ខេត្តសៀមរាប ៖ កម្លាំងនគរបាលការិយាល័យប្រឆាំងគ្រឿងញៀ.នខេត្ត សហការជាមួយកម្លាំងនគរបាលអធិការដ្ឋានស្រុកបន្ទាយស្រី និងកម្លាំងនគរបាលប៉ុស្តិ៍រដ្ឋបាលសង្កាត់ស្វាយដង្គំ ឃាត់ខ្លួនជនសង្ស័យចំនួន១៧នាក់
ខេត្តសៀមរាប ៖ កម្លាំងនគរបាលការិយាល័យប្រឆាំងគ្រឿងញៀនខេត្ត សហការជាមួយកម្លាំងនគរបាលអធិការដ្ឋានស្រុកបន្ទាយស្រី និងកម្លាំងនគរបាលប៉ុស្តិ៍រដ្ឋបាលសង្កាត់ស្វាយដង្គំ ឃាត់ខ្លួនជនសង្ស័យចំនួន១៧នាក់ និងវត្ថុតាងបានជាបន្តបន្ទាប់នៅកន្លែង៣ផ្សេងគ្នា ពាក់ព័ន្ធទៅនឹងករណីជួញដូរ និងប្រើប្រាស់នូវសារធាតុញៀន ដើម្បីកសាងសំណុំរឿងបញ្ជូនទៅតុលាការចាត់ការតាមនិតិវិធីច្បាប់ ។
ហេតុការណ៍ប្រតិបត្តិការបង្ក្រាបករណីគ្រឿងញៀនរហូតឈានដល់ធ្វើការឃាត់ខ្លួនជនសង្ស័យទាំង១៧នាក់នេះធ្វើឡើងនៅថ្ងែទី២៨ ខែសីហា ឆ្នាំ២០១៥ ស្ថិតនៅក្នុងសង្កាត់ស្វាយដង្គំ និងភូមិឈូកសរ ឃុំឃុនរាម ស្រុកបន្ទាយស្រី ខេត្តសៀមរាប ខណៈពួកគេកំពុងចែកចាយ និងប្រើប្រាស់គ្រឿងញៀន ។
លោកវរសេនីយទោ អ៊ុំ សាអាត នាយការិយាល័យប្រឆាំងបទល្មើសគ្រឿងញៀនខេត្តបានប្រាប់ឱ្យដឹងថា ក្រោយពីធ្វើការឃាត់ខ្លួនបានជនសង្ស័យចំនួន១៧នាក់នៅកន្លែងផ្សេងគ្នា ក្នុងនោះ១៣នាក់ជាកម្មករ ឃាត់ខ្លួននៅក្នុងសិប្បកម្មឡឥដ្ឋ ក្នុងស្រុកបន្ទាយស្រី និង៤នាក់ទៀតឃាត់ខ្លួននៅក្នុងសង្កាត់ស្វាយដង្គំ រួចនាំមកកាន់ការិយាល័យដើម្បីធ្វើការសាកសួរ ព្រមទាំងដកហូតបានវត្ថុតាងរួមមាន ម្ស៉ៅមេតំហ្វេតាមីនចំនួន៨កញ្ចប់ មានទម្ងន់២,៨១ក្រាម, ម៉ូតូ១គ្រឿង, កាំភ្លើងខ្យល់បាញ់គ្រាប់កង់១ដើម, កាំបិតប្រវែង៥៥មីលីម៉ែត្រ១, ទូរស័ព្ទដៃ១០គ្រឿង ព្រមទាំងឧបករណ៍កែច្នៃសម្រាប់ជក់មួយចំនួនធំ ។
បច្ចុប្បន្នជនសង្ស័យទាំង១៧នាក់ និងវត្ថុតាងត្រូវបានកម្លាំងជំនាញបញ្ជូនទៅតុលាការនៅព្រឹកថ្ងៃទី៣០ ខែសីហាឆ្នាំ២០១៥ ដើម្បីចាត់ការតាមច្បាប់ ។
ព័ត៌មានលម្អិតនឹងមានផ្សាយជូននៅលើកាសែតកោះសន្តិភាព
ចែករំលែកព័តមាននេះ