រាជធានីភ្នំពេញ ៖ តាមសេចក្តីរាយការណ៍បានឱ្យដឹងថា នៅព្រឹកថ្ងៃទី៥ សីហា នេះ មេប៉ុស្តិ៍ និងចៅសង្កាត់ប្ញស្សីកែវនឹងធ្វើសន្និសីទកាសែតបង្ហាញមុខជនសង្ស័យ២នាក់ដែលបានធ្វើសកម្មភាពលួចស្លាកលេខរថយន្ត ហើយត្រូវសមត្ថកិច្ចចាប់ខ្លួនកាលពីរំលងអធ្រាត្រឈានចូលថ្ងៃទី៣ សីហា ថ្មីៗនេះ។
គួរបញ្ជាក់ថា ជនសង្ស័យទាំង២នាក់ដែលនឹងត្រូវបង្ហាញមុខនេះ ម្នាក់ឈ្មោះធីវ សុភ័ក្ត្រ អាយុ៣៤ឆ្នាំ និងម្នាក់ទៀតឈ្មោះហេង សុភ័ណ អាយុ៣៦ឆ្នាំ មានលំនៅភូមិផ្សារតូច សង្កាត់ទួលសង្កែ ខណ្ឌប្ញស្សីកែវ។
ជនសង្ស័យត្រូវសមត្ថកិច្ចឃាត់ខ្លួន បន្ទាប់ពីធ្វើសកម្មភាពលួចស្លាកលេខរថយន្ត CRV ដែលមានលេខភ្នំពេញ ២AB៣៦៦២ នៅចំណុចផ្ទះលេខ៧១៨ ភូមិបឹងសាឡាង សង្កាត់ប្ញស្សីកែវ។ បន្ទាប់ពី ឃាត់ខ្លួនជនសង្ស័យ សមត្ថកិច្ចបានស្រាវជ្រាវដកហូតបានស្លាកលេខចំនួន៣ទៀត គឺ ភ្នំពេញ២Z៤៦៧២, ភ្នំពេញ២AC៥១៩៨ និងភ្នំពេញ២AB៣៤០៧៕
ចែករំលែកព័តមាននេះ