ខេត្តព្រះសីហនុ ៖ កាលពីល្ងាចថ្ងៃទី១០ មករា២០១២ នៅទីលានបាល់ទាត់វិទ្យាល័យហ៊ុន សែនវាលរេញ បានធ្វើពិធីបិទការប្រកួតបាល់ទាត់យុវជនអបអរខួបអនុស្សាវរីយ៍លើកទី៣៣ទិវាជ័យជំនះ៧មករា ដែលរៀបចំឡើងដោយសាលាស្រុកព្រៃនប់និងការិយាល័យអប់រំស្រុក ក្រោមការអញ្ជើញចូលរួមពីលោកទិត វុទ្ធី អភិបាលស្រុកព្រៃនប់ លោកវ៉ាន់ ឈួន អនុប្រធានមន្ទីរអប់រំខេត្ត លោកប្រធាន អនុប្រធាន ការិយាល័យអប់រំស្រុក លោកគ្រូ អ្នកគ្រូ សិស្សានុសិស្ស សប្បុរសជន និងប្រជាពលរដ្ឋយ៉ាងច្រើនកុះករ ។
នៅក្នុងឱកាសនោះលោកសេក សាវ៉ុន ប្រធានការិយាល័យអប់រំស្រុកបានឡើងអានរបាយការណ៍ឱ្យដឹងថា នៅក្នុងការប្រកួតបាល់ទាត់នាឆ្នាំនេះមានក្រុមកីឡាករចូលរួមចំនួន៥ក្រុម គឺ១-ក្រុមម្លប់តាប៉ាង ២-ទួលទទឹង ៣-សារាយ ៤-ទឹកថ្លា និង៥-ក្រុមតិចសាស់ ។ ឆ្លងតាមការប្រកួតរយៈពេលពីរថ្ងៃគឺថ្ងៃទី៩និងទី១០ មករា ជាលទ្ធផលលេខ១បានទៅលើក្រុមតិចសាស់មកពីឃុំវាលរេញ លេខ២បានទៅលើក្រុមសារាយ មកពីឃុំជើងគោ លេខ៣ បានទៅលើក្រុមទឹកថ្លាមកពីឃុំទឹកថ្លា និងលេខ៤ បានទៅលើក្រុមម្លប់តាប៉ាង មកពីអង្គការម្លប់តាប៉ាង។
ចំណាត់ថ្នាក់លេខ១ ទទួលបានពានមួយ ថវិកា២០ម៉ឺន និងបាល់ទាត់២ ។ លេខ២ ទទួលបានពាន១ ថវិកា១៥ម៉ឺនរៀល និងបាល់ទាត់១ ។លេខ៣ ទទួលបានពាន១ ថវិកា១០ម៉ឺនរៀល និងបាល់ទាត់២ និងលេខ៤ ទទួលបានថវិកាចំនួន១០ម៉ឺនរៀល ។ លោកវ៉ាន់ ឈួន អនុប្រធានមន្ទីរអប់រំខេត្តបានកោតសរសើរ គណៈកម្មការរៀបចំការប្រកួត និងកោតសរសើរក្រុមកីឡាករគ្រប់ក្រុមទាំងអស់ដែលខិតខំប្រឹងប្រែងប្រកួតអស់ពីកម្លាំងកាយចិត្តធ្វើឱ្យការប្រកួតប្រព្រឹត្តទៅយ៉ាងរលូន។
លោកទិត វុទ្ធី អភិបាលស្រុកព្រៃនប់ថ្លែងថា នេះគឺជាមោទនភាពជាទីបំផុត ដែលស្រុកព្រៃនប់បានរៀបចំបើកការប្រកួតបាល់ទាត់យុវជន។ ការចូលរួមលេងកីឡាគឺជាស្នូលមួយក្នុងការដាស់តឿនស្មារតីយុវវ័យឱ្យចៀសផុតពីល្បែងឧបាយមុខផ្សេងៗជាពិសេសចៀសផុតពីគ្រឿងញៀន ។ លោកកអភិបាលស្រុកបានថ្លែងអំណរគុណដល់សប្បុរសជនគ្រប់ជាន់ថ្នាក់ដែលបានចូលរួមចំណែកជួយឧបត្ថម្ភដល់ការប្រកួត ជាពិសេសលោកស្បោង សារ៉ាត អភិបាលខេត្ត និងក្រុមការងារខេត្តព្រះសីហនុទាំងអស់ដែលបានជួយឧបត្ថម្ភជាប្រាក់ចំនួន១លាន៦០ម៉ឺនរៀលដល់គណៈកម្មការរៀបចំការប្រកួតដើម្បីចាត់ចែងក្នុងពិធី ៕
ចែករំលែកព័តមាននេះ