រាជធានីភ្នំពេញ ៖ នៅសាលប្រជុំនាយកដ្ឋានហិរញ្ញវត្ថុក្រសួងការពារជាតិកាលពីថ្ងៃព្រហស្បតិ៍ ទី១២ មករា ឆ្នាំ២០១២ សហព័ន្ធកីឡាវាយសីកម្ពុជាបានបើកកិច្ចប្រជុំរបស់ខ្លួនមួយស្តីពីការងារបូកសរុបវាយតម្លៃរបស់កីឡាវាយសីក្នុងឆ្នាំ២០១១ និងទិសដៅ២០១២ដោយមានការអញ្ជើញចូលរួមជាអធិបតីពីលោកឧត្តមសេនីយ៍ឯកលី កុសល ប្រធានសហព័ន្ធកីឡាវាយសីកម្ពុជា។
សមាជិកដែលអញ្ជើញចូលរួមពេលនោះមានលោកមាស សារិន អគ្គលេខាធិការសហព័ន្ធកីឡាវាយសីកម្ពុជា លោកស្តើង ជា អនុប្រធានទី២របស់សហព័ន្ធ លោកកែវ រស់ អគ្គហេរញ្ញិក។ លោកធិន សៅ លោកជាម សុភា លោកហាន វុទ្ធី លោកអ៊ីត សេរីវុឌ្ឍ និងលោកណៃ វ៉ាន់ឃីរីវុធ ។ ក្នុងឱកាសនោះ លោកមាស សារិន បានលើកឡើងអំពីសកម្មភាពការងារក្នុងប្រទេសនិងសកម្មភាពនៅក្រៅប្រទេស ។ ចំពោះសកម្មភាពក្នុងប្រទេសតាមសេចក្តីរាយការណ៍បានបញ្ជាក់ឱ្យឃើញថា សហព័ន្ធកីឡាវាយសីកម្ពុជាបានពង្រឹង និងពង្រីកសកម្មភាពរបស់ខ្លួនឥតឈប់ឈរទាំងការប្រជុំគណៈកម្មាធិការប្រតិបត្តិទាំងការងារប្រកួតផ្សេងៗជាច្រើននាពេលកន្លងមក។
រីឯសកម្មភាពនៅក្រៅប្រទេសវិញ សហព័ន្ធកីឡាវាយសីកម្ពុជា បើទោះជាមានការលំបាកនៅចំពោះមុខយ៉ាងណាក្តី ក៏ឆ្លៀតបញ្ជូនកីឡាករ កីឡាការិនីទៅហ្វឹកហាត់នៅប្រទេសចិន និងវៀតណាម ព្រមទាំងបានបញ្ជូនមន្ត្រីជំនាញទៅចូលរួមក្នុងវគ្គសិក្ខាសាលានៅប្រទេសម៉ាឡេស៊ី និងមានសកម្មភាពប្រកួតផ្សេងៗជាច្រើនទៀត។ ជាមួយនឹងការខិតខំប្រឹងប្រែងរបស់សហព័ន្ធកីឡាវាយសីនាពេលកន្លងមកទាំងក្នុងស្រុកក្តី ក្រៅស្រុកក្តី លោកមាស សារិន បានទទួលស្គាល់ថា កម្រិតនៃការលេងកីឡាវាយសីកម្ពុជាបើប្រៀបធៀបជាមួយបណ្តាប្រទេសមួយចំនួនក្នុងតំបន់ គឺនៅមានកម្រិតទាបនៅឡើយ។
លោកឧត្តមសេនីយ៍ឯក លី កុសល មានប្រសាសន៍ថា សហព័ន្ធកីឡាវាយសីកម្ពុជា រួមជាមួយគណៈកម្មាធិការប្រតិបត្តិទាំងអស់មិនរាថយឡើយចំពោះបញ្ហាផ្សេងៗ គឺត្រូវតែរួបរួមគ្នារិះរកមធ្យោបាយល្អ និងគន្លឹះសំខាន់ៗមួយចំនួនទៀតដើម្បីពង្រឹងសមត្ថភាពបច្ចេកទេសកីឡាវាយសីឱ្យមានការរីកចំរើនថែមទៀត។ ជាងនេះទៅទៀតដើម្បីភាពងាយស្រួលក្នុងការតាមដានរាល់សកម្មភាពបច្ចេកទេសរបស់កីឡាករ កីឡាការិនីនីមួយៗ សហព័ន្ធបានសម្រេចធ្វើអត្តសញ្ញាណប័ណ្ណឱ្យពួកគេ ព្រោះថា ការធ្វើបែបនេះវាអាចជួយផ្តល់ភាពងាយស្រួលយ៉ាងច្រើន ទាំងផ្នែកអ្នកគ្រប់គ្រងក៏ដូចជាកីឡាករផងដែរ ហើយក៏នៅមានចំណុចជាច្រើនទៀតដែលសហព័ន្ធកីឡាវាយសីកម្ពុជាត្រូវកែប្រែ ជាពិសេសត្រូវតែកែប្រែអត្តចរិតរបស់ក្លឹប និងកីឡាករ កីឡាការិនីមួយចំនួនដែលតែងតែបង្កភាពអសកម្ម មានអត្តចរិតមិនថ្លៃថ្នូរឱ្យពួកគេស្គាល់តម្លៃខ្លួនឡើងវិញ។
លោកបញ្ជាក់ថា នៅថ្ងៃទី១៤ និង១៥ មករា សហព័ន្ធកីឡាវាយសីកម្ពុជារៀបចំការប្រកួតកីឡាវាយសីដណ្តើមពានរង្វាន់៧មករា ដូច្នេះគណៈកម្មការទាំងអស់ត្រូវយកចិត្តទុកដាក់សហការគ្នាឱ្យបានល្អ ជាពិសេសជាមួយអាជ្ញាធរខេត្ត ធ្វើយ៉ាងណាឱ្យបានល្អប្រសើរចាប់ពីថ្ងៃប្រកួតរហូតដល់ថ្ងៃបញ្ចប់ ៕
ចែករំលែកព័តមាននេះ