ខេត្តកំពត ៖ មានការរិះគន់ពីសំណាក់ប្រជាពលរដ្ឋជាច្រើននៅក្នុងក្រុងកំពត មកលើមន្ទីរជំនាញ (មន្ទីរវប្បធម៌) ខេត្តថា មន្ត្រីជំនាញរបស់មន្ទីរខាងលើ ហាក់ដូចជាអសមត្ថភាព ឬធ្វេសប្រហែស និងធូររលុងចំពោះតួនាទីរបស់ខ្លួន ដែលត្រូវអនុវត្ត និងត្រួតពិនិត្យរាល់ស្លាកយីហោ ដែលក្រុមអាជីវករទាំងខ្មែរ-បរទេស ដែលគេធ្វើអាជីវកម្មលក់ដូរនៅតាមហាងនានាក្នុង និងជាយក្រុង ។
តើក្រុមអាជីវករមុននឹងបើកហាងលក់ដូរ ឬធ្វើអាជីវកម្មអ្វីមួយ តើគេត្រូវមានការទំនាក់ទំនងអ្វីខ្លះមកមន្ទីរជំនាញ? ឬមួយក្រុមអាជីវករទាំងនោះ ចង់ធ្វើអ្វីស្រេចតែអំពើចិត្ត? តាមតែខ្លួននឹកឃើញ? ចំណែកមន្ត្រីជំនាញខាងមន្ទីរវប្បធម៌វិញ តើបានពិនិត្យរាល់ស្លាក សញ្ញាដែលក្រុមអាជីវករទាំងនោះ បានដាក់តាំងស្លាកដែរឬទេ?
ជាក់ស្តែង មានបរទេសម្នាក់បានបើកហាងដាក់ស្លាកយីហោជាភាសាបរទេសទាំងអស់ ស្ថិតនៅតាមបណ្តោយផ្លូវចូលទៅរមណីយដ្ឋានទឹកឈូ ស្ថិតក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត ដោយហាងមួយនេះ មិនបានដាក់ស្លាកយីហោជាភាសាខ្មែរនោះទេ ។
ជុំវិញករណីខាងលើ កោះសន្តិភាពបានទំនាក់ទំនងទូរស័ព្ទទៅលោកគង់ ផល្លា ប្រធានមន្ទីរវប្បធម៌ខេត្ត ដើម្បីសុំឱ្យលោកបកស្រាយបំភ្លឺរឿងខាងលើ ។ លោកគង់ ផល្លា ប្រធានមន្ទីរវប្បធម៌ខេត្តបានឱ្យកោះសន្តិភាពដឹងថា លោកបានឱ្យមន្ត្រីក្រោមឱវាទចុះទៅពិនិត្យទីតាំងហាងនោះហើយ បុន្តែម្ចាស់ហាងគេសុំមន្ទីរពន្យារពេលឱ្យគេរយៈពេលមួយសប្តាហ៍សិន ដើម្បីគេរៀបចំដូរស្លាកឱ្យបានត្រឹមត្រូវតាមការណែនាំរបស់មន្ទីរ ។
ចែករំលែកព័តមាននេះ