រាជធានីភ្នំពេញ ៖ សាកលវិទ្យាល័យវេស្ទើនបានសហការជាមួយក្រសួងអប់រំយុវជន និងកីឡារៀបចំការប្រកួតកីឡាបាល់ទះយុវជនសិស្សវិទ្យាល័យរាជធានីភ្នំពេញ ដើម្បីដណ្តើមពានរង្វាន់សាកលវិទ្យាល័យវេស្ទើនឆ្នាំ២០១២ ដែលពិធីបើកការប្រកួតជាផ្លូវការនោះត្រូវបានធ្វើឡើងកាលពីថ្ងៃទី១៤ ធ្នូ នៅវិទ្យាល័យច្បារអំពៅ ក្រោមអធិបតីភាពលោកប៊ូ ជុំសេរី អនុរដ្ឋលេខាធិការក្រសួងអប់រំ និងលោកតែ ឡូរិន ទីប្រឹក្សាអមទីស្តីការគណៈរដ្ឋមន្ត្រី និងជាសាកលវិទ្យាធិការនៃសាកលវិទ្យាល័យវេស្ទើន។
ការប្រកួតកីឡាបាល់ទះយុវជនសិស្សវិទ្យាល័យរាជធានីភ្នំពេញនេះ មានវិទ្យាល័យក្នុងរាជធានីភ្នំពេញចំនួន២០បានចូលរួមប្រកួតដោយចាប់ផ្តើមពីថ្ងៃទី១៤ មករា រហូតដល់ចុងខែមីនា ខាងមុខ រៀងរាល់ថ្ងៃសៅរ៍ នៅតាមទីលានប្រកួតចល័តតាមវិទ្យាល័យនានា។ លោកតែ ឡូរិន បានថ្លែងថា សាកលវិទ្យាល័យវេស្ទើន ត្រូវបានបង្កើតឡើងនៅឆ្នាំ២០០៣ ដែលមានមហាវិទ្យាល័យចំនួន៤ គឺមហាវិទ្យាល័យវិទ្យាសាស្ត្រសង្គម, មហាវិទ្យាល័យសិល្បៈ មនុស្សសាស្ត្រ និងភាសា,មហាវិទ្យាល័យវិទ្យាសាស្ត្រ និងបច្ចេកវិទ្យា ព្រមទាំងមហាវិទ្យាល័យគ្រប់គ្រង និងសណ្ឋាគារ-ទេសចរណ៍។
ដោយសារសន្ទុះនៃការរីកចម្រើន និងមានការគាំទ្រពីសំណាក់អ្នកសិក្សាគ្រប់មជ្ឈដ្ឋាន សាកលវិទ្យាល័យវេស្ទើន បានបើកសាខាចំនួន២ទៀតរួមមាន សាកលវិទ្យាល័យវេស្ទើនសាខាខេត្តកំពង់ចាម ឆ្នាំ២០០៥ របស់ក្រសួងអប់រំយុវជន និងកីឡា និងសាកលវិទ្យាល័យវេស្ទើន ទីតាំងទួលស្វាយព្រៃ១ ស្ថិតក្នុងខណ្ឌចំការមន រាជធានីភ្នំពេញ ដែលបានបង្កើតឡើងនៅឆ្នាំ២០១០របស់ក្រសួងអប់រំយុវជន និងកីឡា។
ដើម្បីឱ្យស្របតាមគោលការណ៍ណែនាំរបស់រាជរដ្ឋាភិបាល ក្នុងការធានានូវនិរន្តរភាព និងគុណភាព នៃសកម្មភាពក្នុងការបណ្តុះបណ្តាលធនធានមនុស្សនៅកម្ពុជា សាកលវិទ្យាល័យបានធ្វើកិច្ចសហប្រតិបត្តិការជាមួយដៃគូអប់រំក្នុងកម្រិតជាតិនិងអន្តរជាតិដូចជា៖ ទី១-កម្រិតជាតិ ៖ សាកលវិទ្យាល័យវេស្ទើន ជាសមាជិកក្រុមប្រឹក្សាភិបាលនៃសមាគមគ្រឹះឧត្តមសិក្សាកម្ពុជា ដើម្បីរួមចំណែក និងធ្វើកិច្ចសហប្រតិបត្តិការជាមួយសាកលវិទ្យាល័យ និងគ្រឹះស្ថានឧត្តមសិក្សាផ្សេងៗទៀត ក្នុងការលើកកម្ពស់កម្រិតនៃការបណ្តុះបណ្តាលនិស្សិត ឱ្យស្របតាមការណែនាំរបស់់ក្រសួងអប់រំយុវជន និងកីឡា និងគណៈកម្មាធិការទទួលស្គាល់គុណភាពអប់រំនៃកម្ពុជា(ACC)។
ទី២-កម្រិតអន្តរជាតិ ៖ សាកលវិទ្យាល័យវេស្ទើន បានធ្វើសហប្រតិបត្តិការជាមួយសាកលវិទ្យាល័យនានានៅបរទេស ដូចជាសាកលវិទ្យាល័យ ហាវ៉ៃ(Hawaii University ) នៅសហរដ្ឋអាមេរិក, York St John University នៅ UK និងសាកលវិទ្យាល័យយូនីតា នៅប្រទេសម៉ាឡេស៊ី វិទ្យាស្ថាន STEi នៃប្រទេសសិង្ហបូរី ក្នុងការបណ្តុះបណ្តាលថ្នាក់វិញ្ញាបនបត្រជាន់ខ្ពស់ និងថ្នាក់បរិញ្ញាបត្រ ជាភាសាសុទ្ធសាធ ដែលសញ្ញាបត្រត្រូវបានទទួលស្គាល់ជាសាកល។
