ខេត្តបន្ទាយមានជ័យ ៖ ស្ត្រីម្នាក់ស្លាប់ក្នុងថ្លុកឈាមដោយសារតែស្នាដៃប្តីអប្រិយចាក់នឹងកូនកាំបិត ព្រោះតែរឿងកំប៉ិកកំប៉ុកដែលមិនគួរឲ្យជឿ បន្ទាប់ពីស្ត្រីជាប្រពន្ធចិញ្ច្រាំម្ទេសខ្ទាតលើខ្លួន កាលពីវេលាម៉ោង៩យប់ថ្ងៃទី៣១ តុលា ២០១៥ កន្លងទៅនេះ ស្ថិតនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ។
ស្ត្រីរងគ្រោះឈ្មោះ អេង គីសាវន អាយុ៤៣ឆ្នាំ ជាអ្នកដើរលក់ម៉ាំល្ហុង ។ ចំណែកជនដៃដល់ជាប្តីឈ្មោះ ដេត សម្បត្តិ អាយុ៤៧ឆ្នាំ ជាអ្នករត់ម៉ូតូឌុបផង និងជាកម្មករសំណង់ផង ។
បើតាមសាក្សីនៅកន្លែងកើតហេតុ បានប្រាប់សមត្ថកិច្ចថា ដំបូងស្ត្រីជាប្រព្ធអង្គុយចិញ្ច្រាំម្ទេសលើគ្រែមុខបន្ទប់ជួល លុះម្ទេសដែលចិញ្ច្រាំនោះខ្ទាតចំជនដៃដល់ជាប្តីកំណាចរូបនេះ ខឹងស្ទុះយកជ្រញ់ចិញ្ច្រាំម្ទេសនោះគ្រវែងចោល បង្កទៅជាជម្លោះកើតឡើង បុរសជាប្តីទាញយកកូនកាំបិតចុងស្រួចចាក់ទៅលើប្រពន្ធចំទ្រូងបណ្តាលឲ្យស្លាប់នឹងនៅកន្លែងភ្លាមៗតែម្តង ។
តាមការអះអាងរបស់សាច់ញាតិសពបានបង្ហើបថា ជនដៃដល់ជាប្តីកំណាចរូបនេះ កន្លងមក ឲ្យតែពេលស្រវឹងស្រាម្តងៗតែងតែរករឿងប្រចណ្ឌប្រពន្ធជានិច្ច ។
ក្រោយពីធ្វើសកម្មភាពចាក់ប្រពន្ធឱ្យស្លាប់នៅនឹងកន្លែងរួចមក ប្តីចិត្តអប្រិយរូបនេះ បានរត់គេចខ្លួនទៅជាមួយនិងកាំបិតបុ័ងតោ១ លុះម៉ោងជាង១រំលងអធ្រាត្រឈានចូលព្រឹកថ្ងៃទី១ វិច្ឆិកានេះ ទើបនគរបាលក្រុងប៉ោយប៉ែតស្រាវជ្រាវនឹងចាប់ខ្លួនជនសង្ស័យដៃដល់បាន ៕
ចែករំលែកព័តមាននេះ