រាជធានីភ្នំពេញ ៖ បន្ទាប់ពីដណ្តើមបានតំណែងជាម្ចាស់ជើងឯកពានរង្វាន់បាល់ទាត់ក្របខណ្ឌនិស្សិតឧត្តមសិក្សា និងមធ្យមសិក្សាបច្ចេកទេសឆ្នាំសិក្សា២០១០-២០១១ កន្លងមកនេះក្រុមបាល់ទាត់សាកលវិទ្យាល័យអាស៊ីអឺរ៉ុបនៅតែបន្តភាពខ្លាំងរបស់ខ្លួនជានិច្ច គឺដណ្តើមបានចំណាត់ថ្នាក់លេខ១ក្នុងពូល ក្នុងការប្រកួតវគ្គជម្រុះវិលជុំដណ្តើមពានរង្វាន់សម្តេចតេជោហ៊ុន សែន CUP 2012 ដែលធ្វើនៅលើទីលានខេត្តសៀមរាប កាលពីថ្ងៃទី១១ មករា មកនេះជាការប្រកួតបញ្ចប់ ក្នុងមណ្ឌលសៀមរាប ។
នៅមណ្ឌលសៀមរាប មាន៤ក្រុម ដែលត្រូវជួបប្រកួតគ្នាដើម្បីរកអ្នកឈ្នះចំនួន២ក្រុមសម្រាប់ឡើងមកប្រកួតចែកពូលនៅពហុកីឡដ្ឋានជាតិជាបន្តទៀត ក្នុងនោះមានក្រុមសាកលវិទ្យាល័យអាស៊ី អឺរ៉ុប ក្រុមខេត្តឧត្តរមានជ័យ ក្រុមខេត្តបន្ទាយមានជ័យ តំណាងឱ្យក្រុមសាកលវិទ្យាល័យគ្រប់គ្រង និងសេដ្ឋកិច្ច និងក្រុមបក្សីចាំក្រុង ខេត្តសៀមរាប ។ ប្រកួតក្នុងជុំទី១ ក្រុមសាកលវិទ្យាល័យអាស៊ីអឺរ៉ុប បានត្រឹមតែយកស្មើ០-០ ជាមួយក្រុមខេត្តឧត្តរមានជ័យ ប៉ុណ្ណោះ ។
នៅជុំទី២ ក្រុមខ្លាំងសាកលវិទ្យាល័យអាស៊ីអឺរ៉ុបបានលត់ក្រុមសាកលវិទ្យាល័យគ្រប់គ្រង និងសេដ្ឋកិច្ច៣-០ ជាបន្តទៀត ។ ដូច្នេះតាមរយៈនៃជ័យជម្នះនេះ ក្រុមបាល់ទាត់
សាកលវិទ្យាល័យអាស៊ីអឺរ៉ុប អាចរកកន្លែងបាន យ៉ាងល្អនៅក្នុងការប្រកួតវគ្គ១/៤ជាបន្តទៀត ។ លោកឌួង លាង សាកលវិទ្យាធិការនៃសាកលវិទ្យាល័យអាស៊ីអឺរ៉ុប មានប្រសាសន៍ថា បច្ចុប្បន្នសាកលវិទ្យាល័យអាស៊ី អឺរ៉ុប មិនត្រឹមតែយកចិត្តទុកដាក់ក្នុងការពង្រឹងគុណភាពវិស័យអប់រំនោះទេ តែបានធ្វើឱ្យកំណើន និស្សិតមានការកើនឡើងជាលំដាប់ពីមួយឆ្នាំទៅមួយឆ្នាំទៀតផង ។
ទន្ទឹមនឹងនេះសាកលវិទ្យាល័យអាស៊ីអឺរ៉ុបបាននិងកំពុងពង្រឹង និងពង្រីកវិស័យកីឡាយ៉ាងខ្លាំង ព្រោះថា វិស័យកីឡា គឺជាផ្នែកមួយយ៉ាងសំខាន់ដែលធ្វើឱ្យនិស្សិតទទួលបាននូវសារប្រយោជន៍ខាងបញ្ញា ស្មារតី និងសុខភាពរាងកាយ ។ ជាមួយនឹងការយកចិត្តទុកដាក់ទាំងផ្នែកអប់រំ និងផ្នែកកីឡានាពេលនេះធ្វើឱ្យកីឡាបាល់ទាត់របស់សាកលវិទ្យាល័យអាស៊ីអឺរ៉ុបនៅតែខ្លាំងជានិច្ច ៕
ចែករំលែកព័តមាននេះ