រាជធានីភ្នំពេញ ៖ ព្រឹត្តិការណ៍ប្រកួតកីឡាថ្នាក់តំបន់អាស៊ីអាគ្នេយ៍ ឬស៊ីហ្គេម(SEA Games)ដែលបានប្រព្រឹត្តឡើងនៅប្រទេសឥណ្ឌូណេស៊ីលើកទី២៦ កាលពីថ្ងៃទី១១ ដល់ថ្ងៃទី២២វិច្ឆិកា ឆ្នាំ២០១១ បានទាក់ទាញនូវការចាប់អារម្មណ៍យ៉ាងខ្លាំងពីសំណាក់មហាជនទូទៅ និងពីវិស័យឯកជននានា ពិសេសពីក្រុមហ៊ុនទូរស័ព្ទចល័តSmart Mobile ។ ការចេញដំណើរទៅប្រកួតនៅលើកនេះពីសំណាក់អត្តពលិកកម្ពុជាប្រមាណ២១ប្រភេទកីឡា ជាលទ្ធផលកម្ពុជាទទួលបានមេដាយមាស៤ (៨គ្រឿង) ប្រាក់១១(១៧គ្រឿង) និងសំរឹទ្ធិ២៣(២៥គ្រឿង)។
ដោយមើលឃើញពីសមិទ្ធផលដែលកីឡាករកម្ពុជាទទួលពីព្រឹត្តិការណ៍កីឡាកម្រិតតំបន់នេះ ក្រុមហ៊ុនទូរស័ព្ទចល័ត Smart Mobile ដែលជាក្រុមហ៊ុនទូរស័ព្ទដៃដ៏ធំ និងមានប្រជាប្រិយភាពបំផុតពីសំណាក់អ្នកប្រើប្រាស់ជាទូទៅនៅកម្ពុជានោះ បានសម្រេចផ្តល់នូវរង្វាន់ជាស៊ីមកាត និងមានទឹកប្រាក់នៅក្នុងស៊ីមកាតជាមួយផង តាមការសន្យាមុនពេលពួកគេចេញទៅប្រកួតស៊ីហ្គេមថា នឹងឧបត្ថម្ភដល់កីឡាករដែលទទួលបានមេដាយមាស នូវស៊ីមកាតលេខពិសេសចំនួន១ មានទឹកប្រាក់៥០ដុលា្លរក្នុងមួយខែ រយៈពេល១ឆ្នាំ, មេដាយប្រាក់ ស៊ីមកាតលេខពិសេស១ មានទឹកប្រាក់២០ដុល្លារក្នុងមួយខែ រយៈពេល១ឆ្នាំ និងមេដាយសំរឹទ្ធិ ស៊ីមកាតលេខពិសេស១ មានទឹកប្រាក់១០ដុល្លារក្នុងមួយខែ រយៈពេល១ឆ្នាំ។
គណៈកម្មាធិការជាតិអូឡាំពិកកម្ពុជា មានសេចក្តីសោមនស្សរីករាយអញ្ជើញបណ្តាញផ្សព្វផ្សាយព័ត៌មានទាំងអស់ ចូលរួមយកព័ត៌មានពីព្រឹត្តិការណ៍នេះតាមការគួរផងដែរ។ ពិធីនេះបានធ្វើឡើងនៅវេលាម៉ោង៩និង៣០នាទីព្រឹក ថ្ងៃទី១៩ មករា ឆ្នាំ២០១១ នៅទីស្នាក់ការគណៈកម្មាធិការជាតិអូឡាំពិកកម្ពុជា ផ្ទះលេខ១ ផ្លូវលេខ២៧៦ សង្កាត់បឹងកេងកង២ ខណ្ឌចំការមន៕
ចែករំលែកព័តមាននេះ