រាជធានីភ្នំពេញ ៖ ការប្រកួតប្រដាល់ក្បាច់គុនខ្មែរបុរាណដើម្បីឈានទៅដណ្តើមខ្សែក្រវាត់ខារ៉ាបាវទម្ងន់៦០គីឡូក្រាមនៅលើសង្វៀនស្ថានីយទូរទស្សន៍ CTN ថ្ងៃសុក្រទី២០ មករា ខាងមុខនេះ សម្រាប់ពូល B គឺបានឈានចូលដល់ជុំទី៤ហើយ ។ អ្នកប្រដាល់រឿម វណ្ណៈ មកពីក្លឹបកីឡាប្រដាល់ក្រសួងការពារជាតិជួបផាន់ សុវណ្ណ មកពីក្លឹបមិត្តប៉ូលិស ខណៈឯម វិចិត្រ មកពីក្លឹបគ្រុឌមានជ័យជួបឆាយ មាស មកពីក្លឹបរតនគិរី ។
រឿម វណ្ណៈ រហូតមកទល់ពេលនេះទើបតែប្រកួតបាន២លើកប៉ុណ្ណោះ ហើយក្នុងនោះនៅមិនទាន់ស្គាល់ចាញ់ម្តងណាឡើយ ដូច្នេះពេលនេះគេរកបាន៦ពិន្ទុហើយ។ រីឯផាន់ សុវណ្ណ ឆ្លងកាត់ការប្រកួតបាន១លើកនិងទទួលជ័យជំនះដែរ។ ចំណែកឯការប៉ះគ្នារវាងគេទាំង២នាក់លើកនេះទាំងសងខាងសុទ្ធតែត្រូវការឈ្នះដូចគ្នា ។ តែបើនិយាយពីក្បាច់ប្រយុទ្ធនៅលើសង្វៀនរវាងគូនេះ គឺមិនលើសខ្វះគ្នាប៉ុន្មាន ទេ។ វណ្ណៈមានផ្លែកែងនិងជង្គង់ល្អ។ រីឯសុវណ្ណល្អស្នៀតជើងនិងស្នៀតដៃ ។
ដោយឡែកគូប្រកួតរវាងឯម វិចិត្រនិងឆាយ មាសវិញ អាចមានសភាពតឹងតែងបន្តិច ។ វិចិត្រប្រកួតបាន២លើកក្នុងនោះឈ្នះទាំាង២លើកជាប់គ្នាមាន៦ពិន្ទុហើយ។ ចំណែកឆាយ មាសប្រកួតបាន២លើកដូចគ្នា ឈ្នះ១ ចាញ់១ ។ រវាងគូនេះសុទ្ធតែកំពូលអ្នកលេងស្នៀតកែងនិងជង្គង់ដូចគ្នា ប៉ុន្តែល្បិចប្រយុទ្ធរបស់វិចិត្រសម្បូរបែបជាង ទាំងផ្លែកែងនិងជង្គង់កាន់តែអស្ចារ្យថែមទៀត ។ ឆាយ មាស អាងកម្លាំងនិងមានស្នៀតជើងល្អអាចទាត់ចេញបានរហ័សនិងមានទម្ងន់ធ្ងន់ទៀតផង ។
រវាងគូនេះទំនងជាធ្វើឱ្យអ្នកតាមដានការប្រកួតពិបាកវិនិច្ឆ័យខ្លាំងណាស់ ព្រោះល្បិចប្រកួតមានប្រហាក់ប្រហែលគ្នា ។ រីឯគូប្រកួតមិត្តភាពវិញ លាប សំណាង មកពីក្លឹបកងពលតូចលេខ៧០ ជួបប្រកួតជាមួយបៅ ស៊ីយ៉េត មកពីក្លឹបក្រុងប៉ោយប៉ែត និងរាជ សីហ៍ ចាន់ឌី មកពីក្លឹបសម្រែករាជសីហ៍បង្ក្រាបគ្រឿងញៀនជួបប្រកួតជាមួយវង្ស សុខពិសី មកពីក្លឹបបុរីនាគរាជ ៕
ចែករំលែកព័តមាននេះ