រាជធានីភ្នំពេញ ៖ អ្នកនាំពាក្យអង្គភាពព័ត៌មាននិងប្រតិកម្មរហ័សនៃទីស្តីការគណៈរដ្ឋមន្ត្រី បានប្រតិកម្មចំពោះលោក សម រង្ស៊ី ប្រធានគណបក្សសង្គ្រោះជាតិ និងជាប្រធានក្រុមតំណាងរាស្ត្រភាគតិចក្នុងសភា ដែលបានប្រាប់ពីតម្លៃផែនទីដែលលោកបានទិញពីផ្សារនៅប្រទេសបារាំង គឺតម្លៃ១៦៨ដុល្លារអាមេរិក ។
ប្រតិកម្មរបស់ទីស្តីការគណៈរដ្ឋមន្ត្រីនេះធ្វើឡើងបន្ទាប់ពីនៅគេហទំព័រហ្វេសប៊ុក លោក សម រង្ស៊ី បានលើកឡើងថា ផែនទីបារាំង មុនឆ្នាំ១៩៥៣ ខ្នាត១/១០០.០០០ បង្ហាញពីព្រំដែនកម្ពុជា-វៀតណាម ទាំង២៦ផ្ទាំងដែលទាំងអស់គ្នាចង់បានពេលនេះ មានដាក់លក់នៅប្រទេសបារាំងក្នុងតម្លៃ១៥៣,៩១អឺរ៉ូ ស្មើនឹង១៦៨ដុល្លារអាមេរិក ។
គណបក្សសង្គ្រោះជាតិ បានទិញផែនទីទាំង ២៦ផ្ទាំង ដោយមានវិក្កយបត្រភ្ជាប់មកជាមួយ យកមកបង្ហាញប្រជាពលរដ្ឋខ្មែរទូទាំងប្រទេសឲ្យបានដឹង ។ ច្បាប់ដើមនៃផែនទីនេះ មានតែមួយគត់ដែលតម្កល់ទុកនៅប្រទេសបារាំង ហើយផែនទីដែលគេដាក់លក់នោះគឺជាច្បាប់ចម្លងតាមប្រព័ន្ធអេឡិចត្រូនិក ដែលដាក់បញ្ចូលក្នុងDVD (រូបថតភ្ជាប់មកជាមួយនេះ) ។ សម័យនេះ គេឈប់ផ្តល់ច្បាប់ចម្លងលើក្រដាសទៀតហើយ។ មានតែច្បាប់ចម្លងក្នុងDVD ទេ ដែលគេធានាជាផ្លូវការថា ដូចច្បាប់ដើមបេះបិត គ្មានខុសអ្វី បន្តិចពីច្បាប់ដើមឡើយ «ទោះចម្លងមួយលានដង ក៏នៅតែរក្សាលក្ខណៈដើមពេញលេញដដែល» ។
យោងតាមសេចក្តីថ្លែងការណ៍របស់ទីស្តីការគណៈរដ្ឋមន្ត្រីបានលើកឡើងថា បានភ្ញាក់ផ្អើល និងខកចិត្តយ៉ាងខ្លាំង ក្រោយពីបានឃើញការបង្ហោះលើគេហទំព័រហ្វេសប៊ុករបស់លោក សម រង្ស៊ី ប្រធានគណបក្សសង្គ្រោះជាតិ កាលពីថ្ងៃទី១៦ កក្កដា អំពីផែនទីបោន ខ្នាត១/១០០.០០០ ដែលគណបក្សសង្គ្រោះជាតិបានទិញពីផ្សារនៅប្រទេសបារាំង ក្នុងតម្លៃ១៥៣,៩១អឺរ៉ូ ស្មើនឹង១៦៨ដុល្លារអាមេរិក ។
សេចក្តីថ្លែងការណ៍ បានហៅទង្វើរបស់លោក សម រង្ស៊ី ថា បានបង្ហាញយ៉ាងច្បាស់ពីចេតនាដ៏អាក្រក់ក្នុងការបន្ទាបបន្ថោក និងបន្តុះបង្អាប់តម្លៃការងាររបស់ប្រមុខរាជរដ្ឋាភិបាលកម្ពុជា ដែលកើតចេញពីការបោះឆ្នោត ហើយបានផ្ញើលិខិតទៅអង្គការសហប្រជាជាតិ និងប្រទេសមហាអំណាចទាំងបី ជាពិសេសសាធារណរដ្ឋបារាំង ក្នុងការសុំខ្ចីផែនទីផ្លូវការ ដើម្បីយកមកផ្ទៀងផ្ទាត់ ជាមួយនឹងភាពត្រឹមត្រូវពិតប្រាកដរបស់ផែនទីខ្នាត១/១០០.០០០ ដែលរាជរដ្ឋាភិបាល បាននិងកំពុងប្រើប្រាស់ក្នុងការកំណត់ និងបោះបង្គោលព្រំដែន ជាមួយប្រទេសជិតខាងនាពេលនេះ ។
ទង្វើរបស់លោក សម រង្ស៊ី ក៏ជាការបន្ទាបបន្ថោកតម្លៃនៃអធិបតេយ្យ និងបូរណភាពទឹកដីរបស់កម្ពុជា និងមានចេតនាបង្ហាញឲ្យឃើញថា «ផែនទីដែលទិញនៅតាមផ្សារនេះ មានតម្លៃជាងផែនទីផ្លូវការដែលរាជរដ្ឋាភិបាលបាននិងកំពុងប្រើ និងមានតម្លៃជាងផែនទី ដែលរក្សាទុកនៅប្រទេសមហាអំណាចទាំងបីទៅទៀត»។ តើតម្លៃអធិបតេយ្យភាពកម្ពុជា ក្នុងទស្សនៈរបស់លោក សម រង្ស៊ី និងគណបក្សសង្គ្រោះជាតិមានត្រឹមតែ១៦៨ដុល្លារមែនឬ ?
