រាជធានីភ្នំពេញ ៖ នៅវេលាល្ងាចថ្ងៃទី២៦ ខែសីហា ឆ្នាំ២០១៥នេះ កម្លាំងអាជ្ញាធរចម្រុះខណ្ឌមានជ័យ ដឹកនាំដោយលោក ឌី រ័ត្នខេមរុណ អភិបាលរងខណ្ឌ ដោយមានការសម្របសម្រួលពីព្រះរាជអាជ្ញារងអមសាលាដំបូងរាជធានីភ្នំពេញ
រាជធានីភ្នំពេញ ៖ នៅវេលាល្ងាចថ្ងៃទី២៦ ខែសីហា ឆ្នាំ២០១៥នេះ កម្លាំងអាជ្ញាធរចម្រុះខណ្ឌមានជ័យ ដឹកនាំដោយលោក ឌី រ័ត្នខេមរុណ អភិបាលរងខណ្ឌ ដោយមានការសម្របសម្រួលពីព្រះរាជអាជ្ញារងអមសាលាដំបូងរាជធានីភ្នំពេញ លោក ខាំ សុផារី បានចុះបង្ក្រាបទីតាំងលួចលាក់បង្កប់ហ្គេមបាញ់ត្រីខុសច្បាប់មួយកន្លែងនៅចំណុចផ្ទះឈើ ស្ថិតក្នុងភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ ឃាត់ខ្លួនមនុស្ស៣នាក់ (ប្រុសម្នាក់) ។
លោក ឌី រ័ត្នខេមរុណ បានឱ្យដឹងថា ដោយអនុវត្តទៅតាមបញ្ជារបស់លោក ពេជ្រ កែវមុនី អភិបាល នៃគណៈអភិបាលខណ្ឌមានជ័យ និងជាប្រធានគណៈបញ្ជាការខណ្ឌ ដែលលោកតែងតែធ្វើការក្រើនរំលឹកជារឿយៗដល់មន្ត្រីក្រោមឱវាទគ្រប់ជាន់ថ្នាក់ ធ្វើយ៉ាងណាត្រូវយកចិត្តទុកដាក់ខ្ពស់ចំពោះបញ្ហាបទល្មើស ក៏ដូចជាល្បែងស៊ីសងផ្សេងៗគ្រប់រូបភាពទាំងអស់ ដែលកំពុងកើតមាននៅមូលដ្ឋានរបស់ខ្លួន ធ្វើយ៉ាងណាត្រូវធ្វើការបង្ក្រាប ក៏ដូចជាទប់ស្កាត់ឱ្យបាន ដោយមិនបណ្តែតបណ្តោយឱ្យកើតមានជាដាច់ខាត ជាពិសេសប្រភេទហ្គេមបាញ់ត្រីខុសច្បាប់ខាងលើតែម្តង ។ ទើបរហូតមកទល់វេលាល្ងាចថ្ងៃទី២៦ សីហានេះ ដោយបានស្រាវជ្រាវស៊ើបដឹងពីទីតាំងលួចលាក់បើកហ្គេមបាញ់ត្រីមួយនេះហើយនោះ អាជ្ញាធរខណ្ឌមានជ័យ ដោយមានការឯកភាពពីព្រះរាជអាជ្ញាររងអមសាលាដំបូងរាជធានី បានចុះបង្ក្រាបបានជាក់ស្តែងតែម្តង ។
ក្នុងការចុះបង្ក្រាបខាងលើនេះ អាជ្ញាធរបានដកហូតបានទូហ្គេមបាញ់ត្រី១គ្រឿង ដាវសាំមូរ៉ៃ១ដើម និងធ្វើការឃាត់ខ្លួនមនុស្សចំនួន៣នាក់ (ប្រុសម្នាក់) ជាអ្នកមើលការខុសត្រូវនៅទីនោះ ។ ក្រោយឃាត់ខ្លួនភ្លាមៗ ពួកគេទាំង៣នាក់ និងវត្ថុតាងត្រូវបាននាំយកទៅកាន់សាលាខណ្ឌមានជ័យ ដើម្បីធ្វើការសាកសួរបន្ថែម ។
គួរបញ្ជាក់ថា កន្លងមកជារឿយៗ លោក ឌី រ័ត្នខេមរុណ អភិបាលរងខណ្ឌមាណជ័យ តែងតែដឹកនាំកម្លាំងចម្រុះចុះទប់ស្កាត់ ក៏ដូចជាបង្ក្រាបបទល្មើសខុសច្បាប់ជាក់ស្តែងបានជាច្រើនករណី មិនថានៅពេលយប់ ឬពេលថ្ងៃនោះទេ រាល់សកម្មភាពអសន្តិសុខ និងល្មើសច្បាប់ឱ្យតែកើតមាននៅក្នុងមូលដ្ឋាន គឺលោកអភិបាលរងមិនដែលព្រងើយកន្តើយ បណ្តែតបណ្តោយឱ្យកើតមានឡើងជាដាច់ខាត ។ លោកអភិបាលរងបានបញ្ជាក់ថា រាល់សកម្មភាពរបស់អាជ្ញាធរមូលដ្ឋាន ថ្នាក់សង្កាត់ ខណ្ឌ កម្លាំងនគរបាល កម្លាំងកងរាជអាវុធហត្ថខណ្ឌ គឺធ្វើឡើងក្នុងគោលដៅមួយសំដៅទៅរកភាពសុខុដុមរម្យនាជូនដល់បងប្អូនប្រជាពលរដ្ឋ ហើយអាជ្ញាធរយើងនឹងខិតខំប្រឹងប្រែងក្នុងការការពារ ក៏ដូចជាគិតគូរពីសុខទុក្ខរបស់បងប្អូនប្រជាពលរដ្ឋក្នុងមូលដ្ឋានជានិច្ច ឱ្យរស់នៅបានប្រកបទៅដោយសន្តិសុខ សុវត្ថិភាព ជានិរន្តទៅថ្ងៃមុខ ៕
ចែករំលែកព័តមាននេះ