រាជធានីភ្នំពេញ ៖ ហួន សុខនីម មកពីក្លឹបសិង្ហកីឡា ណាត់ជួបយឹម ឌៀប មកពីក្លឹបកីឡាប្រដាល់ក្រសួងការពារជាតិនៅលើសង្វៀនស្ថានីយទូរទស្សន៍ CTN ថ្ងៃសៅរ៍ ទី២១ មករា ខណៈទេស សំខាន់មកពីក្លឹបកងពលតូចលេខ៧០ ជួបទី ពន្លែត មកពីក្លឹបសឹករងខេត្តសៀមរាប ។ សុខនីម និងយឹម ឌៀប សុទ្ធតែកំពូលអ្នកប្រដាល់ដែលមានល្បិចប្រយុទ្ធនៅលើសង្វៀនខ្ពស់ដូចគ្នា ។ ប៉ុន្តែសុខនីម ចិត្តរបស់គេមិនសូវសឿងទេ ហើយចលនាវាយលុកទៅលើគូប្រកួតក៏មានការយឺតយ៉ាវណាស់ដែរ ។ សុខនីម ស្នៀតជើង និងកណ្តាប់ដៃរបស់គេវាយចេញបានត្រង់ល្អ ហើយមានទម្ងន់ធ្ងន់ទៀតផង ។
របៀបវាយលុក គឺចូលចិត្តវាយជាប្រយោលច្រើនជាង ព្រោះគេមិនសូវពូកែស្នៀតជើង ។ រីឯយឹម ឌៀប ល្អខាងវាយចូលកៀក ដោយប្រើស្នៀតដៃ ជាពិសេសកណ្តាប់ដៃឆ្វេងតែម្តង ។ ឯស្នៀត ជើងរបស់គេក៏ល្អណាស់ដែរ ប៉ុន្តែទាស់ត្រង់ថា កីឡាករម្នាក់នេះ វាយលុកមិនអស់ពីសមត្ថភាព ។ រវាងទេស សំខាន់ និងទី ពន្លែត ជាអ្នកប្រដាល់ចាស់វស្សាដូចគ្នា តែកម្លាំងរបស់គេនៅរឹងមាំគ្រាន់បើ ។ សំខាន់មានចលនាវាយលុករហ័សរហួន ស្នៀតកែង និងជង្គង់អាចប្រើការបានល្អ ។ ប៉ុន្តែទម្លាប់របស់សំខាន់មិនសូវចូលចិត្តវាយសម្រុកនៅទឹកដំបូងឡើយ ។ គឺគេសន្សំកម្លាំងសម្រាប់វាយលុកចុងទឹក ។ ទី ពន្លែត វិញពូកែស្នៀតជើង និងដៃ ឯស្នៀតកែង និងជង្គង់មិនសូវចំណាប់ទេ ។
ចំណែកចលនាវាយលុករបស់ពន្លែត មានការយឺតយ៉ាវបន្តិចតែបើគេវាយប្រយោលល្អជាងចូលកៀក ។ ទោះជាយ៉ាងណារវាងគូនេះ មិនអាចមើលស្រាលលើនរណាបានឡើយ ព្រោះថាបើពិនិត្យទៅលើបច្ចេកទេសប្រយុទ្ធនៅលើសង្វៀនរវាងគេទាំង២ គឺល្អម្យ៉ាងម្នាក់ ។ ផល សុភាព មកពីក្លឹបឃ្លាំងមឿងពោធិ៍សាត់ជួបប្រកួត ជាមួយកែវ វីរៈ មកពីក្លឹប គជសារកីឡា ។ ឈាន រស្មី មកពីក្លឹបរតនៈគិរី ជួបព្រុំ វី មកពីក្លឹបខេត្តកំពង់ធំ ៕
ចែករំលែកព័តមាននេះ