ខេត្តកំពត ៖ ប្រជាពលរដ្ឋទាំងក្មេងទាំងចាស់បាននាំគ្នាហូបតាប៉ែ ហើយពុលក្អួត ចុកពោះ និងរាករូសពេញភូមិ ហើយត្រូវបានសាច់ញាតិរៀងៗខ្លួននាំមកកាន់មន្ទីរពេទ្យបង្អែកស្រុកកំពង់ត្រាច ។ ហេតុការណ៍ពុលតាប៉ែនេះកើតឡើងនៅក្នុងពិធីបុណ្យដារបស់អ្នកភូមិម្នាក់នៅក្នុងភូមិកោះត្រាច ឃុំស្វាយទងខាងត្បូង ស្រុកកំពង់ត្រាច ខេត្តកំពត កាលពីព្រឹកថ្ងៃទី៣០ វិច្ឆិកា ២០១៥ ។
ប្រភពពីពលរដ្ឋម្នាក់ឈ្មោះ មាន ខ្នា ភេទស្រី អាយុ៣៧ឆ្នាំ នៅភូមិកោះត្រាច បានឲ្យដឹងថា អ្នកភូមិម្នាក់បាននិមន្តលោកឆាន់ ដែលអ្នកភូមិនិយមហៅថា បុណ្យដា នោះ ហើយបានហៅអ្នកភូមិកោះត្រាចទាំងអស់ចូលរួមបុណ្យនោះដែរ ។ អ្នកភូមិភាគច្រើនបានហូបតាប៉ែ មុនពេលលោកឆាន់ ស្រាប់តែម្នាក់ៗមានអាការៈ ពុលក្អួត ចុកពោះ និងរាករូសពេញភូមិ ក៏នាំគ្នាដឹកជនរងគ្រោះមកកាន់មន្ទីរពេទ្យបង្អែកស្រុកកំពង់ត្រាច ។ ប្រភពមិនបានឲ្យដឹងថា អ្នកពុលតាប៉ែទាំងអស់មានប៉ុន្មាននាក់នោះទេ ព្រោះអ្នកពុលខ្លះត្រូវបានសាច់ញាតិយកទៅសង្គ្រោះនៅមន្ទីរពេទ្យខេត្តគៀងយ៉ាង ប្រទេសវៀតណាម ។
ប្រភពពីស្ត្រីម្នាក់ឈ្មោះ រស់ ចេន អាយុ៦២ឆ្នាំ គាត់បានអះអាងថា គាត់ជាអ្នកធ្វើតាប៉ែកសម្រាប់ពិធីបុណ្យដានេះ ដោយគាត់បានទិញមេតាប៉ែពីអ្នកលក់ដែលមានផ្ទះនៅជិតគាត់ ។ ស្ត្រីឈ្មោះ រស់ ចេន និយាយថា កន្លងមកគាត់ធ្លាប់ទិញមេតាប៉ែនោះមកធ្វើតាប៉ែមិនដែលកើតអីទេ តែលើកនេះគាត់អ្នកធ្វើក៏ពុលដែរ ។
នគរបាលស្រុកកំពង់ត្រាចក៏បានចុះទៅធ្វើកំណត់ហេតុពាក់ព័ន្ធករណីប្រជាពលរដ្ឋពុលតាប៉ែនៅភូមិកោះត្រាចនេះដែរ ហើយបានប្រាប់ឲ្យដឹងថា ចំនួនអ្នកពុលតាប៉ែមកព្យាបាលនៅមន្ទីរពេទ្យស្រុកមាន១២នាក់ហើយនៅពេលនេះ ហើយនៅមានបញ្ជូនមកបន្តៗទៀត នេះមិនទាន់គិតពីអ្នកពុលដែលត្រូវបានបញ្ជូនទៅព្យាបាលនៅប្រទេសវៀតណាមទេ ៕
ចែករំលែកព័តមាននេះ