ខេត្តពោធិ៍សាត់ ៖ មានការភ្ញាក់ផ្អើលទាំងកណ្ដាលថ្ងៃត្រង់ដោយសារអគ្គិភ័យឆេះជញ្ជ្រាំងស្រូវ ហើយរាលមកឆេះដល់តាមជើងភូមិ ប៉ុន្តែមិនបណ្ដាលឲ្យឆេះផ្ទះប្រជាពលរដ្ឋនោះទេ ដោយសារបានរថយន្តពន្លត់អគ្គិភ័យរបស់ស្នងការដ្ឋាន
ខេត្តពោធិ៍សាត់ ៖ មានការភ្ញាក់ផ្អើលទាំងកណ្ដាលថ្ងៃត្រង់ដោយសារអគ្គិភ័យឆេះជញ្ជ្រាំងស្រូវ ហើយរាលមកឆេះដល់តាមជើងភូមិ ប៉ុន្តែមិនបណ្ដាលឲ្យឆេះផ្ទះប្រជាពលរដ្ឋនោះទេ ដោយសារបានរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តពោធិ៍សាត់ជួយអន្តរាគមន៍បាញ់ទឹកពន្លត់ទាន់។
ហេតុការណ៍នេះបានកើតឡើងកាលពីវេលាម៉ោង០១ និង៣០នាទីរសៀល ថ្ងៃទី២០ មេសា ២០១៥ នៅភូមិបឹងយា ឃុំវាល ស្រុកកណ្ដៀង។ លោកវរសេនីយ៍ទោលីវ សេងហ៊ីម អធិការនគរបាលស្រុកកណ្ដៀងបានឲ្យដឹងថា នៅវេលាម៉ោង១ និង៣០នាទីរសៀល ថ្ងៃទី២០ មេសា ប្រជាពលរដ្ឋភូមិបឹងយាបានរាយការណ៍មកថា មានករណីភ្លើងឆេះជញ្ជ្រាំងស្រូវនៅឯទីវាល ហើយកំពុងរាលឆេះយ៉ាងលឿនតាមការបក់ផាត់របស់កម្លាំងខ្យល់សំដៅមកកាន់ភូមិប្រជាពលរដ្ឋដែលកំពុងរស់នៅធ្វើឲ្យប្រជាពលរដ្ឋមានការភិតភ័យផ្អើលឆោឡោទាំងថ្ងៃ ទោះបីនាំគ្នាដងទឹកពន្លត់ និងយកដំបងវាយជញ្ជ្រាំងស្រូវដែលកំពុងឆេះនោះយ៉ាងណាក៏ដោយក៏មិនអាចឈ្នះដែរដោយសារទំហំមុខភ្លើងវែង។
បន្ទាប់ពីទទួលបានព័ត៌តមាននេះភ្លាមលោកបានដឹកនាំកម្លាំងចុះទៅដល់កន្លែងកើតហេតុឃើញភ្លើងកំពុងតែរាលមកឆេះពំនូកចំបើងយ៉ាងសន្ធោសន្ធៅ ក៏បានទូរស័ព្ទទៅរថយន្តពន្លត់អគ្គិភ័យដើម្បីមកជួយអន្តរាគមន៍ជាបន្ទាន់។ ខណៈពេលដែលភ្លើងកំពុងរាលទៅឆេះដល់ពំនូកចំបើងទី២ និងឆេះគុម្ភឫស្សីក្នុងរបងបរិវេណម៉ុងខ្មោចវត្តលោកយួន និងសល់តែប្រមាណ១០ម៉ែត្រទៀតដល់ផ្ទះប្រជាពលរដ្ឋនោះរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តបានមកដល់ល្មមហើយបានធ្វើការបាញ់ទឹកពន្លត់ទាន់ពេលវេលា។
លោកវរសេនីយ៍ឯកព្រំ សារុន ស្នងការរងទទួលបន្ទុកអគ្គិភ័យបានប្រាប់ឲ្យដឹងថា គ្រោះអគ្គិភ័យនេះយើងបានប្រើទឹកអស់ចំនួន០៣រថយន្តក្នុងការបាញ់ពន្លត់។ បើសិនជារថយន្តពន្លត់អគ្គិភ័យមកយឺតពេលតែ១០នាទីទៀតអគ្គិភ័យប្រាកដជារាលឆេះដល់ផ្ទះប្រជាពលរដ្ឋក្នុងភូមិនោះជាមិនខាន។ អគ្គិភ័យនេះបង្កឡើងដោយសារមានអ្នកដុតជញ្ជ្រាំងស្រូវចោលនៅឯទីវាល ហើយត្រូវខ្យល់បក់ក៏រាលមកឆេះដល់ភូមិប្រជាពលរដ្ឋរស់នៅធ្វើឲ្យប្រជាពលរដ្ឋមានការភ័យស្លន់ស្លោយ៉ាងខ្លាំង៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