ខេត្តកំពង់ធំ ៖ មានការភ្ញាក់ផ្អើលមួយបានកើតឡើងកាលពីវេលាម៉ោង៥ និង៣០នាទីល្ងាច ថ្ងៃទី២៩ សីហា ២០១៥ នៅចំណុចស្នាក់ការសង្កាត់រដ្ឋបាលព្រៃឈើក្រយា ស្រុកសន្ទុក ខេត្តកំពង់ធំ
ខេត្តកំពង់ធំ ៖ មានការភ្ញាក់ផ្អើលមួយបានកើតឡើងកាលពីវេលាម៉ោង៥ និង៣០នាទីល្ងាច ថ្ងៃទី២៩ សីហា ២០១៥ នៅចំណុចស្នាក់ការសង្កាត់រដ្ឋបាលព្រៃឈើក្រយា ស្រុកសន្ទុក ខេត្តកំពង់ធំ ដោយសារតែប្រជាពលរដ្ឋចំនួន៣០នាក់មកពីឃុំបាក់ស្នា ស្រុកបារាយណ៍ ប្រដាប់ដោយកាំបិត ដំបង បាននាំគ្នាសម្រុកចូលកាត់សោស្នាក់ការសង្កាត់រដ្ឋបាលព្រៃឈើក្រយា ដើម្បីរំដោះយកគោយន្ត និងរ៉ឺម៉ក ដែលមេព្រៃចាប់បានកាលពីថ្ងៃ ។
ទាក់ទិនករណីខាងលើនេះ សមត្ថកិច្ចនគរបាល នៃអធិការដ្ឋាននគរបាលស្រុកសន្ទុកបានឲ្យដឹងថា ហេតុការណ៍នេះបានកើតឡើងគឺដោយសារតែកាលពីរសៀលថ្ងៃទី២៩ សីហា ២០១៥ ខាងរដ្ឋបាលព្រៃឈើបានចាប់ឃាត់គោយន្ត៣គ្រឿង និងរ៉ឺម៉ក៣គ្រឿង នៅចំណុចអូរកំពប់អំបិល ខណៈដែលប្រជាពលរដ្ឋធ្វើសកម្មភាពចូលកាប់អុស និងកូនឈើក្នុងព្រៃអង់តែន ដែលជាព្រៃបម្រុងទុក ហើយបានយកវត្ថុតាងទាំងអស់នោះរក្សាទុកក្នុងស្នាក់ការរដ្ឋបាលព្រៃឈើសង្កាត់ក្រយា រហូតដល់ពេលល្ងាចស្រាប់តែក្រុមប្រជាពលរដ្ឋប្រដាប់ដោយកាំបិត ដំបង សម្រុកចូលទៅកាត់សោរបងស្នាក់ការ និងវាយកម្ទេចសម្ភារក្នុងស្នាក់ការជាច្រើន រួចក៏បានរំដោះយកគោយន្ត៣គ្រឿង និងរ៉ឺម៉ក៣គ្រឿងវិញ ។ ភ្លាមៗនោះដោយមានអន្តរាគមន៍ពីសមត្ថកិច្ចក៏បានឃាត់ខ្លួនប្រជាពលរដ្ឋ២នាក់ និងដកហូតវត្ថុតាងយកមកវិញ ។
ពាក់ព័ន្ធហេតុការណ៍ខាងលើ មន្ត្រីសង្កាត់ និងផ្នែករដ្ឋបាលព្រៃឈើ បានឲ្យដឹងថា កន្លងមកប្រជាពលរដ្ឋមិនថាមកពីស្រុកបារាយណ៍ ឬសន្ទុកទេ ពួកគាត់តែងតែចូលកាប់អុស និងកូនឈើក្នុងព្រៃអង់តែន ដែលជាព្រៃហាមឃាត់ជារៀងរាល់ថ្ងៃ ជាក់ស្ដែងក្នុងថ្ងៃកើតហេតុប្រជាពលរដ្ឋ៤-៥នាក់បានចូលកាប់អុស និងកូនឈើក្នុងព្រៃ និងបានដឹកចេញមកភូមិ តែត្រូវសមត្ថកិច្ចឃាត់ចាប់បានគោយន្ត៣គ្រឿង និងរ៉ឺម៉ក៣គ្រឿង ។
ជារឿយៗមន្ត្រីជំនាញតែងតែធ្វើការផ្សព្វផ្សាយពីច្បាប់ព្រៃឈើ និងហាមឃាត់ មិនអនុញ្ញាតឲ្យមានការកាប់ព្រៃរានដីនៅម្ដុំព្រៃអង់តែនយកធ្វើកម្មសិទ្ធិឡើយ ប៉ុន្តែពួកគាត់អាចអាស្រ័យផលក្នុងព្រៃសហគមន៍បាន ដល់មានការឃាត់ចាប់តែងតែប្រើរូបភាពលើកគ្នីគ្នាមកគំរាមសមត្ថកិច្ចរំដោះយកវត្ថុតាងវិញ ។ នេះមិនមែនលើកទី១នោះទេ គឺឲ្យតែមានករណីឃាត់ចាប់គោយន្ត គឺប្រជាពលរដ្ឋកែនគ្នាមានកាំបិត ពូថៅ ដំបង មកយកវិញ ហើយពួកគាត់មិនហ៊ាននៅយូរទេ ។
ដោយឡែក ជាមួយសកម្មភាពនេះដែរ ប្រជាពលរដ្ឋដែលធ្វើសកម្មភាពដឹកអុស និងកូនឈើបាននិយាយថា ពួកគាត់គ្មានមុខរបរ ទើបនាំគ្នាកាប់អុស ដឹកអុសលក់ ប៉ុន្តែត្រូវបានមេព្រៃឃាត់ចាប់ជាញឹកញាប់ ។ ចំណែកព្រៃសហគមន៍វិញប្រជាពលរដ្ឋខ្លះកាប់រានយកដីធ្វើកម្មសិទ្ធិរៀងៗខ្លួនអស់ហើយ ។
ទោះយ៉ាងណាសកម្មភាពនៃការលើកគ្នាសម្រុកចូលកាត់សោរបងស្នាក់ការរំដោះយកគោយន្ត និងរ៉ឺម៉កនេះមិនបង្កឲ្យមានគ្រោះថ្នាក់នោះឡើយ គឺគ្រាន់តែមានការឃាត់ខ្លួនមនុស្ស២នាក់យកមកសាកសួរតែប៉ុណ្ណោះ ៕
ចែករំលែកព័តមាននេះ