ស្ថានការណ៍នយោបាយរបស់ប្រទេសកម្ពុជាប៉ុន្មានឆ្នាំចុងក្រោយនេះ បានស្តែងឲ្យគេបានដឹងយ៉ាងច្បាស់ថា កម្ពុជាអាចពឹងលើសមត្ថភាពរបស់ខ្លួនឯងស្វែងរកសុខសន្តិភាពជូនប្រទេសជាតិខ្លួនដោយមិនចាំបាច់ប្រើប្រាស់អាវុធនោះទេ
ស្ថានការណ៍នយោបាយរបស់ប្រទេសកម្ពុជាប៉ុន្មានឆ្នាំចុងក្រោយនេះ បានស្តែងឲ្យគេបានដឹងយ៉ាងច្បាស់ថា កម្ពុជាអាចពឹងលើសមត្ថភាពរបស់ខ្លួនឯងស្វែងរកសុខសន្តិភាពជូនប្រទេសជាតិខ្លួនដោយមិនចាំបាច់ប្រើប្រាស់អាវុធនោះទេ ។ ពិតណាស់ថា ការដឹកនាំប្រទេសតែងតែជួបនូវវិបត្តិធ្ងន់ធ្ងរដែលពិបាកនឹងដោះស្រាយ ដូចជាវិបត្តិសេដ្ឋកិច្ចពិភពលោក កម្ពុជាបានហែលផុត ដ្បិតតែជាប្រទេសដែលទើបតែងើបពីភ្លើងសង្គ្រាម អាចនិយាយបានថា ជាប្រទេសដែលមានសេដ្ឋកិច្ចនៅទន់ខ្សោយនៅឡើយ ស្របពេលដែលប្រទេសមួយចំនួនក្នុងពិភពលោកមកដល់ពេលនេះមិនទាន់ដោះស្រាយវិបត្តិនេះរួចនៅឡើយ ។
អ្វីដែលគួរឲ្យកត់សម្គាល់ជាងនេះទៅទៀតនោះ គឺការដោះស្រាយនូវវិបត្តិនយោបាយ បន្ទាប់ពីការបោះឆ្នោតឆ្នាំ២០១៣ ដែលគេបានដឹងថាស្ថានការណ៍នយោបាយកម្ពុជានៅក្នុងកំឡុងឆ្នាំ២០១៣និង២០១៤ពិតជាតានតឹង ហើយអ្នកវិភាគមួយចំនួនពេលនោះបានគិតថាខ្មែរអាចនឹងឈានដល់ដំណាក់កាលចុងក្រោយ គឺការបង្ហូរឈាមដោយប្រើប្រាស់អាវុធមកដោះស្រាយបញ្ហា ព្រោះគេបានមើលឃើញយ៉ាងជាក់ស្តែងពីភាពវឹកវរ ដែលអំពើទាំងនេះបានស្តែងឡើងតាមរយៈការធ្វើបាតុកម្មដែលអូសបន្លាយពេលជាងមួយឆ្នាំ ។ បើសិនជាពេលនោះរាជរដ្ឋាភិបាលពិតជាផ្តាច់ការដូចការចោទប្រកាន់របស់ជនអគតិមួយចំនួនមែននោះ ម្លេ៉ះសមមិនមានទេ បាតុកម្មដែលអូសបន្លាយពេលយូរបែបនេះ ហើយឈាមខ្មែរប្រាកដជាហូរ សំទ្បេងសោកសង្រេងព្រោះតែបាត់បង់សាច់ញាតិ ប្រាកដជាឮពេញប្រទេសកម្ពុជាជាក់ជាមិនខាន ។
នយោបាយឈ្នះ-ឈ្នះ ! នៅតែជាអត្ថិភាព អ្នកដឹកនាំប្រទេសខ្មែរនៅតែប្រកាន់យកនយោបាយមួយនេះមកដោះស្រាយ ទោះបីជាមានស្ថានការណ៍នយោបាយតានតឹងបែបណាក៏ដោយ។ គន្លឹះក្នុងការដោះស្រាយវិបត្តិនយោបាយមួយដែលថ្នាក់ដឹកនាំប្រទេសកម្ពុជាបានលើកឡើងក្នុងពិធីបើកព្រឹត្តិការណ៍អង្គរសង្ក្រាន្តថា «មេរៀនបទពិសោធន៍របស់ខ្ញុំព្រះករុណា ខ្ញុំ យើងត្រូវទុកផ្លូវឲ្យគេរស់ ទុកច្រកដើម្បីគេមានលទ្ធភាព ធ្វើអ្វីដែលអាចខុសពីគំនិតរបស់យើង» ។
