ខេត្តបាត់ដំបង ៖ ការប្រកួតកីឡាវាយសីដណ្តើមពានរង្វាន់៧មករា លើកទី១២ ឆ្នាំ២០១២ ដែលបានធ្វើឡើងនៅក្លឹបវាយសីបៃតងកម្ពុជាខេត្តបាត់ដំបងរយៈពេល២ថ្ងៃចាប់ ពីថ្ងៃទី១២ មករា រហូតមកនោះបានបញ្ចប់ទាំងស្រុងនៅព្រឹកថ្ងៃអាទិត្យទី១៥ មករា ។ ពិធីបិទវគ្គការប្រកួតនេះក្រោមអធិបតីភាពលោកឧត្តមសេនីយ៍ឯកលី កុសល ប្រធានសហព័ន្ធកីឡាវាយសីកម្ពុជានិងមានការចូលរួមពីមន្ត្រីថ្នាក់ខេត្តជាច្រើនរូបទៀត ។
លោកអាំង សំបូរ ប្រធានគណៈកម្មការបច្ចេកទេសរបស់សហព័ន្ធកីឡាវាយសីកម្ពុជាបានឱ្យដឹងថា ការប្រកួតឆ្នាំនេះគណៈកម្មការបានសម្រេចដាក់ចេញនូវវិញ្ញាសាមួយចំនួនឱ្យប្រកួតក្នុងនោះប្រកួតវាយគូអាយុ១៦ឆ្នាំ ប្រកួតវាយគូយុវជនអាយុ១៩ឆ្នាំឡើង ។ ប្រកួតវាយគូ អាយុ៤០ដល់៥០ឆ្នាំ ប្រកួតវាយគូវ័យចាស់អាយុ៥០ឆ្នាំឡើង និងប្រកួតវាយគូនារីមិនគិតពីអាយុ។
បន្ទាប់ពីបានធ្វើការប្រកួតយ៉ាងស្វិតស្វាញនិងមានការយកចិត្តទុកដាក់និងផ្តល់ពិន្ទុយ៉ាងសុក្រឹតរបស់គណៈកម្មការរួចមក លទ្ធផលបច្ចេកទេសដែលទទួលបានលើវិញ្ញាសានីមួយៗក្នុងនោះវិញ្ញាសាវាយគូអាយុ១៦ឆ្នាំ លេខ១បាន ទៅលើកីឡាករទេព ច័ន្ទម៉ារ៉ា វង្ស សុចាន់វិរៈ មកពីសមាគមវាយសីខេត្តកំពង់ឆ្នាំង ។ លេខ២បានទៅលើកីឡាករចេង ភិរម្យ ឡេង វណ្ណៈ មកពីក្លឹបត្រពាំងផ្លុង និងលេខ៣ បានទៅលើកីឡាករកែវ ឧត្តម លី ស៊ុយប៊ុង មកពីសមាគមវាយសីកំពង់ឆ្នាំង ។
ប្រកួតវាយគូអាយុក្រោម១៩ឆ្នាំ លេខ១ បានទៅលើកីឡាករស៊ឹម ពិសី ចាន់ សលីដា មកពីសមាគមវាយសីកំពង់ឆ្នាំង ។ លេខ២ កីឡាករងួន កាណូរ៉ា ឈៀង សុជាតិ មកពីក្លឹបវាយសី ត្រពាំងផ្លុង និងលេខ៣ បានទៅលើកីឡាករលឹម សុវណ្ណនី ម៉ី សុវណ្ណ ដារិទ្ធី ក្លឹបវាយសីខេត្តស្វាយរៀង ។ វិញ្ញាសាវាយគូអាយុ១៩ឆ្នាំឡើង លេខ១ កីឡាករទាវ យ៉ុងវណ្ណៈ ព្រុំ សារ៉ាវុធ ក្លឹបត្រពាំងផ្លុង ។ លេខ២ កីឡាករសំ ប៊ុណ្ណារិទ្ធ ដែង ទិត្យរស្មី ក្លឹបវាយសីបៃតងកម្ពុជា ។
