ខេត្តកំពត ៖ ក្រុមចោរមិនស្គាល់មុខបានកាត់ជញ្ជាំងតូបលក់ទូរស័ព្ទដៃក្នុងផ្សារកំពង់ត្រាចលួចយកអស់ជាច្រើនគ្រឿង និងកុំព្យូទ័រ Laptop ១គ្រឿងកាលពីយប់ថ្ងៃទី០២ ខែកញ្ញា ឆ្នាំ២០១៥ ។
ខេត្តកំពត ៖ ក្រុមចោរមិនស្គាល់មុខបានកាត់ជញ្ជាំងតូបលក់ទូរស័ព្ទដៃក្នុងផ្សារកំពង់ត្រាចលួចយកអស់ជាច្រើនគ្រឿង និងកុំព្យូទ័រ Laptop ១គ្រឿងកាលពីយប់ថ្ងៃទី០២ ខែកញ្ញា ឆ្នាំ២០១៥ ។
តាមការឱ្យដឹងពីឈ្មោះ ហែម ទួន ភេទប្រុស អាយុ៣៤ឆ្នាំ ជាម្ចាស់តូបលក់ទូរស័ព្ទដៃបានឱ្យដឹងថា ជញ្ជាំងបិទបាំងតូបលក់ទូរស័ព្ទដៃត្រូវបានចោរកាត់ ហើយលូនចូលលួចយកទូរស័ព្ទដៃអស់២០គ្រឿង ដែលទូរស័ព្ទនីមួយៗមានតម្លៃពី៣០ដុល្លារទៅ៤០ដុល្លារ ។ លោកបន្តទៀតថា ទូរស័ព្ទជាច្រើនគ្រឿងចោរមិនបានយកទេ យកតែ២០គ្រឿង និងកុំព្យូទ័រ Laptop ១គ្រឿងប៉ុណ្ណោះ ។
លុះដល់ព្រឹកថ្ងៃទី០៣ ខែកញ្ញា ឆ្នាំ២០១៥ គេឃើញនគរបាលយុត្តិធម៌ចុះមកពិនិត្យដែរ តែមិនបាននិយាយអ្វីនោះទេ តែលោក ហាម បាវ ដែលមានភាគហ៊ុនភាស៊ីផ្សារកំពង់ត្រាច បាននិយាយថា បើមើលទៅជញ្ជាំងបាំងស័ង្កសីដែលចោរកាត់ចូលទៅយកទូរស័ព្ទដៃនោះ មើលទៅផ្លូវចូលតូចចង្អៀតណាស់ ហើយកូនក្មេងទេដែលលូនចូលទៅលួចនោះ ប៉ុន្តែមនុស្សចាស់ជាអ្នកនៅពីក្រោយ ។ លោកបានបន្តថា បើចាប់ក្មេងបាន ពិតជាចាប់មនុស្សចាស់នៅពីក្រោយខ្នងបានដែរហើយ ។
គេបានសម្គាល់ឃើញថា កន្លងមកនៅផ្សារកំពង់ត្រាចមានជម្លោះរវាងអាជីវករ និងភាស៊ីផ្សារមិនចេះចប់មិនចេះហើយតាំងពីមុនមកនោះ គឺលោក ហាវ បាវ អ្នកដាក់ភាគហ៊ុនភាស៊ីផ្សារបានជំទាស់ជាមួយអ្នកស្រី មូល សុធា ប្រធានភាស៊ីផ្សារ និងបានប្តឹងគ្នារហូតអ្នកស្រី មូល សុធា ត្រូវតុលាការឃុំខ្លួនជិត១០ថ្ងៃ តែក្រោយមកត្រូវសាលាដំបូងខេត្តកំពតដោះលែងវិញ ហើយអ្នកស្រី មូល សុធា ក៏បានដកភាគហ៊ុនចេញវិញ និងលាលែងពីប្រធានភាស៊ីផ្សារទៀតផង ។
តែឥឡូវនេះ លោក ហាម បាវ ក៏បានប្តឹងគ្នាជាមួយនឹងលោក ហេង ង៉ូវ អាជីវករលក់មាស-ប្តូរប្រាក់ម្តងទៀត ដោយលោក ហេង ង៉ូវ បានអះអាងថា មានស្នាមមេដៃអាជីវករផ្សារ១៤២នាក់មិនគាំទ្រលោក ហាម បាវ ជាភាស៊ីផ្សារទេ ព្រោះលោក ហាម បាវ បានកេងកឹបពីអាជីវករតភ្ជាប់បណ្តាញអគ្គិសនីពីរដ្ឋតម្លៃ១៤០០រៀលក្នុង១គីឡូវ៉ាត់លក់ឱ្យក្រុមអាជីវករ តែពលរដ្ឋប្រើប្រាស់ភ្លើងនៅក្រៅផ្សារ១គីឡូវ៉ាត់តម្លៃតែ៦០០រៀលប៉ុណ្ណោះ ។ ប៉ុន្តែក្រុមអាជីវករនៅតែទទូចសុំឱ្យអាជ្ញាធរថ្នាក់លើចុះមកវែកញែកផង ។
លោក អ៊ុំ ស៊ីណាត អភិបាលស្រុកកំពង់ត្រាច បានមានប្រសាសន៍ថា លោកឈឺក្បាលវិលមុខនឹងរឿងផ្សារកំពង់ត្រាចណាស់ ព្រោះរឿងកើតមិនចេះចប់ ។ លោកអភិបាលស្រុកបានមានប្រសាសន៍ថា លោកជុំរុញឱ្យក្រុមអ្នកដាក់ភាគហ៊ុនភាស៊ីផ្សាររួមគ្នាចែករំលែកការងារគ្នាធ្វើ ព្រោះអ្នកដាក់ភាគហ៊ុនភាស៊ីខ្លះដេកតែមើលរឿង ហើយអង្គុយចាំយកតែភាគហ៊ុន ។
លោក អ៊ុំ ស៊ីណាត មានប្រសាសន៍បន្តទៀតថា មនុស្សស្រុកកំពង់ត្រាចអីក៏ចិត្តអាក្រក់ម្ល៉េះ ដាក់ភាគហ៊ុនភាស៊ីផ្សារជាមួយគ្នាសោះ បែរជាផ្តិតមេដៃជំទាស់នឹងលោក ហាម បាវ ហើយលោក ហាម បាវ មានរឿងតែម្នាក់ឯង ៕
ចែករំលែកព័តមាននេះ