វៀតណាមរកឃើញតុកកែពូជថ្មីមានលក្ខណៈចំលែកក្នុងព្រៃ
ដោយ ៖ សាម៉ន
ថ្ងៃអាទិត្យ ទី៧ ខែកុម្ភៈ ឆ្នាំ២០១០ ម៉ោង ១៦:៥៩
គេហទំព័របរទេស
សត្វតុកតែពូជថ្មីដែលអ្នកស្រាវជ្រាវប្រទះឃើញ
អ្នកស្រាវជ្រាវប្រទះឃើញតុកកែពូជថ្មីមួយប្រភេទស្ថិតនៅក្នុងតំបន់ព្រៃអនុរក្ស តាគូ ខេត្ដប៊ិញធួន នាភាគខាងត្បូងប្រទេសវៀតណាម ។
តុកតែពូជថ្មីនោះបានដាក់ឈ្មោះតាមផ្នែកវិទ្យាសាស្ដ្រ Gecko Takouensis spnov-Ngo & Gamble តាមឈ្មោះរបស់អ្នកដែលប្រទះឃើញ គឺលោកង៉ូ វ៉ានជី (Ngo Van Tri) អ្នកជំនាញមកពីស្ថាប័នជីវវិទ្យាព្រៃតំបន់ក្ដៅក្រុងហូជីមិញ និងលោកថូនី ហ្គេមបល (Tony Gamble) មកពីមហាវិទ្យាល័យមីនីសូតា សហរដ្ឋអាមេរិក ។
អ្វីដែលគួរឱ្យកត់សម្គាល់ គឺអ្នកវិទ្យាសាស្ដ្របានហៅសត្វប្រភេទល្មូនដែលប្រទះឃើញថ្មីនេះជា “តុកកែ” ដោយម្រាមជើងគ្មានបន្ទះស្បែកត្រដាងជាប់ពីម្រាមមួយទៅម្រាមមួយទៀត និងមានចែដុះទៅជុំវិញកមានលក្ខណៈដូចសត្វបង្គួយ ។ ការប្រទះឃើញនេះ ជាការរកឃើញពូជតុកកែលើកទី២ នៅលើភ្នំនៃព្រៃអនុរក្សខាងលើ ដោយកាលពីពេលមុននេះលោកង៉ូ វ៉ានជី បានប្រទះឃើញសត្វមួយប្រភេទដែលដាក់ឈ្មោះថា Gyrtodac-tylus takouensis Ngo & Baner ។
កាលពីប៉ុន្មានឆ្នាំកន្លងមក មានការរកឃើញសត្វល្មូន សត្វស្លាប និងសត្វចិញ្ចឹមកូន ដោយទឹកដោះជាច្រើនប្រភេទ រួមមានសត្វ ទទា ខ្លែងស្រាកភ្នំ និងស្វាក្រេះ៣ពណ៌ (Pygathrix nigripes) ដែលឆ្លុះបញ្ចាំងឱ្យឃើញពីស្ថានភាពនៃសត្វពូជនានានៅក្នុងតំបន់ ។ តាមរបាយការណ៍របស់មូលនិធិគ្រប់គ្រងសត្វព្រៃពិភពលោក (WWF) បានបង្ហាញថា ក្នុងព្រៃអនុរក្សតាគូ Ta Cu មានរុក្ខជាតិជាង៧៥១ពូជ ដោយក្នុងនោះមាន១៥ប្រភេទ ជាពូជដ៏កម្របំផុត ក្រៅពីនេះ ក៏នៅមានជំរករបស់សត្វព្រៃប្រហែល១៧៨ ប្រភេទដែរ ។
លោកវូ ង៉ុកឡុង (Vu Ngoc Long) នាយកមជ្ឈមណ្ឌលបង្កាត់ពូជនៃស្ថាប័នជីវវិទ្យាព្រៃក្នុងតំបន់ក្ដៅក្រុងហូជីមិញ បញ្ជាក់ថា ក្នុងព្រៃតាគូ មានសត្វព្រៃយ៉ាងតិច២៥ ពូជ កំពុងប្រឈមមុខនឹងការផុតពូជ ជាហេតុធ្វើឱ្យត្រូវមានគំរោងការការពារតំបន់ព្រៃអនុរក្សដ៏សំខាន់នេះ ។
កាលពីឆ្នាំមុនអ្នកវិទ្យាសាស្ដ្រក្នុងប្រទេសវៀតណាមបានប្រកាសថា ប្រទះឃើញ តុកកែ និងសត្វល្មូនពូជថ្មីចំនួនជាច្រើនទៀតក្នុងប្រទេសវៀតណាម ដោយសត្វខ្លះមានរូបរាងចំលែក ស្រដៀងនឹងមនុស្សពិភពផ្កាយ ៕