វប្បធម៌សន្ទនា គឺជាមាគ៌៌ាសន្តិភាព រុញច្រានប្រទេសកម្ពុជាឲ្យផុតពីការជាន់ដានប្រវត្តិសាស្ត្រដ៏ជូរចត់ ហើយវប្បធម៌មួយនេះបានកៀរគរខ្មែរគ្រប់និន្នាការនយោបាយទូទាំងប្រទេសឲ្យមកចូលរួមអបអរសាទរក្នុងឱកាសបុណ្យចូលឆ្នាំថ្មីយ៉ាងសប្បាយរីករាយ ទោះបីជានៅមានជនល្មោភអំណាចមួយចំនួន នៅតែមិនបោះបង់ចោលនូវឆន្ទៈផ្តួលរំលំរាជរដ្ឋាភិបាល ។
ព្រោះតែអំណាច បុគ្គលនោះមិនធ្លាប់គិតទេសុខទុក្ខប្រជាពលរដ្ឋ គេមិនចង់ឃើញស្នាមញញឹមរបស់ប្រជាពលរដ្ឋនោះឡើយ រឹតតែមិនចង់ឮសំទ្បេងសើចក្អាកក្អាយរបស់ប្រជាពលរដ្ឋឲ្យគេអាចធ្វើអ្វីបានគ្រប់យ៉ាង បើសិនអំពើនោះអាចផ្តល់ឲ្យគេនូវអំណាច នូវផលប្រយោជន៍ អ្វីដែលបុគ្គលនេះចង់ឮ និងចង់ឃើញនោះគឺភាពវឹកវរក្នុងសង្គមខ្មែរ ដរាបណាខ្មែរនៅតែវឹកវរបុគ្គលម្នាក់នេះនៅតែសប្បាយចិត្ត ។ ជាក់ស្តែងនៅថ្ងៃបុណ្យចូលឆ្នាំថ្មីក្នុងព្រឹត្តិការណ៍អង្គរសង្ក្រាន្ត បុគ្គលម្នាក់នេះហាក់មិនសប្បាយចិត្តនឹងចូលរួមជាមួយប្រជាពលរដ្ឋខ្មែរនោះទេ គេបែរជាប្រើប្រាស់ល្បិចដ៏អាក្រក់ជាច្រើនផ្សព្វផ្សាយតាមបណ្តាញសង្គម facebook ញុះញង់មិនឲ្យប្រជាពលរដ្ឋចូលរួមព្រឹត្តិការណ៍អង្គរសង្ក្រាន្តនេះទេ តែទោះជាយ៉ាងណា ប្រជាពលរដ្ឋនៅតែទៅចូលរួមព្រឹត្តិការណ៍អង្គរសង្ក្រាន្តនេះយ៉ាងច្រើនកុះករ ហួសពីការរំពឹងទុក គឺអ្នកចូលរួមដល់ទៅមួយលាននាក់ ទាំងនេះបានស្តែងយ៉ាងច្បាស់ថា ប្រជាពលរដ្ឋខ្មែរភាគច្រើនលែងជឿឃោសនាអកុសលរបស់បុគ្គលនេះទៀតហើយ ។
បើទោះបីជាមិនបានបញ្ចេញឈ្មោះជនជ្រុលនិយម បង្កហិង្សាសង្គម ក៏មិត្តអ្នកអានអាចស្វែងយល់ដោយខ្លួឯងថា បុគ្គលនោះគ្មានអ្នកណាក្រៅពីជនដែលប្រឆាំងនឹងវប្បធម៌សន្ទនានោះទេ ។
មហិច្ឆតាដណ្តើមអំណាចផ្លូវកាត់គួរតែបញ្ឈប់ទៅ អ្នកគួរសាងអ្វីដែលល្អ ធ្វើអ្វីដើម្បីប្រយោជន៍ប្រជាពលរដ្ឋទូទាំងប្រទេសខ្លះទៅ បើប្រជាពលរដ្ឋគេយល់ថា អ្នកជាបុគ្គលស័ក្តិសមជាអ្នកដឹកនាំនោះ គេប្រាកដជាបោះឆ្នោតគាំទ្រអ្នកជាមិនខាន ។
បញ្ឈប់ទៅវប្បធម៌លាបពណ៌ សូមមេត្តាកុំខំអូសទាញខ្មែរទៅជាន់ដានចាស់ទៀតអី ខ្មែរត្រូវតែរួបរួម ទើបខ្មែរមានការអភិវឌ្ឈ ហើយឈប់យកហេតុផលថា ខ្លួនមិនមែនជាបក្សកាន់អំណាច មិនអាចអភិវឌ្ឍប្រទេសនោះ លុយជំនួយដែលបានមកពីក្រៅប្រទេសហ្នឹង បរិច្ចាគជួយរ្រាស្តខ្លះទៅកុំយកដាក់តែក្នុងហោប៉ៅខ្លួនឯង និងបក្សពួក ៕
ចែករំលែកព័តមាននេះ