រាជធានីភ្នំពេញ ៖ លោក សម រង្ស៊ី ប្រធានគណបក្សសង្គ្រោះជាតិ និងជាប្រធានក្រុមតំណាងរាស្ត្រភាគតិចក្នុងសភា គ្រោងនឹងយកបញ្ហាចំនួន២គឺសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល និងបញ្ហាព្រំដែនវៀតណាម ទៅជជែកជាមួយសម្តេចតេជោ ហ៊ុន សែន នាយករដ្ឋមន្ត្រី ។
លោក សម រង្ស៊ី លើកឡើងបែបនេះខណៈដែលមានការព្រួយបារម្ភពីសង្គមស៊ីវិល លើសេចក្តីព្រាងច្បាប់ស្តីពីសមាគមនិងអង្គការមិនមែនរដ្ឋាភិបាល និងសកម្មភាពវៀតណាម ដែលកំពុងតែបង្កបញ្ហាតាមព្រំដែន ដូចជាការជីកស្រះនៅខេត្តរតគិរី និងបញ្ហាមួយចំនួនទៀត ។
លោក សម រង្ស៊ី មានប្រសាសន៍ប្រាប់អ្នកសារព័ត៌មានកាលពីរសៀលថ្ងៃទី២២ មិថុនា នៅវិមានរដ្ឋសភា បន្ទាប់ពីពិភាក្សាជាមួយក្រុមអង្គការសង្គមស៊ីវិល ថា តាមរយៈវប្បធម៌សន្ទនា លោកនឹងយកបញ្ហាពីរចំណុចខាងលើទៅជជែកជាមួយសម្តេចតេជោ ហ៊ុន សែន តែមិនទាន់ដឹងថាថ្ងៃណាទេ ។
ការលើកឡើងនេះ បន្ទាប់ពីសង្គមស៊ីវិលស្នើឲ្យលោកយកចំណុចទាំងនោះទៅជជែក និងមិនចង់មានច្បាប់ស្តីពីសមាគម និងអង្គការមិនមែនរដ្ឋាភិបាលកើតឡើង ។ ជាងនេះ ក្រុមសង្គមស៊ីវិលស្នើឲ្យលោកជជែកទល់មុខជាមួយសម្តេចតេជោតែម្តង ហើយក្រុមសង្គមស៊ីវិលបានជំរុញឱ្យគណបក្សសង្គ្រោះជាតិ ដោះស្រាយបញ្ហាទាំងនេះ កុំអូសបន្លាយយូរ រហូតដល់ច្បាប់ត្រូវបានអនុម័តដោយសភានោះ ។
តាមរយៈការស្នើសុំនេះ លោក សម រង្ស៊ី មានប្រសាសន៍ថា លោកនឹងជជែកជាមួយគណៈកម្មការ ក៏ដូចជាសមាជិកគណបក្សសង្គ្រោះជាតិ ឬសមាជិកសភា ដែលជាប្រធានគណៈកម្មការមួយចំនួនក្នុងរដ្ឋសភា ថានឹងធ្វើយ៉ាងដូចម្តេច ។ យ៉ាងណាក្តី លោក និងសង្គមស៊ីវិល មានគោលគំនិតដូចគ្នា គឺមិនចង់ឲ្យមានច្បាប់សមាគម និងអង្គការមិនមែនរដ្ឋាភិបាលនោះទេ ដោយអះអាងថា សម្រាប់កម្ពុជាមិនគួរមានច្បាប់នេះមកអនុវត្តឡើយ ។
លោក សម រង្ស៊ី លើកឡើងទៀតថា វប្បធម៌សន្ទនាដែលគណបក្សប្រជាជនកម្ពុជា និងគណបក្សសង្គ្រោះជាតិព្រមព្រៀងគ្នាបង្កើតឡើងនេះ មិនអាចដោះស្រាយបញ្ហាទាំងអស់បានភ្លាមៗទេ ។ ម្យ៉ាងទៀត ទោះបីជាគណបក្សសង្គ្រោះជាតិចង់ដោះស្រាយយ៉ាងណាក្តី តែប្រសិនបើគណបក្សប្រជាជនកម្ពុជាគ្មានចិត្តដោះស្រាយនោះ ក៏មិនអាចទៅរួចដែរ ។
