រាជធានីភ្នំពេញ ៖ ពីរនាក់ប្តីប្រពន្ធជាជនជាតិវៀតណាមឈ្លោះប្រកែកជាមួយស្ត្រីម្នាក់ជាជនជាតិវៀតណាមដូចគ្នា បានចាប់ក្មេងប្រុសអាយុ១៣ឆ្នាំ វាយនិងយកជើងធាក់ក្បាលផ្ទុបទៅផ្លូវបេតុងសន្លប់ កាលពីវេលាម៉ោង៦និង១០នាទីព្រលប់ថ្ងៃទី៧ មិថុនា តាមផ្លូវបុរី៩៩៩ ភូមិចំរើនផល សង្កាត់ស្ទឹងមានជ័យ ខណ្ឌចំការមន ។
សមត្ថកិច្ចចាប់ឃាត់ខ្លួនស្ត្រីបង្កឈ្មោះ វិន សុចិន្តា អាយុ៣៨ឆ្នាំ មុខរបរលក់ដូរ ស្នាក់នៅផ្ទះជួលនៅកន្លែងកើតហេតុ មានស្រុកកំណើត ឃុំកំពង់ភ្នំ ស្រុកលើកដែក ខេត្តកណ្តាល ។ ចំណែកក្មេងប្រុសរងគ្រោះឈ្មោះ ហាក់ ម៉ិញគួង ភេទប្រុស អាយុ១៣ឆ្នាំ ស្នាក់នៅក្បែរគ្នា ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុពីរនាក់ប្តីប្រពន្ធដែលជាជនបង្ក ហើយបុរសជាប្តីមិនស្គាល់អត្តសញ្ញាណ ដោយស្ត្រីជាប្រពន្ធមានកូនអាយុ២ខួបម្នាក់ បានឈ្លោះប្រកែកជាមួយស្ត្រីដែលជាម្តាយក្មេងប្រុសរងគ្រោះជេរដៀមដាមគ្នា ឃើញឈ្លោះប្រកែកគ្នាបែបនេះកូនប្រុសអាយុ១៣ឆ្នាំបានកាន់បំពង់ទីបទុកជួយម្តាយ ក៏ត្រូវបុរសជាប្តីស្ទុះទៅដណ្តើមយក និងវាយក្មេងប្រុសជាច្រើនដៃ ជើង រួចយកជើងធាក់ក្បាលផ្ទុបទៅផ្លូវបេតុង ។ ចំណែកស្ត្រីជាប្រពន្ធបានយកជ្រញ់ទៅវាយក្បាលក្មេងប្រុសនេះថែមទៀត បណ្តាលឲ្យសន្លប់ស្តូកស្តឹង ។
ក្រោយពេលកើតហេតុ ក្មេងប្រុសដែលរងរបួសត្រូវបានស្ត្រីជាម្តាយយកទៅព្យាបាលនៅមន្ទីរពេទ្យមិត្តភាពខ្មែរ-សូវៀត ចំណែកស្ត្រីជាអ្នកបង្កត្រូវបានសមត្ថកិច្ចឃាត់ខ្លួនយកទៅសួរនាំនៅប៉ុស្តិ៍បឹងទំពុនដើម្បីកសាងសំណុំរឿងចាត់ការតាមច្បាប់ ។ ដោយឡែក បុរសជាប្តីបានរត់គេចខ្លួន ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