ខេត្តកំពង់ស្ពឺ ៖ ជនសង្ស័យម្នាក់ជាយោធានៅកងពលតូចលេខ៣១បានដកអាវុធបា.ញ់សម្លា.ប់ម្តាយក្មេក និងប្អូនថ្លៃបណ្តាលឱ្យស្លា.ប់នៅនឹងកន្លែង ព្រោះតែទំនាស់ពាក្យសម្តីបន្តិចបន្តួច។
ខេត្តកំពង់ស្ពឺ ៖ ជនសង្ស័យម្នាក់ជាយោធានៅកងពលតូចលេខ៣១បានដកអាវុធបាញ់សម្លាប់ម្តាយក្មេក និងប្អូនថ្លៃបណ្តាលឱ្យស្លាប់នៅនឹងកន្លែង ព្រោះតែទំនាស់ពាក្យសម្តីបន្តិចបន្តួច។
ហេតុការណ៍បាញ់សម្លាប់នេះបានកើតឡើងកាលពីវេលាម៉ោង៩ និង២០នាទីព្រឹក ថ្ងៃទី១៨ មេសា ២០១៥ នៅភូមិព្រះខែ ឃុំដំបូករូង ស្រុកភ្នំស្រួច ។
ជនដៃដល់ឈ្មោះសំ វណ្ណ ភេទប្រុស អាយុ៤៨ឆ្នាំ ជាយោធានៅកងពលតូចលេខ៣១(ស្រែខ្លុង) ចំណែកជនរងគ្រោះដែលស្លាប់ ឈ្មោះវឹល ហាន ភេទស្រី អាយុ៧៥ឆ្នាំ ជាម្តាយក្មេក និងប្អូនថ្លៃឈ្មោះញ៉ាន់ វ៉ិត ភេទស្រី អាយុ៣៥ឆ្នាំ មានទីលំនៅភូមិ-ឃុំកើតហេតុខាងលើ។
ប្រភពពីសមត្ថកិច្ចស្រង់សម្តីសាក្សីបានឱ្យដឹងថា ក្នុងគ្រួសារអ្នករងគ្រោះមានទំនាស់ពាក្យសម្តីគ្នាកាលពីយប់ថ្ងៃទី១៧ មេសា តែគ្មានអ្នកណាដឹងថា ទំនាស់រឿងអ្វីទេ។ ប្រភពបន្តថា ក្រោយឮសម្លេងឈ្លោះប្រកែកគ្នាមួយសន្ទុះក៏ស្ងាត់ទៅ។ លុះព្រឹកឡើងម្តាយក្មេក និងប្អូនថ្លៃជនដៃដល់បានទៅកាប់ព្រៃចំការដូចធម្មតារហូតដល់ម៉ោង៩យប់ ថ្ងៃទី១៨ មេសា ជនរងគ្រោះទាំង២នាក់បានត្រឡប់មកពីកាប់ព្រៃវិញ ហើយអង្គុយនៅលើគ្រែស្រាប់តែលេចមុខជនសង្ស័យមកដល់ដោយមានកាន់អាវុធAK47 នៅនឹងដៃបានលើកបាញ់ប្រហារទៅលើម្តាយក្មេក និងប្អូនថ្លៃបណ្តាលឱ្យស្លាប់ភ្លាមៗមួយរំពេចន៍។
ក្រោយសម្លាប់មនុស្សហើយជនដៃដល់បានស្ពាយកាំភ្លើងរត់គេចខ្លួនបាត់ទៅ។ ក្រោយកើតហេតុសមត្ថកិច្ចបានមកពិនិត្យសពជនរងគ្រោះឃើញថា ស្ត្រីជាម្តាយក្មេកត្រូវជនដៃដល់បាញ់ចំដើមទ្រូង២គ្រាប់ និងប្អូនថ្លៃចំដើមទ្រូងផ្នែកខាងឆ្វេង១គ្រាប់។ សពត្រូវបានសមត្ថកិច្ចប្រគល់ឱ្យក្រុមគ្រួសាររៀបចំធ្វើបុណ្យតាមប្រពៃណីនៅកន្លែងកើតហេតុ។
បើតាមការបង្ហើបប្រាប់ពីមន្ត្រីយោធាម្នាក់នៅកងពលតូចលេខ៣១បានឱ្យដឹងថា មូលហេតុដែលបណ្តាលឱ្យជនសង្ស័យបាញ់សម្លាប់ជនរងគ្រោះដូច្នេះមកពីជនរងគ្រោះទាំង២នាក់ប្រើពាក្យសម្តីមើលងាយមើលថោកជនសង្ស័យថាមិនគិតជួយរកស៊ីប្រពន្ធកូន៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