យកសក់ និងរោមសត្វបឺតស្រូបយកកំណកប្រេងក្នុងឈូងសមុទ្រ
ដោយ ៖ សាម៉ន
ថ្ងៃព្រហស្បត្ត៏ ទី២០ ខែឧសភា ឆ្នាំ២០១០ ម៉ោង ១៣:១៩
គេហទំព័របរទេស
កំណកប្រេងនៅឈូងសមុទ្រម៉ិចស៊ិក
ការបំផុសចលនាស្វែងរកជាងកាត់សក់ជាងកាត់តុបតែងរោមសត្វ និងកសិករនៅទូទាំងពិភពលោកឱ្យចូលរួមប្រមូលយកសក់របស់មនុស្ស និងរោមសត្វ ដើម្បីយកមកបឺតយកកំណកប្រេងនៅក្នុងឈូងសមុទ្រម៉ិចស៊ិក។ សក់មនុស្ស និងរោមសត្វត្រូវយកទៅច្រកទុកនៅក្នុងស្បោងនីឡុងសំរាប់ជួយបឺតស្រូបយកកំណកប្រេងដែលផុសចេញពីទឹកក្រោយពីមានការផ្ទុះឧបករណ៍បូមប្រេងរបស់ក្រុមហ៊ុន BP អង់គ្លេសនៅបរិវេណ ខាងក្រៅឆ្នេរសមុទ្រក្នុងរដ្ឋល្វីស៊ីណា សហរដ្ឋអាមេរិក ជាហេតុធ្វើឱ្យប្រេងលេចចេញក្នុងអត្រា៥.០០០ធុងក្នុងមួយថ្ងៃគិតចាប់តាំងពីថ្ងៃទី២០ មេសា មក ។
មូលនិធិម៉េតធ័រ អហ្វត្រាស់ ដែលជាអ្នកសហការដ៏ចម្បងក្នុងគំរោងការសហប្រតិបត្ដិការនេះឱ្យដឹងថា មានហាងកាត់សក់ចូលរួមប្រហែល៣៧០.០០០ហាងនៅក្នុងប្រទេសបារាំង អង់គ្លេស អេស្ប៉ាញ ប្រេស៊ីល អូស្ដ្រាលី កាណាដា និងសហរដ្ឋអាមេរិក ដោយទទួលបានសក់ និងរោមសត្វក្នុងមួយថ្ងៃ ២០៤.០០០គីឡូក្រាម ខណៈពេលមាន អ្នកស្ម័គ្រចិត្ដបានបន្ដចុះឈ្មោះសំរាប់ចូលរួមក្នុងគំរោងការជួយសង្គ្រោះនៅគ្រប់ពេល ។
លោកលីសា ហ្គូធីយែរ៍ អ្នកចូលរួមបង្កើតមូលនិធិ“ម៉េតធ័រ អហ្វត្រាស់” បានគូសបញ្ជាក់ថា សក់ គឺជាវត្ថុដ៏ល្អក្នុងការបឺតស្រូបប្រេងគ្រប់ប្រភេទដែលមាននៅក្នុងទឹក ។
អ្នកស្ម័គ្រចិត្ដបានជួយគ្នាច្រកសក់ និងរោមសត្វចូលទៅក្នុងស្បោងនីឡុងនៅក្នុងឃ្លាំងចំនួន១៥នៅក្បែរតំបន់គ្រោះថ្នាក់ ដោយស្បោងច្រកសក់ទាំងនេះត្រូវយកទៅដាក់ពីលើឆ្នេរខ្សាច់ដើម្បីស្រូបយកកំណកប្រេងដែលរសាត់មកទើរនៅទីនោះ ៕
