ខេត្តត្បូងឃ្មុំ ៖ ព្រូរថយន្តម្នាក់ឈ្មោះ ឈាន ផល្លាប ភេទប្រុស អាយុ២៤ឆ្នាំ នៅភូមិសេនសុនត្បូង ឃុំស្រងែ ស្រុកព្រៃឈរ បានសម្រេចចិត្តគិតខ្លី ដោយបានយកប្រេងសាំងចំនួន៥ដបស្មើ៥លីត្រមកចាក់លើខ្លួនប្រាណ រួចដុតប៉ងធ្វើអត្តឃាតបញ្ចប់ជីវិតដោយសារចេះមានពាក្យលេចឮដោយចោទមកលើបុររសរងគ្រោះថា «រូបគេបានចាប់ជីដូនរបស់ខ្លួនរំលោភសេពសន្ថវៈ» ។ ហេតុការណ៍ដ៏រន្ធត់នេះកើតឡើងកាលពីវេលាម៉ោង៤ និង១៥នាទីរសៀល ថ្ងៃទី១២ កញ្ញា ២០១៥ ត្រង់ចំណុចមុខផ្ទះរបស់ឈ្មោះ ផេង ណារ៉ុង ភេទប្រុស អាយុ៣៤ឆ្នាំ នៅភូមិពោធិ៍កិល សង្កាត់សួង ក្រុងសួង បណ្តាលឲ្យរងរបួសធ្ងន់ធ្ងរ រលាករលេះរលួយពេញខ្លួនប្រាណ ។
លោកវរសេនីយ៍ត្រី ឈន សុធន់ អធិការនគរបាលក្រុងសួង បានឲ្យដឹងថា បុរសរងគ្រោះឈ្មោះ ផល្លាប បានទៅទិញប្រេងសាំងពីផ្ទះឈ្មោះ ណារ៉ុង នៅភូមិ-សង្កាត់ខាងលើចំនួន៥ដប រួចដើរចេញទៅបានឆ្ងាយបន្តិច ក៏យកមកចាក់ស្រោចពីលើខ្លួនប្រាណឡើងជោគសំលៀកបំពាក់ រួចបានយកដែកកេះគូសដុតធ្វើអត្តឃាតឆេះឡើងទ្រលោម បង្កឲ្យមានការភ្ញាក់ផ្អើលដល់ប្រជាពលរដ្ឋក្បែរនោះ និងកម្លាំងប៉ុស្តិ៍រដ្ឋបាលសង្កាត់សួងនាំគ្នាជួយអន្តរាគមន៍ដល់អ្នករងគ្រោះ ។
លោកវរសេនីយ៍ត្រី ឈន សុធន់ បន្តថា ក្នុងពេលដែលភ្លើងកំពុងឆេះខ្លួននោះ បុរសនេះបានប្រមៀលខ្លួនទៅនឹងទឹកភក់រហូតដល់រលត់ ប៉ុន្តែមុននឹងរលត់បានរលាករលេះរលួយពេញខ្លួនប្រាណទៅហើយ ។ បន្ទាប់មកកម្លាំងសមត្ថកិច្ចរបស់លោកបានប្រញាប់ហៅរថយន្តមកដឹកយកទៅសង្គ្រោះនៅមន្ទីរពេទ្យបង្អែកស្រុកត្បូងឃ្មុំ ហើយចំពោះមូលហេតុដែលតូចចិត្តដល់ថ្នាក់ដុតខ្លួនប្រាណនេះ គឺដោយសារចេះមានពាក្យលេចឮដោយចោទមកលើបុររសរងគ្រោះថា «រូបគេបានចាប់ជីដូនរបស់ខ្លួនរំលោភសេពសន្ថវៈ» ។ កត្តាបែបនេះហើយទើបបុរសរងគ្រោះតូចចិត្តសម្រេចគិតខ្លីចាក់ប្រេងសាំងដុតខ្លួនប៉ងធ្វើអត្តឃាតបញ្ចប់ជីវិតតែមិនស្លាប់ គ្រាន់តែរងរបួសធ្ងន់ធ្ងរតែប៉ុណ្ណោះ ។
តាមគ្រូពេទ្យវិញបានប្រាប់ថា ដោយសារតែមានការរលាកធ្ងន់បែបនេះ ទើបរថយន្តសង្គ្រោះបន្ទាន់របស់មន្ទីរពេទ្យស្រុកត្បូងឃ្មុំបានដឹកបន្តយកមកសង្គ្រោះនៅមន្ទីរពេទ្យខេត្តកំពង់ចាមនាពេលល្ងាច តែមិនឃើញមានសាច់ញាតិណាម្នាក់នៅកំដរនោះទេ ហើយបើនិយាយពីការរលាកនោះ គឺរងផលប៉ះពាល់ធ្ងន់អាចចូល៨០ភាគរយ ស្ថិតក្នុងសភាពគ្រោះថ្នាក់ដល់អាយុជីវិតនៅឡើយ ។
លោកវរសេនីយ៍ត្រី កែវ ស៊ាងហ៊ន់ អធិការនគរបាលស្រុកព្រៃឈរ ខេត្តកំពង់ចាម ប្រាប់ឲ្យដឹងដែរថា រាល់ថ្ងៃនេះបុរសរងគ្រោះខាងលើនៅជាមួយជីដូនជីតាជរា ក្នុងភូមិសេនសុនត្បូង ឃុំស្រងែ ស្រុកព្រៃឈរ ដោយជីដូនជីតាកំពុងតែឈឺទៀត ចំណែកឪពុកម្តាយវិញបានស្លាប់ចោលអស់ហើយ នៅមានប្អូនស្រីម្នាក់រស់នៅរាជធានីភ្នំពេញ ហើយការចោទប្រកាន់មិនគប្បីនោះមិនពិតឡើយ ៕
ចែករំលែកព័តមាននេះ