រាជធានីភ្នំពេញ ៖ ជនសង្ស័យឆក់ទូរស័ព្ទដៃជនបរទេសម្នាក់ត្រូវប្រជាពលរដ្ឋដេញចាប់បានស្វាគមន៍ម្នាក់មួយដៃមួយជើងរួចទើបប្រគល់ឲ្យនគរបាលប៉ុស្តិ៍រដ្ឋបាលជ័យជំនះ បន្ទាប់ពីជនសង្ស័យឆក់ទូរស័ព្ទនៅក្នុងវត្តឧណ្ណាលោម វិថីសុធារស ស្ថិតក្នុងភូមិ២ សង្កាត់ជ័យជំនះ ខណ្ឌដូនពេញ កាលពីវេលាម៉ោង០៩ និង៤៥នាទីព្រឹក ថ្ងៃទី២៩ វិច្ឆិកា ២០១៥ ។
ជនសង្ស័យដែលប្រជាពលរដ្ឋចាប់ប្រគល់ឲ្យសមត្ថកិច្ចមូលដ្ឋានឈ្មោះជា សំណាង ភេទប្រុស អាយុ២៧ឆ្នាំ មុខរបរ និងស្នាក់នៅមិនពិតប្រាកដ ។
យោងតាមរបាយករណ៍នគរបាលមូលដ្ឋានបានឲ្យដឹងថា កាលពីវេលាម៉ោង០៩ និង៤៥នាទីព្រឹក ថ្ងៃទី២៩ វិច្ឆិកា ២០១៥ ជនបរទេសបីនាក់បានដើរចូលក្នុងវត្តឧណ្ណាលោម ហើយស្ត្រីម្នាក់បានដកទូរស័ព្ទយកមកថតស្រាប់តែមានជនសង្ស័យម្នាក់ដើរមកក្បែរធ្វើសកម្មភាពឆក់បានសម្រេចរួចព្យាយាមរត់ចេញទៅក្រៅវត្ត។
ភ្លាមៗនោះមិត្តភក្តិប្រុសរបស់ស្ត្រីរងគ្រោះក៏រត់ដេញតាមពីក្រោយជនសង្ស័យរហូតដល់កែងផ្លូវលេខ១៥៤ និង១៣ ត្រូវបានកម្លាំងសន្តិសុខផ្សារកណ្តាល និងប្រជាពលរដ្ឋចាប់ឃាត់ខ្លួន។ ប៉ុន្តែនៅពេលនោះប្រជាពលរដ្ឋដែលស្អប់ឈ្មោះចោរឆក់បានស្វាគមន៍ម្នាក់មួយដៃមួយជើងទើបប្រគល់ទៅឲ្យនគរបាលប៉ុស្តិ៍រដ្ឋបាលជ័យជំនះចាត់ការតាមនីតិវិធីច្បាប់៕
ចែករំលែកព័តមាននេះ