រាជធានីភ្នំពេញ ៖ ហេតុកាណ៍នៃអំពើហិ.ង្សាបានកើតឡើងនៅក្នុងគ្រួសារមួយ កាលពីវេលាម៉ោង១និង១៥នាទីរសៀលថ្ងៃទី២៨ កក្កដា ស្ថិតនៅក្នុងភូមិព្រែកតានូ សង្កាត់ចាក់អង្រែលើ ខណ្ឌមានជ័យ ដោយសារស្ត្រីជាប្រពន្ធរអ៊ូរទាំប្រចណ្ឌប្តី
រាជធានីភ្នំពេញ ៖ ហេតុកាណ៍នៃអំពើហិង្សាបានកើតឡើងនៅក្នុងគ្រួសារមួយ កាលពីវេលាម៉ោង១និង១៥នាទីរសៀលថ្ងៃទី២៨ កក្កដា ស្ថិតនៅក្នុងភូមិព្រែកតានូ សង្កាត់ចាក់អង្រែលើ ខណ្ឌមានជ័យ ដោយសារស្ត្រីជាប្រពន្ធរអ៊ូរទាំប្រចណ្ឌប្តី ហើយត្រូវប្តីទាញញញួរគំរាមវាយ ប្រពន្ធភ័យក៏លោតពីលើផ្ទះបណ្តាលឱ្យរងរបួស ។
ក្រោយពេលកើតហេតុភ្លាមៗ សមត្ថកិច្ចនគរបាលមូលដ្ឋាន បានចុះទៅអន្តរាគមន៍ដល់កន្លែងកើតហេតុ ដោយនាំបុរសជាប្តីមកប៉ុស្តិ៍នគរបាលរដ្ឋបាលសង្កាត់ចាក់អង្រែលើ ដើម្បីសួរនាំ និងរៀបចំសំណុំរឿងចាត់ការតាមផ្លូវច្បាប់ ។ ចំណែកស្ត្រីជាប្រពន្ធ ត្រូវបានសមត្ថកិច្ចជួយសង្គ្រោះដោយបញ្ចូនទៅកាន់មន្ទីរពេទ្យ ដើម្បីព្យាបាលរបួស ។
បន្ទាប់ពីកើតហេតុការណ៍ ស្ត្រីជាប្រពន្ធមិនបានដាក់ពាក្យប្តឹងប្តីនោះទេ ដោយសុំទៅសមត្ថកិច្ចថា មិនឱ្យកសាងសំណុំរឿងចាប់ឃាត់ខ្លួនប្តីគាត់ឡើយ ពីព្រោះរឿងហេតុកើតឡើងដោយសារតែរូបគាត់ជាប្រពន្ធប្រចណ្ឌប្តីខ្លាំងពេក ។
ទោះបីជាយ៉ាងណាក្តី ដោយសារមានការសម្របសម្រួលគ្នារវាងប្តីប្រពន្ធទាំង២នាក់នេះ សមត្ថកិច្ចក៏មិនបានកសាងសំណុំរឿងដើម្បីចាត់ការតាមផ្លូវច្បាប់ឡើយ ហើយក៏បានអនុញ្ញាតឱ្យពួកគេវិលត្រឡប់ទៅលំនៅឋានវិញ បន្ទាប់ពីធ្វើការអប់រំណែនាំឱ្យឈប់ប្រើអំពើហិង្សាលើគ្នាទៅវិញទៅមក ។ ទាំង២នាក់ប្តីប្រពន្ធនេះរៀបការបានរយៈពេល៨ឆ្នាំមកហើយ ប៉ុន្តែមិនទាន់មានកូននៅឡើយ ។
សូមបញ្ជាក់ថា ទាំង២នាក់ប្តីប្រពន្ធខាងលើនេះ មិនត្រូវបានស្គាល់អត្តសញ្ញាណទេ ព្រោះពួកគេមិនព្រមឱ្យសមត្ថកិច្ចធ្វើកំណត់ហេតុ ហើយពួកគេទាំង២នាក់ឯកភាពមិនប្តឹងប្តល់គ្នា និងបានសន្យាចាប់ដៃគ្នាកសាងអនាគតតទៅទៀត ៕
ចែករំលែកព័តមាននេះ