ខេត្តកំពត ៖ នារីម្នាក់បានលេបថ្នាំងងុយដេកអស់ចំនួន៣៩គ្រាប់ប៉ងសម្លា.ប់ខ្លួន តែមិនបានសម្រេចត្រូវបានគេជួយដឹកទៅសង្គ្រោះនៅមន្ទីរពេទ្យទាន់ពេល ។
ខេត្តកំពត ៖ នារីម្នាក់បានលេបថ្នាំងងុយដេកអស់ចំនួន៣៩គ្រាប់ប៉ងសម្លាប់ខ្លួន តែមិនបានសម្រេចត្រូវបានគេជួយដឹកទៅសង្គ្រោះនៅមន្ទីរពេទ្យទាន់ពេល ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង១រសៀល ថ្ងៃទី៦ កក្កដា នៅក្នុងផ្ទះនារីរងគ្រោះស្ថិតក្នុងភូមិត្រសេតកោង ឃុំថ្មី ស្រុកទឹកឈូ។
នារីរងគ្រោះឈ្មោះ ង៉ែត ចាន់ធា អាយុ២២ឆ្នាំ មុខរបរមិនពិតប្រាកដ មានទីលំនៅភូមិត្រសេតកោង ឃុំថ្មី ស្រុកទឹកឈូរ ។ ក្រោយកើតហេតុ សមត្ថកិច្ចបានចុះទៅដល់កន្លែងកើតហេតុ ដើម្បីពិនិត្យរកមូលហេតុ របស់នារីរងគ្រោះ រកឃើញសំបកថ្នាំងងុយដេកចំនួន៤បន្ទះស្មើនឹង៤០គ្រាប់ នៅសល់១គ្រាប់។
បើតាមសាក្សីជាម្ចាស់ផ្ទះជួលនៅកន្លែងកើតហេតុបានឲ្យដឹងថា នៅពេលហូបបាយថ្ងៃត្រង់រួចគេឃើញនារីរងគ្រោះមានសភាពខុសប្លែកពីធម្មតាដែរ ប៉ុន្តែគ្មាននរណាម្នាក់ដែលស្នាក់នៅជិតគ្នានោះចាប់អារម្មណ៍ទេ(គេនឹកស្មានថានារីរងស្រវឹងស្រា) ពីព្រោះនាងចេះផឹកស្រាដែរ ហើយក៏ដើរចូលទៅក្នុងផ្ទះរបស់នាងបាត់ទៅ។
ប្រភពបន្តទៀតថា លុះដល់ម៉ោងប្រហែលជា៥ល្ងាច ម្ចាស់ផ្ទះមានការសង្ស័យបានទៅបើកទ្វារបន្ទប់នារីរងគ្រោះស្រាប់តែឃើញនាងកំពុងដេកក្អួតចង្អោរ ដោយឃើញអាការដូច្នេះម្ចាស់ផ្ទះក៏បានដឹកទៅសង្គ្រោះភ្លាមៗនៅមន្ទីរពេទ្យបង្អែកខេត្ត ។
នៅឯមន្ទីរពេទ្យក្រោយពីក្រុមគ្រូពេទ្យធ្វើការសង្គ្រោះលាងក្រពះបានរួចផុតពីគ្រោះថ្នាក់ដល់ជីវិតហើយ សមត្ថកិច្ចបានធ្វើការសាកសួររកមូលហេតុនៃការលេបថ្នាំធ្វើអត្តឃាត ពុំត្រូវបាននារីរងគ្រោះបង្ហើបប្រាប់ឱ្យដឹងឡើយ តែប្រភពជាច្រើននៅកន្លែងកើតហេតុបាននិយាយថា សង្ស័យមកពីមានវិបត្តិស្នេហា ៕
ចែករំលែកព័តមាននេះ