ជាលទ្ធផលគិតមកដល់បច្ចុប្បន្ន និស្សិតដែលបានទទួលស្គាល់ការសិក្សានៅសាកលវិទ្យាល័យវេស្ទើន សរុបទាំងអស់ចំនួន៣.៨៦០នាក់ ដោយឡែកនិស្សិតដែលកំពុងទទួលការបណ្តុះបណ្តាលនៅសាកលវិទ្យាល័យវេស្ទើន សរុបមានចំនួនជាង៦.៥០០នាក់ ហើយយោងតាមការស្រង់ព័ត៌មាន និងការទទួលបានស្ថិតិជាផ្លូវការ ដោយក្រុមការងារធានាគុណភាពផ្ទៃក្នុងរបស់សាកលវិទ្យាល័យ បានបង្ហាញយ៉ាងច្បាស់ថា និស្សិតចំនួន៩០ភាគរយ បានទទួលការងារធ្វើបន្ទាប់ពីបានបញ្ជាក់ការសិក្សារបស់ខ្លួនដោយជោគជ័យ និង១០ភាគរយទៀតកំពុងសិក្សាបន្តយកចំណេះដឹងបន្ថែមទៀត រីឯសិស្សកំពុងសិក្សាវិញនោះ គឺមាននិស្សិតចំនួន៦០ភាគរយបានកំពុងទទួលការងារធ្វើ។
លោកតែ ឡូរិន បញ្ជាក់ថា សាកលវិទ្យាល័យវេស្ទើន មានគ្រឹះស្ថានអប់រំមួយផ្សេងទៀតដែលជាឧបសម្ព័ន្ធរបស់ខ្លួនគឺ សាលាវេស្ទើនអន្តរជាតិ ដែលបាននិងកំពុងធ្វើការបណ្តុះបណ្តាលសិស្សានុសិស្សចាប់ពីថ្នាក់មត្តេយ្យរហូតដល់ថ្នាក់ទី១២ មានចំនួន ១០ទីតាំង ក្នុងនោះ៩ទីតាំងស្ថិតនៅក្នុងរាជធានីភ្នំពេញ និង១ទីតាំងស្ថិតនៅខេត្តសៀមរាប។ ចំពោះកម្មវិធីសិក្សានៅសាលាវេស្ទើនអន្តរជាតិ គឺសិក្សាចំណេះដឹងទូទៅជាភាសាអង់គ្លេស និងមានកម្មវិធីផ្លាស់ប្តូរសិស្សជាមួយសាលារដ្ឋជាច្រើននៅសហរដ្ឋអាមេរិក ដែលជារៀងរាល់ឆ្នាំយើងបានបញ្ជូនសិស្សសាលាវេស្ទើនអន្តរជាតិ ទៅសិក្សានៅសហរដ្ឋអាមេរិកចំនួនពី១៥ ទៅ២០នាក់ ហើយបច្ចុប្បន្ននេះមានសិស្សរបស់សាលាវេស្ទើនអន្តរជាតិចំនួនប្រហែលជាង១០០នាក់ កំពុងសិក្សាបន្តនៅតាមសាកលវិទ្យាល័យនានានៅសហរដ្ឋអាមេរិក ចក្រភពអង់គ្លេស និងអូស្រ្តាលី។
លោកប៊ូ ជុំសេរី បានថ្លែងថា នោះជាលើកទី៣ហើយ ដែលសាកលវិទ្យាល័យវេស្ទើន បានរៀបចំកម្មវិធីនេះឡើង។ ដោយយោងតាមរបាយការណ៍របស់លោកអនុប្រធានមន្ទីរអប់រំយុវជន និងកីឡា រាជធានីភ្នំពេញ និងរបាយការណ៍របស់លោកសាកលវិទ្យាធិការ ក្នុងការរៀបចំប្រកួតនាពេលនេះ និងការបណ្តុះបណ្តាលនិស្សិតដែលទទួលបានជោគជ័យក្នុងការសិក្សា និងទទួលសញ្ញាបត្រជាផ្លូវការសរុបចំនួន៣.៨៦០នាក់។ ចំណែកនិស្សិតកំពុងសិក្សា មានចំនួនជាង៦.៥០០នាក់ ដោយសរុបទៅសាកលវិទ្យាល័យនេះ បាននិងកំពុងធ្វើការបណ្តុះបណ្តាលនិស្សិត ប្រមាណជាង១០.០០០នាក់មកហើយ។
ក្នុងនាមក្រសួងអប់រំ និងខ្លួនលោកផ្ទាល់លោកសូមអបអរសាទរ និងកោតសរសើរចំពោះជោគជ័យថ្មី និងសមិទ្ធផលជាផ្លែផ្កានៃការបណ្តុះបណ្តាលធនធានមនុស្ស និងការជួយលើកស្ទួយវិស័យអប់រំកាយ និងកីឡា ដែលសាកលវិទ្យាល័យវេស្ទើនសម្រេចបាននាពេលនេះ ជាពិសេសលោកសូមអបអរសាទរ ចំពោះការខិតខំរបស់ប្អូនៗ ក្មួយៗក្រុមកីឡាទាំងអស់ ដែលបានព្យាយាមប្រឹងប្រែងអស់ពីកម្លាំងកាយចិត្ត តស៊ូគ្រប់ការលំបាក ក្នុងការហ្វឹកហាត់សម្រាប់ថ្ងៃនេះ។ បន្ថែមពីលើនេះ លោកសូមកោតសរសើរចំពោះ លោកគ្រូ អ្នកគ្រូ អាណាព្យាបាលរបស់សិស្ស ដែលបានផ្តល់ចំណេះដឹង កម្លាំងចិត្ត និងផ្គត់ផ្គង់ឱ្យកូនចៅបានចូលសិក្សា៕
ចែករំលែកព័តមាននេះ