សេចក្តីថ្លែងការណ៍ដដែល បានលើកឡើងទៀតថា តាមព័ត៌មានច្បាស់ការណ៍បានឲ្យដឹងថា ថ្មីៗនេះមានការស្នើសុំពីបណ្តាអ្នកស្រាវជ្រាវបញ្ហាប្រវត្តិសាស្ត្រនូវផែនទីដែល លោក សម រង្ស៊ី បានទិញពីផ្សារនោះ ដើម្បីយកទៅសិក្សាស្វែងយល់ពីការពិត តែលោក សម រង្ស៊ី ហាក់ដូចជាលាក់លៀមមិនព្រមផ្តល់ឱ្យ ដែលនេះមិនស្របទាល់តែសោះទៅនឹងអ្វីដែលលោក សម រង្ស៊ី ធ្លាប់អះអាងនាពេលកន្លងមក អំពីគោលការណ៍ តម្លាភាព ហើយប្រការនេះ វាផ្ទុយទាំងស្រុងពីការងាររបស់រាជរដ្ឋាភិបាល ដែលបាននិងកំពុងធ្វើ ។
ឆ្លើយតបចំពោះការចោទប្រកាន់ខាងលើ អ្នកនាំពាក្យគណបក្សសង្គ្រោះជាតិ បានច្រាន ចោលសេចក្ដីថ្លែងការណ៍នេះ និងលើកឡើងថា លោក សម រង្ស៊ី មិនមែនទើបតែបង្ហោះផែនទីនៅថ្ងៃទី១៦ កក្កដា នោះទេ គឺលោកបានបង្ហោះនៅលើបណ្ដាញសង្គមហ្វេសប៊ុក (Facebook) របស់លោកចាប់តាំងពីចុងខែមិថុនា ឆ្នាំ២០១៥ មកម្លេ៉ះ គ្រាន់តែការបង្ហោះនោះ ទៅតាមអ្វីដែលលោកមាន ។
ចំណែកអ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ ត្រូវប្រព័ន្ធផ្សព្វផ្សាយស្រង់សម្តី ដោយបានច្រានចោលសេចក្ដីថ្លែងការណ៍របស់ទីស្ដីការគណៈរដ្ឋមន្ត្រី ។ លោកថា អ្វីដែលលោក សម រង្ស៊ី ធ្វើ គឺដើម្បីចូលរួមដោះស្រាយបញ្ហាអធិបតេយ្យភាព និងបូរណភាពទឹកដី ហើយមូលហេតុដែលលោក សម រង្ស៊ី បង្ហោះផែនទីនេះ គឺគ្រាន់តែចង់ឲ្យសាធារណជនបានដឹង បានឃើញផែនទីនេះប៉ុណ្ណោះ ។ លោកបញ្ជាក់ថា «ខ្ញុំគ្រាន់តែចង់បញ្ជាក់ថា គណបក្សសង្គ្រោះជាតិ មិនដែលមានបំណងបន្ទាបបន្ថោកអ្នកនេះ អ្នកនោះ ឬអ្វីនោះទេ ។ យើងមិនអាចទទួលយកសេចក្តីថ្លែងការណ៍បែបនេះទេ» ។
ដោយឡែក លោក សម រង្សុី ក្នុងបទសម្ភាសន៍ជាមួយវិទ្យុបារាំងអន្តរជាតិ RFI បានថ្លែងថា ការទិញផែនទីតម្លៃ១៦៨ដុល្លារ គឺជាការបង្ហាញព័ត៌មាន មិនមែនជាការប្រមាថទេ ។ ជាមួយគ្នានេះ លោកក៏បានបង្ហាញការគាំទ្រពីជំហររបស់សម្តេចនាយករដ្ឋមន្ត្រី ជុំវិញបញ្ហាព្រំដែនជាមួយប្រទេសជិតខាងដែរ ។ លោក សម រង្សុី បញ្ជាក់ថា បើគណបក្សលោកឈ្នះឆ្នោត គឺនឹងសើរើពិនិត្យលើខ្សែព្រំដែនឡើងវិញទាំងអស់ ៕
ចែករំលែកព័តមាននេះ