ខេត្តព្រះសីហនុ ៖ យុវជនអាយុជាង២០ឆ្នាំ២ក្រុមបានប្រយុទ្ធគ្នាដោយប្រើកាំបិតប៉័ងតោបណ្តាលឲ្យយុវជនម្នាក់រងរបួសធ្ងន់ធ្ងរ និងយុវជនម្នាក់ទៀតរងរបួសស្រាល បន្ទាប់ពីមានជម្លោះក្នុងហាងខារ៉ាអូខេមួយក្នុងខេត្តព្រះសីហនុ ។
ខេត្តព្រះសីហនុ ៖ យុវជនអាយុជាង២០ឆ្នាំ២ក្រុមបានប្រយុទ្ធគ្នាដោយប្រើកាំបិតប៉័ងតោបណ្តាលឲ្យយុវជនម្នាក់រងរបួសធ្ងន់ធ្ងរ និងយុវជនម្នាក់ទៀតរងរបួសស្រាល បន្ទាប់ពីមានជម្លោះក្នុងហាងខារ៉ាអូខេមួយក្នុងខេត្តព្រះសីហនុ ។ ហេតុការណ៍កាប់ចាក់គ្នានេះ បានកើតឡើងកាលពីវេលាម៉ោង១០ និង៤០នាទីយប់ ថ្ងៃទី២៣ ខែឧសភា ឆ្នាំ២០១៥ នៅក្នុងហាងខារ៉ាអូខេឈ្មោះវិបុលសំណាង ស្ថិតក្នុងក្រុម៣ ភូមិ៤ សង្កាត់ទី៤ ក្រុង-ខេត្តព្រះសីហនុ ។
លោកវរសេនីយ៍ត្រី ភុល ភ័ស្តា អធិការនគរបាលក្រុងព្រះសីហនុបានអោយដឹងថា នៅវេលាម៉ោងកើតហេតុខាងលើមានករណីហិង្សាដោយចេតនាមួយកើតឡើង ដែលបង្កឡើងដោយយុវជនចំនួន៤នាក់មានឈ្មោះ ទី១-ឈ្មោះធន វ៉ាន់នី ហៅ ភ័ត្តិ ភេទប្រុស អាយុ២១ឆ្នាំ មុខរបរជាងឡាននៅអូរសំអាត ស្ថិតក្នុងភូមិ១ សង្កាត់៣ ក្រុងព្រះសីហនុ, ទី២-ឈ្មោះវ៉ាន់ បញ្ជា ភេទប្រុស អាយុ២៤ឆ្នាំ មុខរបរជាងដែក មានទីលំនៅអូរសំអាត ស្ថិតក្នុងភូមិ១ សង្កាត់លេខ៣ ក្រុងព្រះសីហនុ ។ ទី៣-ឈ្មោះឌិម គឹមស្រន់ ភេទប្រុស អាយុ២០ឆ្នាំ មុខរបរជាងឡាននៅអូរសំអាត ។ ទី៤-ឈ្មោះយ៉ែម កៃហ៊ន ភេទប្រុស អាយុ២៣ឆ្នាំ មុខរបរជាងឡាននៅអូសំអាត រីឯ យុវជនរងគ្រោះមានឈ្មោះគង់ សំណាង ភេទប្រុស អាយុ២៥ឆ្នាំ (របួសធ្ងន់) និងឈ្មោះផាន់ តុលា ភេទប្រុស អាយុ២១ឆ្នាំ (របួសស្រាល) ជនរងគ្រោះទាំង២នាក់ស្នាក់នៅក្នុងខេត្តព្រះសីហនុ ។
ប្រភពដដែលបានបន្តថា ជម្លោះរវាងយុវជនទាំង២ក្រុមនេះកើតឡើងដោយសារតែផឹកស៊ីក្នុងហាងយីហោវិបុលសំណាង ហើយបានរាំប៉ះគ្នា ខណៈពេលយុវជនរងគ្រោះទាំងពីរនាក់ដើរទៅបន្ទប់ទឹក ទើបកើតជាទំនាស់ពាក្យសំដី រហូតឈានដល់យកកែវ ថូស្រាបៀរ និងកាំបិតប៉័ងតោកាប់គ្នាទៅវិញទៅមកយ៉ាងសាហាវ ភ្លាមៗនោះក្រុមសមត្ថកិច្ចប៉ុស្តិ៍រដ្ឋបាល កំលាំងអធិការដ្ឋាន សហការជាមួយកំលាំងល្បាតរបស់ការិយាល័យព្រហ្មទណ្ឌ នៃស្នងការដ្ឋាននគរបាលខេត្ត ចុះដល់កន្លែងកើតហេតុ នឹងឃាត់ខ្លួនយុវជនបង្កបានចំនួន៤នាក់ រួចបញ្ជូនជនរងគ្រោះទៅកាន់មន្ទីពេទ្យភ្លាមដែរដើម្បីជួយសង្គ្រោះ ។
ដោយឡែក ស្ត្រីម្ចាស់ហាងបានអះអាងថា ជម្លោះកាប់ចាក់នេះដើមឡើយបង្កឡើងដោយក្រុមយុវជនរងគ្រោះ ព្រោះមុនកើតហេតុយុវជន១ក្រុមដែលមានគ្នា៤នាក់(ក្រុមជនបង្ក)បានឡើងរាំនៅកណ្តាលហាង ក៏មានយុវជន១ក្រុមទៀត(ក្រុមជនរងគ្រោះ) ដើរសំដៅទៅបន្ទប់ទឹកក៏បានប៉ះដៃជាមួយក្រុមយុវជនដែលកំពុងរាំ នៅពេលនោះយុវជនទាំងពីរបានឈរសម្លក់ទៅក្រុមយុវជនដែលកំពុងរាំ រួចដើរទៅបន្ទប់ទឹកហើយបានត្រឡប់មកវិញ ក្នុងយុវជនម្នាក់បានឡើងជិះម៉ូតូចេញទៅមួយសន្ទុះក៏ត្រឡប់វិញ ហើយហៅរូបគាត់គិតលុយ ។ បន្ទាប់ពីគិតលុយរួចរាល់ហើយ យុវជរងគ្រោះទាំងពីរនាក់បានស្ទុះទៅកាប់លើក្រុមយុវជនម្នាក់ក្នុងចំណោម៤នាក់ត្រូវ១កាំបិត ឃើញដូចនោះក្រុមយុវជនមានគ្នា៤នាក់ក៏បានទាញកែវ និងថូគប់មកលើយុវជនទាំងពីរ នឹងហក់ទៅដណ្តើមកាំបិតកាប់តបតវិញយ៉ាងសាហាវ ធ្វើអោយគាត់មានការភិតភ័យយ៉ាងខ្លាំងរត់ស្ទុះមកក្រៅហាង ស្រែករកជំនួយ និងបានប្តឹងសមត្ថកិច្ចតែម្តង ។
ជនជាប់ចោទចំនួន៤នាក់ត្រូវបានចាប់ខ្លួន និងបញ្ជូនទៅស្នងការខេត្តដើម្បីសាកសួរទាំងយប់នៅអធិការដ្ឋាននគរបាលក្រុងព្រះសីហនុ រីឯយុវជនរងគ្រោះទាំង២នាក់កំពុងព្យាបាលនៅគ្លីនិកឯកជនរស្មីកំពង់សោម ៕
ចែករំលែកព័តមាននេះ