ខេត្តឧត្តរមានជ័យ ៖ ត្រាក់ទ័រមួយគ្រឿងភ្ជួរដីស្រែ នៅក្នុងរដូវបុណ្យចូលឆ្នាំថ្មីប្រពៃណីជាតិ ស្រាប់តែជាន់គ្រាប់មីនតោន ដែលសេសសល់កាលពីសម័យសង្គ្រាម បណ្តាលឲ្យផ្ទុះឡើង រីឯមនុស្សម្នាក់ ទទួលរងរបួសស្រាល ចំណែកត្រាក់ទ័រខូចខាតមួយកំណាត់មុខ កាលពីវេលាម៉ោង១០ និង៣០នាទីព្រឹក ថ្ងៃទី១៣ មេសា ២០១៥ ។ ហេតុការណ៍នេះបានកើតឡើង នៅចំណុចអូរអំបិល ស្ថិតនៅក្នុងភូមិថ្មី ឃុំត្រពាំងតាវ ស្រុកអន្លង់វែង ។
លោកវរសេនីយ៍ត្រីស៊ូ នូវ អធិការងទទួលបន្ទុកសេនាធិកាប៉ូលីសស្រុកអន្លង់វែងបានឲ្យដឹងថា ក្នុងខេត្តឧត្តរមានជ័យ ជាពិសេស នៅក្នុងស្រុកអន្លង់វែងនេះកាលពីសម័យសង្គ្រាមស៊ីវិល ស្រុកអន្លង់វែង ជាសមរភូមិក្តៅ បំផុតប្រយុទ្ធគ្នារវាងកងទ័ពខ្មែរក្រហម និងកងទ័ពរបស់រាជរដ្ឋាភិបាល នៃដំណាក់ការចុងក្រោយ ដូច្នេះគ្រាប់ដែលមិនទាន់ផ្ទុះ គ្រប់ប្រភេទ ជាពិសេសគ្រាប់មីនតែម្តង នៅកប់ពាសពេញផ្ទៃដី ត្រូវបានផ្ទុះឆាបឆក់យកជីវិតពលរដ្ឋខ្មែរអស់ជាច្រើននាក់មកហើយកន្លងមកនេះ ។
លោកបានបន្តថា ជាក់ស្តែងនាព្រឹកថ្ងៃទី១៣ មេសា ២០១៥នេះ មានប្រជាពលរដ្ឋម្នាក់ឈ្មោះបូ នីន ភេទប្រុស អាយុ១៩ឆ្នាំមានទីលំនៅក្នុងភូមិថ្មី ឃុំត្រពាំងតាវ ស្រុកអន្លង់វែង បានបើកបរត្រាក់ទ័រ ទៅភ្ជួរដីស្រែ ខាងក្រោយផ្ទះស្រាប់តែជាន់គ្រាប់មីនតោន ដែលសេសសល់ពីសង្គ្រាម បណ្តាលឲ្យផ្ទុះឡើង ចំណែកតែកុងត្រាក់ទ័រ បានផ្លោងទៅលើ រួចធ្លាក់មកដីវិញ សន្លប់រងរបួសស្រាល សំណាងល្អមិនស្លាប់បាត់បង់ជីវិត នាំយកមកធ្វើការសង្គ្រោះនៅមន្ទីរពេទ្យបង្អែកស្រុកអន្លង់វែង បានដឹងខ្លួនក៍វឹលត្រឡប់ទៅលំនៅឋានវិញ រីឯត្រាក់ទ័រខូចខាត់មួយកំណាត់មុខ ៕
ចែករំលែកព័តមាននេះ