រាជធានីភ្នំពេញ ៖ ការប្រកួតប្រដាល់ក្បាច់បុរាណខ្មែរ ដណ្តើមខ្សែក្រវាត់ស្ថានីយទូរទស្សន៍ប៉ុស្តិ៍លេខ៥ ប្រភេទសទម្ងន់៥៧គីឡូក្រាម វគ្គជម្រុះវិលជុំតាមពូលនឹងបញ្ចប់នៅថ្ងៃ
អាទិត្យ ទី២២ មករា ខាងមុខ ។ នៅពូល A ផាន់ សារុន មកពីក្លឹបគជសារកីឡាជួបជាមួយសួង សុវណ្ណថា មកពីក្លឹបក្រសួងការពារជាតិ ។ ចំណែកពូល B ចន្ថា សារឹម មកពីក្លឹបយុវកីឡាខេត្តកណ្តាល ជួបរឿង សោភ័ណ្ឌ មកពីក្លឹបខេមរកីឡា ។ សារុន ទំនងជាអស់ផ្លូវអ៊ុតហើយ ព្រោះថា ២ប្រកួតកន្លងមកនេះអត់ទាន់ស្គាល់ឈ្នះម្តងណាឡើយ ។
រីឯសួង សុណ្ណថា ប្រកួតបាន២លើក ដូចគ្នា ឈ្នះ១ចាញ់១ មាន៤ពិន្ទុ ។ ចំពោះសារុន បើប្រកួតលើកនេះ ចាញ់ គឺអស់ផ្លូវហើយ តែបើឈ្នះប្រហែលមានផ្លូវអ៊ុតខ្លះ ។ ចំណែកសុវណ្ណថា ក៏ដូចគ្នាដែរ បើសិនជាចាញ់ទំនងជាមិនអាចគេចផុតពីផ្លូវហាលខោឡើយ ។ ប៉ុន្តែរវាងគូនេះភាគច្រើនគេមានទំនុកចិត្តលើសុវណ្ណថា ច្រើនជាងព្រោះសុវណ្ណថា ល្អទាំងកម្លាំង និងល្បិចប្រយុទ្ធ ។ នៅពូល A មានសារឿន ចាន់ មកពីក្លឹបសម្រែករាជសីហ៍បង្ក្រាបគ្រឿងញឿនម្នាក់រួចហើយ ដែលទទួលបានកន្លែងមុនគេសម្រាប់ឡើងទៅ
ប្រកួតនៅវគ្គ១/២ផ្តាច់ព្រ័ត្របន្តទៀត ។
ចំណែកពូល B វិញ ចន្ថា សារឹម និងរឿង សោភ័ណ្ឌ សុទ្ធតែមានបំណងយកឈ្នះដូចគ្នា ព្រោះថា ការប្រកួតលើកនេះមានតែអ្នកឈ្នះទេ ទើបអាចមានឱកាសឡើងទៅប្រកួតនៅវគ្គ១/២ បន្តទៀតបាន ។ ចន្ថា សារឹម ប្រកួតបាន២លើក ឈ្នះ១ ចាញ់១ មាន៤ពិន្ទុ រីឯរឿង សោភ័ណ្ឌ វិញប្រកួតបាន២លើក ឈ្នះទាំង២លើកជាប់គ្នា ។ ប៉ុន្តែទោះជាយ៉ាងណារវាងគេទាំង២នាក់ សុទ្ធតែត្រូវការឈ្នះដូចគ្នា ហើយអ្នកចាញ់គឺមិនអាចឡើងទៅប្រកួតនៅវគ្គ ១/២ បន្តទៀតបានឡើយ ។
រវាងគូនេះគេមានទំនុកចិត្តលើរឿង សោភ័ណ្ឌ ច្រើនជាងព្រោះថា ល្បិចប្រយុទ្ធ និងកម្លាំងរបស់សោភ័ណ្ឌល្អជាងអាចវាយចេញបានរហ័សជាងទៀត ប៉ុន្តែទោះជាយ៉ាងណា កុំអាលទាយទុកមុន គឺរង់ចាំអ៊ុតការប្រកួតសិន។ ចំពោះគូប្រកួតមិត្តភាពទូច រាជសីហ៍ មកពីក្លឹបរស្មីកុមារកំព្រា ជួបសាកកម្លាំជាមួយខុន រាជមកពីក្លឹបកងពលធំអន្តរាគមន៍ លេខ៣ ព្រះវិហារ ។ រវាងគូនេះមិនធ្លាប់ប៉ះគ្នាពីមុនមកឡើយ ប៉ុន្តែរាជសីហ៍ មិនអាចទៅរួចជាមួយខុន រាជ ឡើយ ព្រោះរាជសីហ៍អត់មានក្បាច់អីដែលពូកែជាងការប្រើកម្លាំងបាយនោះទេ ។ ខុន រាជ ពូកែទាំងស្នៀតកែង និងជង្គង់បើទោះជាកម្លាំងរបស់គេមិនដល់រាជសីហ៍ក៏ដោយ ។ គូនេះ អ្នកធ្លាប់តាមដានគេសង្ឃឹមទៅលើខុន រាជ ច្រើនជាង ៕
ចែករំលែកព័តមាននេះ