ខេត្តកំពត ៖ ប្រភពព័ត៌មានជំហានដំបូងបានឱ្យដឹងថា ការពីយប់ថ្ងៃទី០២ កញ្ញា ២០១៥ មានចោរកាត់រនាំងស័ង្កសីតូបលក់ទូរស័ព្ទដៃមួយកន្លែងក្នុងផ្សារកំពង់ត្រាច ស្ថិតក្នុងស្រុកកំពង់ត្រាច ខេត្តកំពត ដោយលួចយកទូរស័ព្ទដៃល្អៗដែលមានតម្លៃពី៣០ដុល្លារទៅ៤០ដុល្លារអស់ប្រមាណជា២០គ្រឿង និងកុំព្យូទ័រ Laptop មួយគ្រឿង ។
ម្ចាស់តូបដែលត្រូវចោរលួចនេះមានឈ្មោះ ហែម ទួន ភេទប្រុស អាយុ៣៤ឆ្នាំ រស់នៅភូមិកំពង់ត្រាច១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត ។
ប្រធានផ្សារកំពង់ត្រាចបានអះអាងថា លោកបានស្នើឱ្យម្ចាស់តូបធ្វើរបាយការណ៍ពីការខាតបង់មកឱ្យខាងផ្សារ ដើម្បីខាងផ្សារធ្វើការស្រាវជ្រាវ ព្រោះថាប្រហោងដែលកាត់ចូលនោះមានទំហំតូច ល្មមនឹងក្មេងចូលប៉ុណ្ណោះ ប្រហែលជាក្មេងជាអ្នកចូល ហើយអ្នកធំជាឈរចាំខាងក្រៅ ។
ពេលនេះសមត្ថកិច្ចកំពុងធ្វើការស្រាវជ្រាវដើម្បីស្វែងរកចាប់ខ្លួនជនសង្ស័យដែលបានកាត់ស័ង្កសីចូលលួចទូរស័ព្ទនេះ ៕
ព័ត៌មានលម្អិតនឹងផ្សាយជូននៅពេលក្រោយ និងនៅលើកាសែតកោះសន្តិភាព
ចែករំលែកព័តមាននេះ