រាជធានីភ្នំពេញ ៖ សហព័ន្ធកីឡាបាល់ទាត់អន្តរជាតិ(FIFA) និងសហព័ន្ធកីឡាបាល់ទាត់កម្ពុជា កាលពីរសៀលថ្ងៃអង្គារទី១៧ មករា នៅសណ្ឋាគារសាន់វេ បានធ្វើពិធីចុះហត្ថលេខារួមគ្នាមួយស្តីអំពីការផ្តល់ជំនួយជាទឹកប្រាក់ចំនួន៥០ម៉ឺនដុល្លារសហរដ្ឋអាមេរិកដល់សហព័ន្ធកីឡាបាល់ទាត់កម្ពុជា ក្នុងការអភិវឌ្ឍមជ្ឈមណ្ឌលកីឡាបាល់ទាត់ជាតិ នៅទន្លេបាទី ដែលជាគម្រោងទី៤ ជាបន្តទៀត ។
ពិធីចុះហត្ថលេខានេះ ភាគីខាង FIFA មានលោកDomeka Garamandi មន្ត្រីអភិវឌ្ឍន៍កីឡាបាល់ទាត់ FIFA ប្រចាំនៅគួឡាឡាំពួរ និងភាគីខាងកម្ពុជាមានលោកគល់ សុផាន់ណា អគ្គលេខាធិការនៃសហព័ន្ធកីឡាបាល់ទាត់កម្ពុជា ក្នុងនោះក៏មានការចុះហត្ថលេខាជាមួយអ្នកទទួលខុសត្រូវលើផ្នែកសាងសង់ និងអ្នកប្រឹក្សាយោបល់ផងដែរ ។ លោកគល់ សុផាន់ណា បានគូសបញ្ជាក់ថា នេះគឺជាលើកទី៤ ហើយដែល FIFA បានសម្រេចផ្តល់ជំនួយមកសហព័ន្ធកីឡាបាល់ទាត់កម្ពុជា ក្នុងការអភិវឌ្ឍមជ្ឈមណ្ឌលកីឡាបាល់ទាត់ជាតិ ។
លើកទី៤ FIFA បានផ្តល់ជំនួយសម្រាប់សាងសង់មជ្ឈមណ្ឌលបាល់ទាត់នៅភូមិចែងមែង សង្កាត់កាកាប ខណ្ឌដង្កោ ។ កន្លងមកមជ្ឈមណ្ឌលបាល់ទាត់មួយនេះ មានសារសំខាន់ខ្លាំងណាស់សម្រាប់សហព័ន្ធកីឡាបាល់ទាត់កម្ពុជា ប៉ុន្តែមួយរយៈមកនេះ ដោយសារនៅតំបន់នោះមានការអភិវឌ្ឍលំនៅឋានច្រើនបណ្តាលឱ្យជួបការលំបាក ដូចជាស្ទះលូបង្ហូរទឹកធ្វើឱ្យទីលាននិងកន្លែងផ្សេងៗទៀតត្រូវទឹកលិចទើបសហព័ន្ធសម្រេចដោះដូរទីតាំងថ្មីវិញ យកទៅសាងសង់នៅទន្លេបាទី លើផ្ទៃដីប្រមាណ១៥ហិកតា។
លោកបានបញ្ជាក់ថា មជ្ឈមណ្ឌលកីឡាបាល់ទាត់ថ្មីនេះ គឺធ្វើឡើងចាប់តាំងពីគម្រោងទី២និងទី៣មកម៉្លេះ ដោយមានទីលានបាល់ទាត់ចំនួន៤ កន្លែង មានកន្លែងស្នាក់នៅសម្រាប់កីឡាករ កន្លែងផ្លាស់ប្តូរសម្លៀកបំពាក់ អគារហូបបាយ អគារសិក្សា និងបណ្តុះបណ្តាលកីឡាករទៀតផង។ បច្ចុប្បន្ន មជ្ឈមណ្ឌលកីឡាបាល់ទាត់ជាតិថ្មីនេះ សាងសង់ជិតបញ្ចប់ហើយ ហើយដោយមើលឃើញថា មជ្ឈមណ្ឌលបាល់ទាត់ជាតិថ្មីមួយនេះ នៅពុំទាន់បានបំពាក់សម្ភារគ្រប់គ្រាន់ FIFA បានសម្រេចផ្តល់ជំនួយបន្ថែមសម្រាប់រៀបចំឱ្យមានប្រព័ន្ធទឹកស្អាត អគ្គិសនី និងសម្ភារចាំបាច់ផ្សេងៗទៀត ។
នៅពេលមានសំណួរសួរថា តើខាងFIFA យល់ឃើញបែបណាដែរសម្រាប់សហព័ន្ធកីឡាបាល់ទាត់កម្ពុជា ជាពិសេសនៅពេលដែលFIFA បានសម្រេចចិត្តផ្តល់ជំនួយរហូតមកនេះ? លោក Domeka Garamandi បានមានប្រសាសន៍ថាខាង FIFA មានការចាប់អារម្មណ៍ និងកោតសរសើរយ៉ាងខ្លាំងដល់សហព័ន្ធកីឡាបាល់ទាត់កម្ពុជា ដែលបានខិតខំប្រឹងប្រែងអភិវឌ្ឍវិស័យបាល់ទាត់ ។ លោកបានបន្ថែមទៀតថា កម្ពុជា ក៏ដូចជាប្រទេសដទៃទៀតដែរ គឺសុទ្ធសឹងជាសមាជិករបស់ FIFA ដូចគ្នា ដូច្នេះ FIFA ត្រូវតែយកចិត្តទុកដាក់ ។ ឯទំហំទឹកប្រាក់ដែលFIFA បានផ្តល់មកនេះ មិនថាប្រទេសអ្នកមានឬអ្នកក្រនោះទេ គឺទទួលបានស្មើៗគ្នា ៕
ចែករំលែកព័តមាននេះ