រាជធានីភ្នំពេញ ៖ ជាម អាដាំ មកពីក្លឹបឃ្លាំងមឿងកីឡា និងហ៊ីម សារ៉ាន់ មកពីក្លឹបកីឡាប្រដាល់ក្រសួងការពារជាតិនឹងជួបគ្នានៅលើសង្វៀន CTN ថ្ងៃអាទិត្យ ទី១៥ មករា ខាងមុខនេះ ខណៈផន ប៊ុនម៉ៅ មកពីក្លឹបបុរីរាជសីហ៍មានឫទ្ធិ ឡើងសាកកម្លាំងជាមួយឃឹម ពេជ្រចិន្តា មកពីក្លឹបបុរីនាគរាជ ។ ចាំមើលមើល៍ តើអ្នកណាខ្លាំងជាង ។ ម្ចាស់ជើងឯកគុនខ្មែរវគ្គ១ជាម អាដាំ មួយរយៈមកនេះយីអ៊ុនរបស់គេឡើងខ្ពស់គួរសមប្រកួតមិនសូវដែលចាញ់ឡើយ ។
តែទោះជាយ៉ាងណាគេក៏មិនហ៊ានអួតក្អេងក្អាងទុកមុនបានដែរ សម្រាប់ការមកប៉ះជាមួយសារ៉ាន់ ដែលជាកំពូលអ្នកលេងស្នៀតជើងម្នាក់ដែរនោះ ។ អាដាំ មានស្នៀតជើងក៏មិនអន់ខ្សោយប៉ុន្មានដែរ ប៉ុន្តែទាស់ត្រង់ថា ការទាត់ចេញម្តងៗរាងយឺតយ៉ាវបន្តិចប៉ុណ្ណោះ ។ អាដាំមិនសូវពូកែស្នៀតកែង និងជង្គង់នោះទេ តែបើស្នៀតកណ្តាប់ដៃវិញនោះអាចល្អស្មើនឹងស្នៀតជើងដែរ ។ ចិត្តរបស់អាដាំមិនហ៊ានពេក ហើយក៏មិនខ្លាចពេកដែរ ខណៈកម្លាំងស៊ុហ្វរបស់គេអាចតស៊ូបាន៥ទឹកពេញមិនលំបាកឡើយ ។ ឯសារ៉ាន់វិញ ប្រវត្តិរបស់គេធ្លាប់ឡើងសង្វៀនមុនអាដាំបន្តិចមែន តែល្បិចប្រយុទ្ធនៅលើសង្វៀនមិនលើសអាដាំប៉ុន្មានឡើយ ។
សារ៉ាន់ល្អស្នៀតកែង និងជង្គង់ អាចវាយចេញបានរហ័ស និងចំគោលដៅបានល្អទៀតផង ចំណែកឯចិត្តរបស់គេក៏ពូកែអត់ធ្មត់ណាស់ដែរ ។ ការជួបគ្នារវាងពួកគេទាំង២លើកនេះ មិនអាចទស្សន៍ទាយលទ្ធផលទុកមុនបានឡើយ ។ អ្នកប្រដាល់ចិត្តហ៊ានផន ប៊ុនម៉ៅ និងអ្នកប្រដាល់ចិត្តធ្ងន់ឃឹម ពេជ្រចិន្តា សុទ្ធតែជាកំពូលអ្នកប្រដាល់ដែលមានល្បិចប្រយុទ្ធនៅលើសង្វៀនសម្បូរបែបដូចគ្នា ។ ប៊ុនម៉ៅ បើទោះជាគេមានចរិតឆេវឆាវបន្តិចមែន តែស្នៀតប្រយុទ្ធនៅលើសង្វៀនរបស់គេគឺល្អឥតខ្ចោះតែម្តង ទាំងស្នៀតដៃ និងស្នៀតជើងគឺល្អទាំងអស់ ហើយចលនាវាយលុករបស់គេក៏រហ័សរហួននិងចូលចិត្តវាយសម្រុកមិនដកថយឡើយ ។
រីឯចិន្តាវិញ ចរិតជាមនុស្សចាស់មិនក្អេងក្អាង ហើយក៏មិនដែលកោតញញើតនរណាម្នាក់ដែរ ស្នៀតកែង និងជង្គង់អាចប្រើការបាន ប៉ុន្តែទម្លាប់របស់គេច្រើនតែបន្ធូរដៃឱ្យគូប្រកួតនៅទឹកទី១ និងទី ២ ។ នួន វិចិត្រ មកពីក្លឹបក្រសួងមហាផ្ទៃ ចង់ជម្រះបញ្ជីចាស់ជាមួយសារឹម ង៉ា មកពីក្លឹបក្រសួងការពារជាតិ ជាថ្មីម្តងទៀត ។ ប្រវត្តិជួបគ្នាជាច្រើនលើកមកនេះអត់មានអ្នកណាឈ្នះដាច់ឡើយ ។ វិចិត្រអាងកម្ពស់ ល្អកែង និងជង្គង់ ប៉ុន្តែចលនាវាយលុករបស់គេក៏អាចវាយចេញពីចម្ងាយបានដែរ មិនមានអ្វីជាបញ្ហាសម្រាប់រូបគេឡើយ តែបើនិយាយពីកម្លាំងគឺខ្សោយបន្តិចហើយ ។ សារឹម ង៉ា ចិត្តរបស់គេសឿងបំផុតហ៊ានស៊ីហ៊ានសងទាន់ក្តៅៗ តែម្តង ។
ចលនាវាយលុករបស់គេរហ័សរហួន និងមានការប្រុងប្រយ័ត្នខ្ពស់ផងដែរ ។ ស្នៀតកណ្តាប់ដៃនិងជើងរបស់គេអាចវាយនិងទាត់ចេញបានលឿន ហើយច្បាស់លាស់ទៀតផង ឯស្នៀតជង្គង់វិញនោះក៏កាន់តែអស្ចារ្យថែមទៀត ។ សម្រាប់ការប្រកួតលើកនេះ មិនអាចមើលស្រាលខាងណាបានឡើយ ព្រោះទាំងសងខាងមានល្បិចប្រយុទ្ធនៅលើសង្វៀនម្យ៉ាងម្នាក់ ។ ពេជ្រ សំពៅ មកពីក្លឹបកីឡាប្រដាល់ក្រសួងការពារជាតិ ជួបប្រកួតជាមួយគង់ វ៉ែន មកពីក្លឹបគជសារកីឡា ៕
ចែករំលែកព័តមាននេះ