រាជធានីភ្នំពេញ ៖ នគរបាលខណ្ឌសែនសុខស្រាវជ្រាវ និងចាប់ខ្លួនជនសង្ស័យលួចស្លាកលេខឡានបានម្នាក់បន្ថែមទៀត កាលពីវេលាម៉ោង១១ និង១៥នាទីព្រឹក ថ្ងៃទី២៨ សីហា ២០១៥ នៅចំណុចរង្វង់មូលខាំកូស៊ីធី ស្ថិតក្នុងសង្កាត់ទួលសង្កែ ខណ្ឌឫស្សីកែវ រហូតឈានទៅដកហូតរថយន្តកាមរីឆ្លាម១គ្រឿង ពាក់ស្លាកលេខ ភ្នំពេញ 2D-0515 នៅវេលាម៉ោង៤ និង៣៥នាទីមុននេះបន្តិច ដែលជនសង្ស័យប្លុងចោល ។
សមត្ថកិច្ចបានឱ្យដឹងថា ជនសង្ស័យលួចស្លាកលេខឡានដែលត្រូវសមត្ថកិច្ចចាប់ខ្លួនបាននេះមានឈ្មោះ កុយ ពៅ ដែលគេស្គាល់ថា ឌីជេ ក្លឹង អាយុ៣០ឆ្នាំ រស់នៅភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ ។ សមត្ថកិច្ចបន្តទៀតថា ការឈានទៅចាប់ជនសង្ស័យរូបនេះគឺសមត្ថកិច្ចប្រើយុទ្ធសាស្ត្រអូសទាញ ដោយរកទិញស្លាកលេខរថយន្តពីជនសង្ស័យ និងឈានទៅឃាត់ខ្លួនតែម្តង ។
គួរបញ្ជាក់ផងដែរថា រឿង កេងលុយពីប្រពន្ធទិញរថយន្តអត់ពន្ធ ទីបំផុតជាប់ចោទពីបទលួចស្លាកលេខ រហូតមកទល់ពេលនេះសមត្ថកិច្ចស្រាវជ្រាវ និងឈានទៅចាប់ខ្លួនម្ចាស់យានដ្ឋានម្នាក់ និងជនសង្ស័យលួចស្លាកលេខរថយន្ត៤នាក់ហើយ ៕
ចែករំលែកព័តមាននេះ