រាជធានីភ្នំពេញ ៖ សេន ប៊ុនថេន មកពីក្លឹបក្រសួងមហាផ្ទៃ ត្រៀមជួបប្រកួតសាកកម្លាំងជាមួយអ្នកប្រដាល់ជើងខ្លាំងមកពីប្រទេសថៃ Nontakom នៅលើសង្វៀនស្ថានីយទូរទស្សន៍ប៉ុស្តិ៍លេខ៣ ថ្ងៃសៅរ៍ទី២១ មករា ខណៈពុទ្ធ ឆាយឫទ្ធី មកពីក្លឹបពុទ្ធសេរីវង្សព្រែកតាទែន ជួបកីឡាករ Leonard Nganga ជនជាតិកេនយ៉ា ។ សេន ប៊ុនថេន ពូកែស្នៀតជើង ដែលសប្តាហ៍មុនគេបានប្រើស្នៀតជើងទាត់បំបាក់ដៃកីឡាករថៃម្នាក់ នៅលើសង្វៀនស្តាតចាស់ ។
ចំណែកលើកនេះ គេត្រូវមកប៉ះជើងខ្លាំងមកពីថៃម្តងទៀត ប៉ុន្តែគេនៅមិនទាន់អាចដឹងថាយ៉ាងណានោះទេ ព្រោះកីឡាករថៃរូបនេះអត់មានអ្នកណាស្គាល់ប្រវត្តិច្បាស់ឡើយ ។ រវាងគូនេះប្រកួតគ្នាក្នុងទម្ងន់៧៣គីឡូក្រាម ។ ប៉ុន្តែបើតាមការអះអាងរបស់អ្នករៀបចំកម្មវិធីប្រកួតប៉ុស្តិ៍លេខ៣ថា កីឡាករថៃម្នាក់នេះគឺពិតជា មិនធម្មតាឡើយ ។ ដូច្នេះបើសិនជាខ្លាំងដូចគេថាមែនប៊ុន ថេនបែបយ៉ាប់់ហើយ ។
ពុទ្ធ ឆាយរិទ្ធី ទើបតែលើកនេះទេដែលគេមានឱកាសបានប្រកួតជាមួយកីឡាករបរទេស។ ចំណែកឯ Leonardវិញ ធ្លាប់មកស្រុកខ្មែរជាច្រើនលើករួចមកហើយ ប៉ុន្តែល្បិចប្រយុទ្ធនៅលើសង្វៀនរបស់គេមិនសូវជាខ្លាំងប៉ុន្មានឡើយ គឺធ្លាប់ត្រូវបានបំបាក់ដោយជើងខ្លាំងកម្ពុជាជាច្រើនលើករួចមកហើយ ។ ឯឆាយ រិទ្ធី ក៏មិនមែនជាជើងខ្លាំងណាស់ដែរគេពូកែតែស្នៀតជើងបន្តិចប៉ុណ្ណោះ ។ រីឯ Leonard ពូកែស្នៀតកណ្តាប់ដៃ ។ រវាងគូនេះទាំងកម្លាំងនិងល្បិចប្រយុទ្ធ មិនលើសខ្វះគ្នាឡើយ អាចស៊ីសងគ្នាបាន ។
នៅមានគូប្រកួតកម្ពុជានិងកម្ពុជាចំនួន៣គូទៀត មានសាំង ស៊ីថា មកពីក្លឹបក្រសួងការពារជាតិជួប ខុន ឆៃលាង មកពីក្លឹបកងពលធំលេខ៣ ។ ហ៊ុល ដារ៉ា មកពីក្លឹបសាលវ័ន្តកីឡា ជួបឆាំ រ៉ែម មកពីក្លឹបសិង្ហកីឡា ។ ចេង ពន្លក មកពីក្លឹបសម្រែករាជសីហ៍បង្ក្រាបគ្រឿងញៀន ជួបធិន សុវណ្ណ មកពីក្លឹបកងពលតូចលេខ៧០ ៕
ចែករំលែកព័តមាននេះ