លេខ៣ បានទៅកីឡាករសុខ ចាន់ថន ជិន ជេតពុទ្ធិជាតិ ក្លឹបវាយសីត្រពាំងផ្លុង ។ វិញ្ញាសាវាយគូវ័យកណ្តាល៤០-៥០ឆ្នាំ លេខ១ បានទៅលើកីឡាករលឹម កែវ ហាន វុទ្ធី មកពីក្លឹបព្រះខ័នរាជ ។ លេខ២ កីឡាករថាវ សុផល ប៉ោ នរិន្ទ ក្លឹបខេត្តកំពង់ចាម ។ លេខ៣ កីឡាករលឹម សារ៉ា ហែម ម៉ានិត ក្លឹបបៃតងកម្ពុជា ។ វិញ្ញាសាវ័យចំណាស់់ ៥០ឆ្នាំឡើង លេខ១ បានទៅលើកីឡាករសេង ប៊ុនលី ជាមសៅ ក្លឹបខេត្តកំពង់ឆ្នាំង លេខ២ កីឡាករមាស ប៉េវ សឿម រិន ក្លឹបបៃតងកម្ពុជា និងលេខ៣ កីឡាករលឿង ធារ៉ា សួស ឆេង ក្លឹបបៃតងកម្ពុជា។
ប្រកួតវាយគូនារី មិនគិតពីអាយុ លេខ១ កីឡាការិនីកែវ ពេជ្រឆរ៉ាវី ឡេង សុខគង់ មកពីក្លឹបស្វាយរៀង ។ លេខ២ កីឡាការិនី អ៊ុង វលក្ខទេវី ឈួន ឆៃរី ក្លឹបសីហខេមរៈ និង លេខ៣ កីឡាការិនីលឹម គឹមហួយ លឹម គឹមលួង ក្លឹបខេត្តកំពង់ឆ្នាំង ។ លោកជាម សុភា ជំនួយការលោកឧត្តមសេនីយ៍ឯកលី កុសល បានថ្លែងអំណរគុណដល់លោកឧកញ៉ាភូ ពុយ ប្រធានក្លឹបបៃតងកម្ពុជា ដែលបានផ្តល់ទីកន្លែងសម្រាប់ប្រកួតនិងឧបត្ថម្ភថវិកា៤លានរៀល សម្រាប់កម្មវិធីជប់លៀងកីឡាករ-កីឡាការិនីនៅពេលបញ្ចប់ការប្រកួត ។
ដោយឡែក លោកឧត្តមសេនីយ៍ឯកលី កុសល ក៏បានចូលរួមឧបត្ថម្ភ២លានរៀល និងសប្បុរសជន ជាច្រើនរូបទៀត ដែលធ្វើឱ្យកម្មវិធីប្រកួតនេះប្រព្រឹត្តទៅយ៉ាងរលូនដល់ចប់។ លោកឧត្តមសេនីយ៍ឯកលី កុសល ជានិច្ចកាលតែងខិតខំក្នុងការជំរុញឱ្យវិស័យកីឡាវាយសីកម្ពុជាមានការរីកចម្រើនជាលំដាប់ ដូចជាការធ្វើឡើងតាមរយៈកម្មវិធីប្រកួតក្នុងស្រុក និងនៅលើឆាកអន្តរជាតិជាច្រើនលើកច្រើនសា ។ លោកក៏មានគម្រោងបញ្ជូនកីឡាករ-កីឡាការិនីកម្ពុជាទៅហ្វឹកហាត់នៅក្រៅប្រទេសផងដែរ ដើម្បីអភិវឌ្ឍន៍សមត្ថភាពបច្ចេកទេសឱ្យបានកាន់តែល្អប្រសើរដូចជាកីឡាករល្បីៗក្នុងតំបន់ផងដែរ ៕
ចែករំលែកព័តមាននេះ