ខេត្តកណ្ដាល ៖ ក្មេងប្រុសម្នាក់បានស្លាប់បាត់បង់ជីវិតភ្លាមៗនៅនឹងកន្លែងដោយសាររន្ទះបាញ់ ខណៈពេលកំពុងជ្រកភ្លៀងនៅក្នុងរោងគោក្បែរផ្ទះរបស់ខ្លួន ដែលហេតុការណ៍នេះកើតឡើងកាលពីវេលាម៉ោង៤ល្ងាច ថ្ងៃទី០៣ ខែកញ្ញា ឆ្នាំ២០១៥ នៅក្នុងភូមិព្រៃសំរោង ឃុំទួលព្រេជ ស្រុកអង្គស្នួល ខេត្តកណ្ដាល ។
តាមប្រភពព័ត៌មានបានឲ្យដឹងថា ក្មេងប្រុសរងគ្រោះឈ្មោះ ធី រដ្ឋា អាយុ១២ឆ្នាំ មានទីលំនៅក្នុងភូមិកើតហេតុខាងលើ ។ មុនពេលកើតហេតុ មេឃបានធ្លាក់ភ្លៀងខ្លាំង និងមានផ្លេកបន្ទោរភ្លែតៗគួរឲ្យខ្លាច ខណៈនោះក្មេងប្រុសរងគ្រោះបានដេញគោឲ្យចូលក្រោល បន្ទាប់មករូបគេបានចូលទៅជ្រកភ្លៀងនៅក្នុងរោងគោនោះ ។
ប្រភពដដែលបានបន្តថា លុះមួយសន្ទុះក្រោយមកស្រាប់តែត្រូវរន្ទះបាញ់បណ្ដាលឲ្យដួលដេកទៅលើដី ដាច់ខ្យល់ស្លាប់ភ្លាមៗមួយរំពេចតែម្ដង មិនអាចជួយសង្គ្រោះបានឡើយ ។ បន្ទាប់ពីសមត្ថកិច្ចពិនិត្យសាកសពរួច ក៏បានប្រគល់ឱ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ។
ដោយឡែក នៅកន្លែងកើតហេតុគេបានពិនិត្យឃើញដើមដូង១ដើម ដែលស្ថិតនៅក្បែរនោះក៏រន្ទះបាញ់ត្រូវដែរ ចំណែកដំបូល និងសសររោងគោក៏រន្ទះបាញ់ត្រូវបណ្ដាលឲ្យធ្លុះដែរ ៕
ចែករំលែកព័តមាននេះ