ខេត្តស្វាយរៀង ៖ ប្រុសស្រីពីរនាក់ត្រូវបានសមត្ថកិច្ចចាប់ខ្លួនពីបទក្លែងបន្លំឯកសាធារណៈ មូលហេតុទិញម៉ូតូចោរលួចកាច់កយកមកលក់ឱ្យ រួចយកប័ណ្ណសំគាល់យានយន្ត(កាតគ្រី) មកកោសលុប ហើយស្គេនលេខតួ-លេខម៉ាស៊ីន
ខេត្តស្វាយរៀង ៖ ប្រុសស្រីពីរនាក់ត្រូវបានសមត្ថកិច្ចចាប់ខ្លួនពីបទក្លែងបន្លំឯកសាធារណៈ មូលហេតុទិញម៉ូតូចោរលួចកាច់កយកមកលក់ឱ្យ រួចយកប័ណ្ណសំគាល់យានយន្ត(កាតគ្រី) មកកោសលុប ហើយស្គេនលេខតួ-លេខម៉ាស៊ីនចូលក្នុងកាតគ្រី ដើម្បីក្លែងឯកសារ ។ ករណីនេះបានឡើងកាលពីថ្ងៃទី២៤ ខែសីហា ឆ្នាំ២០១៥ វេលាម៉ោង២ និង៣០នាទីរសៀល នៅចំណុចមុខក្លោងទ្វារវត្តខ្ជាយ ស្ថិតនៅភូមិទន្លៀង ឃុំរមាំងថ្កោល ស្រុកស្វាយទាប ខេត្តស្វាយរៀង ។
បើតាមមន្ត្រីកងរាជអាវុធហត្ថបានឱ្យដឹងថា ជនសង្ស័យទីមួយឈ្មោះ ប៉ែន រ៉ន ភេទប្រុស អាយុ៤៨ឆ្នាំ មានទីលំនៅភូមិតែងម៉ៅ ឃុំចន្ទ្រា ស្រុកចន្ទ្រា បានយកម៉ូតូម៉ាកហុងដា សេ១២៥ ស៊េរីឆ្នាំ២០១៣ ព៌ណខ្មៅ ពាក់ស្លាក់លេខ ភ្នំពេញ 1BL-0286 ចំនួន១គ្រឿងមកដាក់លក់នៅកន្លែងកើតហេតុខាងលើ ។
ក្រោយពីឃាត់ខ្លួនជនសង្ស័យខាងលើបានឆ្លើយសារភាពថា ខ្លួនបានទទួលម៉ូតូនេះពីឈ្មោះ ពៅ ផាន ភេទស្រី អាយុ៣៩ឆ្នាំ រស់នៅក្នុងភូមិជប់ ឃុំកណ្តៀងរាយ ស្រុកស្វាយទាប ដែលពឹងឱ្យខ្លួនលក់ម៉ូតូនេះក្នុងតម្លៃ១២៨០ដុល្លារ ។ ហើយក្រោយពីដាក់លក់រួចមក ក៏មានអ្នកមកសួរទិញ តែពេលអ្នកទិញបានពិនិត្យម៉ូតូ និងកាតគ្រី ឃើញកោសលុបក៏បានប្តឹងកងរាជអាវុធហត្ថធ្វើការចាប់ខ្លួនតែម្តង ។
ប្រភពដដែលបន្តទៀតថា ក្រោយពីធ្វើការសាកសួរជនសង្ស័យឈ្មោះ ប៉ែន រ៉ន នេះរួចមក ក៏ឈានដល់ចាប់ខ្លួនជនសង្ស័យទីពីរ ឈ្មោះ ពៅ ផាន នៅនឹងផ្ទះតែម្តង ។
ក្រោយពីឃាត់ខ្លួនជនសង្ស័យឈ្មោះ ពៅ ផាន បានសារភាពថា ខ្លួនបានទទួលម៉ូតូនេះពីឈ្មោះ សំ សារ៉ាន់ ហៅជាងរ៉ាន់ ភេទប្រុស អាយុ៣៥ឆ្នាំ មុខរបរជាងជួសជុលម៉ូតូ មានទីលំនៅភូមិព្រៃស្ទៀង ឃុំស្វាយតាយាន ស្រុកកំពង់រោទិ៍ ខេត្តស្វាយរៀង ដែលបានលួចកាត់សោ.កម៉ូតូ ហើយយកកាតគ្រីម៉ូតូផ្សេងទៀតមកកោសលុប ហើយស្គេនលេខតួ លេខម៉ាស៊ីន ដាក់ចូលក្នុងកាតគ្រីឱ្យខ្លួនយកមកដាក់លក់ ហើយខ្លួនក៏បានឱ្យឈ្មោះ ប៉ែន រ៉ន មកលក់បន្តទៀត ។
សមត្ថកិច្ចបន្តទៀតថា កងកម្លាំងរាជអាវុធហត្ថបានចុះទៅដល់ផ្ទះរបស់ឈ្មោះ សំ សារ៉ាន់ តែពេលទៅដល់ឈ្មោះ សំ សារ៉ាន់ និងប្រពន្ធបានបិទទ្វារផ្ទះរត់គេចខ្លួនបាត់ស្រមោល ។
បច្ចុប្បន្នសមត្ថកិច្ចបានកងសាងសំណុំរឿងបញ្ជូនជនសង្ស័យឈ្មោះ ប៉ែន រ៉ន និង ពៅ ផាន ទៅកាន់សាលាដំបូងខេត្តស្វាយរៀង ដើម្បីចាត់ការតាមផ្លូវច្បាប់ និងចេញដីការឃុំខ្លួនបណ្តោះអាសន្ននៅពន្ធធានាគារខេត្តនៅថ្ងៃទី២៥ ខែសីហា ឆ្នាំ២០១៥ វេលាម៉ោង៥ល្ងាច ៕
ចែករំលែកព័តមាននេះ