្មេងៗ មនុស្សពេញវ័យ អំពីផលប្រយោជន៍និងភាពចាំបាច់នៃការការពារបរិស្ថានធម្មជាតិដែលបានទ្រទ្រង់ដល់ជីវិតមនុស្សយើង ៕
