រាជធានីភ្នំពេញ ៖ បុរសម្នាក់ទើបតែជិះម៉ូតូចេញពីផឹកស៊ីក្នុងក្លិបកម្សាន្តមួយ ហើយបំរុងទៅផឹកស៊ីបន្តនៅក្នុងក្លិបមួយទៀតត្រូវក្រុមចោរប្លន់៦នាក់ ជិះម៉ូតូ២គ្រឿងយកដាវមួយដើមកាប់ប្លន់ម៉ូតូតែមិនបានសម្រេចដោយសារម៉ូតូរបស់បុរសរងគ្រោះដាក់កុងតាក់បើកទៅមុខមិនបាន។
ហេតុការណ៍នេះបានកើតឡើងកាលពីវេលាម៉ោង១២ និង១០នាទីយប់ពាក់កណ្ដាលអធ្រាត្រ ឈានចូលថ្ងៃទី២៦ សីហា ២០១៥ ត្រង់ចំណុចមុខវិទ្យាល័យវត្តកោះតាមបណ្ដោយផ្លូវ១៧៤ សង្កាត់បឹងរាំង ខណ្ឌដូនពេញ ។
បុរសរងគ្រោះខាងលើឈ្មោះ ម៉ៅ ពិទូ អាយុ២៩ឆ្នាំ មុខរបរជាអ្នកចាក់ភ្លេង រស់នៅក្នុងសង្កាត់ ចាក់អង្រែលើ ខណ្ឌមានជ័យ ។
យោងទៅតាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គាត់ជិះម៉ូតូម៉ាកស្គូពីពណ៌ស លាយផ្កាឈូក ពាក់ស្លាកលេខភ្នំពេញ 1BS-0821 ចេញពីក្លិបមួយនៅម៉ាម្ដុំទួលគោក ពេលជិះមកតាមផ្លូវ ១៧៤ ក្នុងទិសដៅពីជើងទៅត្បូង ជិតដល់ ក្លិប អៅ វិត តា ដែលគាត់ចង់ទៅហើយ ស្រាប់តែលេចមុខក្រុមចោរប្លន់៦នាក់ ជិះម៉ូតូ២គ្រឿង មួយគ្រឿង ម៉ាក MSX មួយគ្រឿងទៀតម៉ាក ហុងដាឌ្រីម សេ១២៥ យកដាវមួយដើម ជិះមកពីក្រោយកាប់ត្រូវខ្នងបុរសរងគ្រោះខាងលើប្លន់ម៉ូតូបានសម្រេច តែដោយសារម៉ូតូរបស់បុរសរងគ្រោះដាក់កុងតាក់ទើបបើកទៅមិនបាន ជនសង្ស័យក៏បណ្ដើរតាមផ្លូវត្រូវបុរសរងគ្រោះស្រែកថាចោរ ។
ខណៈនោះក្រុមចោរភ័យក៏ផ្តួលម៉ូតូចោលរត់ឡើងម៉ូតូរបស់បក្សពួកជិះគេចយករួចខ្លួនទៅបាត់អស់ ។ ក្រោយពេលកើតហេតុ ជនរងគ្រោះខាងលើបានទៅដាក់ពាក្យបណ្ដឹងនៅប៉ុស្ពិ៍នគរបាលបឹងរាំង ដើម្បីឱ្យសមត្ថកិច្ចស្រាវជ្រាវចាប់មុខសញ្ញាក្រុមចោរប្លន់ខាងលើយកមកចាត់ការទៅតាមច្បាប់ ៕
ចែករំលែកព័តមាននេះ