ឆ្លើយពីការលើកឡើងរបស់សង្គមស៊ីវិល ចង់ឲ្យលោកជជែកទល់មុខជាមួយសម្តេចតេជោ ហ៊ុន សែន នោះ លោកសម រង្ស៊ី បញ្ជាក់ថា វប្បធម៌សន្ទានមិនមែនតែសម្រាប់បុគ្គលពីរនាក់ទេ គឺត្រូវចាក់ឫសគល់គ្រប់មជ្ឈដ្ឋាននៅទូទាំងប្រទេស គឺមិនមែនតែសម្រាប់ សម រង្ស៊ី និង ហ៊ុន សែន ឬរដ្ឋសភាឡើយ ។ ចំពោះបញ្ហាច្បាប់ NGO នេះ យើងក៏មិនចង់ឲ្យមានដែរ តែយើងនឹងរកវិធីដោះស្រាយជាមួយគ្នា កុំឱ្យច្បាប់នេះចេញឆាប់ ។ យើងមិនដឹងថា គណបក្សប្រជាជនកម្ពុជា មានគំនិតចង់ឲ្យមានការកែប្រែចំណុចមួយចំនួនឬយ៉ាងណាទេ ប៉ុន្តែបើយើងប្រើវប្បធម៌សន្ទនា គឺយើងដឹងពីចិត្តគំនិតគេ ។ បើគេចង់ឲ្យមានការកែប្រែដែរនោះ យើងក៏មានសង្ឃឹម ផ្ទុយទៅវិញបើគេគ្មានគំនិតបែបនេះទេនោះ គឺវាពិបាក ។
ជាមួយគ្នានោះដែរ លោក សម រង្ស៊ី បានបង្ហាញពីជំហររបស់គណបក្សសង្គ្រោះជាតិថា មិនគួរធ្វើច្បាប់ដែលមានការប្រញាប់ និងបង្កប់នូវរូបភាពគាបសង្កត់សង្គមស៊ីវិលបែបនេះទេ។ ផ្ទុយទៅវិញ បើសិនរាជរដ្ឋាភិបាលបង្កើតច្បាប់ គឺត្រូវតែធ្វើឲ្យល្អ ពិសេសនោះត្រូវផ្តល់សិទ្ធិដល់ប្រជាពលរដ្ឋ និងសង្គមស៊ីវិលកាន់តែច្រើនឡើង ព្រោះថា បច្ចុប្បន្នរាជរដ្ឋាភិបាលមិនទាន់បំពេញតម្រូវការ ឬមានដំណោះស្រាយគ្រប់គ្រាន់សម្រាប់ប្រជាពលរដ្ឋ ឬសាធារណជនទេ គឺបើកុំតែមានអង្គការសង្គមស៊ីវិលដែលបម្រើការងារក្នុងប្រទេស ជួយបង្ហាញផ្លូវ ឬជួយដោះស្រាយ ទើបរាជរដ្ឋាភិបាលដឹង ។
ក្នុងកិច្ចប្រជុំដែលចំណាយពេលជិត៣ម៉ោងនោះ ក្រុមសង្គមស៊ីវិលក៏ជំរុញឱ្យលោក សម រង្ស៊ី ចរចាជាមួយសម្តេចតេជោ ហ៊ុន សែន ដើម្បីកុំឱ្យច្បាប់នេះត្រូវរដ្ឋសភាអនុម័ត ។ ជាងនេះទៀត ក្រុមសង្គមស៊ីវិលបានស្នើឡើងទៀតថាប្រសិនបើច្បាប់នេះត្រូវបានដាក់ចូលក្នុងសម័យ ប្រជុំពេញអង្គសភានោះ «តើសមាជិកសភាមកពីគណបក្សសង្គ្រោះជាតិ នឹងហ៊ានធ្វើពហិការមិនចូលរួមប្រជុំ ឬដើរចេញពីអង្គប្រជុំសភាដែរឬទេ?» យ៉ាងណាក្តី លោក សម រង្ស៊ី អះអាងថា លោកនឹងយកចំណុចដែលក្រុមសង្គមស៊ីវិលស្នើទៅពិភាក្សាជាមួយតំណារាស្ត្ររបស់ខ្លួន ព្រមទាំងពិភាក្សាជាមួយគណៈកម្មការជំនាញដែលមានសមាជិកសភាមកពីគណបក្សសង្គ្រោះជាតិជាប្រធាន ។
គួរបញ្ជាក់ថា សេចក្តីព្រាងច្បាប់ដ៏ចម្រូងចម្រាស់ស្តីពីអង្គការសង្គមស៊ីវិលនេះ ត្រូវបានគណៈរដ្ឋមន្ត្រីបញ្ជូនទៅសភារួចហើយ កាលពីពេលកន្លងមក ។ សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលនោះ មាន៩ជំពូក និង៣៩មាត្រា ៕
ចែករំលែកព័តមាននេះ