រាជធានីភ្នំពេញ ៖ កំពូលអ្នកប្រដាល់ជើងខ្លាំងម៉ាឡេស៊ី២រូប នឹងមកស្រុកខ្មែរនៅថ្ងៃសៅរ៍ទី ១១ មិថុនា ដើម្បីប្រកួតសាកកំលាំងជាមួយជើងខ្លាំងខ្មែរយើងនៅលើសង្វៀនប៉ុស្តិ៍លេខ៣។
កីឡាករ MOH ALI YAAKUB ម្ចាស់ជើងឯកច្រើនជំនាន់ក្នុងប្រភេទទម្ងន់៥៧គីឡូក្រាម នឹងត្រូវជួបឯម វុត្ថា មកពីក្លឹបគ្រុឌមានជ័យ រីឯកីឡាករ MOHD ARIFFBIN PAUZI ទម្ងន់៦៧គីឡូក្រាម ប្រកួតជាមួយឡុង សុវណ្ណឌឿន មកពីក្លឹបឡុងសាលវ័ន្ត។
Mohd Ali Yaakub ប្រវត្តិប្រកួតនៅលើសង្វៀនរបស់គេពិតជាមិនធម្មតាឡើយ កីឡាករដែលមានអាយុ២៥ឆ្នាំរូបនេះធ្លាប់ទទួលបានភាពល្បីល្បាញតាំងពីឆ្នាំ២០០៥មកម្ល៉េះ ដែលគេធ្លាប់ដណ្តើមបានជើងឯកមួយដែលមានឈ្មោះថា Ultimate Warrior Kedah នៅម៉ាឡេសីុ។ នៅឆ្នាំ២០០៨ ធ្លាប់ដណ្តើមបានជើងឯកមួយទៀតមានឈ្មោះថា Kelan Tan Stade ដែលជើងឯកទាំង២នេះស្ថិតក្នុងទម្ងន់៥៧គីឡូក្រាម។ ក្រោយមកនៅឆ្នាំ២០០៩ គេទទួលបានជាជើងឯក Kedah Royal Cup ជាមួយមេដាយមាសផ្នែក Amateur Ara Sura Game Dawin នៅអូស្ត្រាលី។ នៅឆ្នាំ២០១០ គេក្លាយជាម្ចាស់ជើងឯកហុងកុង Super Four ជើងឯក Supre Macy នៅទីក្រុង Perth អូស្ត្រាលី និងជើងឯកម្ចាស់ក្សត្រីថៃនៅបាងកក។ ប៉ុន្តែទោះជាយ៉ាងនេះក្តី ក៏គេនៅមិនទាន់ដឹងមុនបានថា គេនឹងអាចយកឈ្នះឯម វុត្ថា បានឬអត់ទេ។
ចំណែកកីឡាករ Mohd Ariffbin Pauzi ប្រវត្តិប្រកួតនៅលើសង្វៀនរបស់គេក៏មិនអន់ប៉ុន្មានដែរ។ គេជាជើងខ្លាំងក្នុងប្រភេទទម្ងន់៦៧គីឡូក្រាម ធ្លាប់ឡើងសង្វៀនបានរហូត៤២ដង ឈ្នះ២៦ ចាញ់១២ និងស្មើ៤ដង។
តាមប្រវត្តិកីឡាករមកពីម៉ាឡេសីុទាំង២រូបនេះសុទ្ធតែជាអ្នកដែលល្បីល្បាញអស្ចារ្យខ្លាំងណាស់ ប៉ុន្តែត្រង់ថា យកកេរ្តិ៍ឈ្មោះមកបោះគ្រវាត់ចោលនៅស្រុកខ្មែរ ឬយ៉ាងណានោះនៅមិនទាន់ដឹងឡើយ។
ចំណែកគូប្រកួតអមប្រចាំសប្តាហ៍២គូទៀតមានកីឡាករនួន វិចិត្រ មកពីក្លឹបក្រសួងមហាផ្ទៃប្រកួតជាមួយជិន រ៉ា មកពីក្លឹបកីឡាប្រដាល់ក្រសួងការពារជាតិ។ កីឡាករព្រុំ សំណាង មកពីក្លឹបកងទ័ពឆត្រយោង៩១១ប្រកួតជាមួយវង្ស ស៊ីថៃ មកពីក្លឹបកងពលតូចលេខ៧០ ចំណែកសូ សុផាត មកពីក្លឹបតោមាស ប្រកួតជាមួយប៊ី យី មកពីក្លឹបឥន្ទ្រីកីឡា ៕
ចែករំលែកព័តមាននេះ