ខេត្តក្រចេះ ៖ អគ្គិភ័យបណ្តាលមកពីភ្លើងចង្ក្រានបានលេបត្របាក់ផ្ទះឈើប្រក់ស័ង្កសីរបស់បុរសវ័យចំណាស់ពីរនាក់យាយ និងតាបណ្តាលឲ្យបាត់បង់ទ្រព្យសម្បត្តិអស់តម្លៃជាង១ម៉ឺនដុល្លារ
ខេត្តក្រចេះ ៖ អគ្គិភ័យបណ្តាលមកពីភ្លើងចង្ក្រានបានលេបត្របាក់ផ្ទះឈើប្រក់ស័ង្កសីរបស់បុរសវ័យចំណាស់ពីរនាក់យាយ និងតាបណ្តាលឲ្យបាត់បង់ទ្រព្យសម្បត្តិអស់តម្លៃជាង១ម៉ឺនដុល្លារ កាលពីវេលាម៉ោង៤រសៀល ថ្ងៃទី២៨ វិច្ឆិកា។
នគរបាលក្រុងក្រចេះបានឲ្យដឹងថា ផ្ទះឈើមួយខ្នងប្រក់សង្កសី មានទំហំ៥គុណ៦ម៉ែត្រ នៅខាងក្រោយភូមិកាប៉ូ សង្កាត់អូរឬស្សី បានរងនូវការឆាប់ឆេះបណ្តាលឲ្យខូចខាត សម្ភារៈរបស់របរប្រើប្រាស់ទាំងស្រុង តែមិនមានមនុស្សរងគ្រោះទេ។
ផ្ទះដែលរងនូវការឆះនេះ ជាកម្មសិទ្ឋរបស់លោកតាឈ្មោះមួល ហាំ អាយុ៨៧ឆ្នាំ និងលោកយាយឈ្មោះ សេត សុង អាយុ៨៣ឆ្នាំ ។
បើតាមការឲ្យដឹងពីអ្នកជិតខាងនៅក្បែរនោះបានឲ្យដឹងថា កាលពីថ្ងៃកើតហេតុ ខណៈដែលកូនៗទៅធ្វើស្រែចម្ការនៅឆ្ងាយពីភូមិ យាយតាទាំងពីរនាក់ដែលនៅផ្ទះក្នុងសភាពវង្វេងភ្លេចភ្លាំងផងនោះ បានដុតភ្លើងទឹកទុកចោលនៅចង្ក្រានខាងក្រោយផ្ទះទើបបណ្តាលឲ្យឆាបឆេះរាលដាលឆេះផ្ទះឈើមួយខ្នងនេះទាំងស្រុងតែម្តង។
ភ្លាមៗនោះដែរ អ្នកភូមិ និងរថយន្តពន្លត់អគ្គិភ័យបានចួយបាញ់ពន្លត់ទប់ស្កាត់មិនឲ្យមានការឆាបឆេះរាលដាលទៅផ្ទះអ្នកជិតខាង។ អធិការនគរបាលក្រុងក្រចេះ លោក នេត លីន បានបញ្ជាក់ថា គ្រោះអគ្កិភ័យនេះ បណ្តាលមកពីភ្លើងចង្ក្រាន ជាការធ្វេសប្រហេសរបស់ម្ចាស់ផ្ទះ៕
ចែករំលែកព័តមាននេះ