ខេត្តកំពង់ឆ្នាំង ៖ កម្មករធ្វើស្លាកផ្សាយពាណិជ្ជកម្មម្នាក់បានរងរបួសយ៉ាងធ្ងន់ធ្ងរ ដោយសារឆក់ចរន្តអគ្គិសនីដែលមានកម្លាំងម៉ឺនវ៉ុល ខណៈកំពុងធ្វើការផ្លាស់ប្តូរស្លាកផ្សាយពាណិជ្ជកម្មមួយកន្លែងកាត់ពីលើថ្នល់ជាតិលេខ៥ ដែលហេតុការណ៍នេះកើតឡើងកាលពីម៉ោង
ខេត្តកំពង់ឆ្នាំង ៖ កម្មករធ្វើស្លាកផ្សាយពាណិជ្ជកម្មម្នាក់បានរងរបួសយ៉ាងធ្ងន់ធ្ងរ ដោយសារឆក់ចរន្តអគ្គិសនីដែលមានកម្លាំងម៉ឺនវ៉ុល ខណៈកំពុងធ្វើការផ្លាស់ប្តូរស្លាកផ្សាយពាណិជ្ជកម្មមួយកន្លែងកាត់ពីលើថ្នល់ជាតិលេខ៥ ដែលហេតុការណ៍នេះកើតឡើងកាលពីម៉ោង ៧ និង៥០នាទីព្រឹកថ្ងៃទី៣១ មីនា ២០១៥ នេះ ស្ថិតនៅមុខអតីតសង្កាត់លេខ២ ក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ។
ប្រភពបានឱ្យដឹងថា ជនរងគ្រោះបានធ្លាក់គងជាប់ជាមួយចម្រឹងដែកសម្រាប់ដាក់ស្លាកផ្សាយពាណិជ្ជកម្មអស់រយៈពេលជាង១ម៉ោងទើបអាចជួយសង្គ្រោះបាន ដោយយករថយន្តស្ទូចទៅជួយស្ទូចយកចេញ ។ ជាមួយគ្នានេះផងដែរ ចរន្តអគ្គិសនីត្រូវបានកាត់ផ្តាច់ មួយក្រុងកំពង់ឆ្នាំងតែម្តង ។
បើតាមការរៀបរាប់របស់ឈ្មោះអុល សំអឿន អាយុ៣៤ឆ្នាំ ជាមេការបានប្រាប់ឱ្យដឹងថា ជនរងគ្រោះឈ្មោះម៉ម ចេតនា អាយុ៣០ឆ្នាំមានទីលំនៅខេត្តព្រៃវែង និងបានមកស្នាក់នៅ និងធ្វើការជាមួយគាត់នៅឯរាជធានីភ្នំពេញដែរ ។ ហើយនៅមុនពេលកើតហេតុ រូបគាត់ និងកម្មករទាំងអស់មានគ្នា៣នាក់នាំគ្នាមកដាក់ស្លាកផ្សាយពាណិជ្ជកម្មឱ្យក្រុមហ៊ុនទូរសព្ទ័មួយកន្លែង ខណៈពេលកំពុងធ្វើការទាំង៣នាក់ ជនរងគ្រោះដែលនៅកៀនគេជិតបង្គោលខ្សែភ្លើង បានលើកដែកតូចមួយប៉ុនម្រាមដៃទៅគងប៉ះខ្សែភ្លើងស្រាត ដែលមានកម្លាំងខ្លាំង បណ្តាលឱ្យផ្ទុះជាអណ្តាតភ្លើងឆក់ជនរងគ្រោះធ្លាក់ដែកនោះពីដៃ សំណាងល្អជនរងគ្រោះមិនបានធ្លាក់មកដី តែបានទើរជាប់នឹងចម្រឹងបង្គោលស្លាកពាណិជ្ជកម្ម ។
ភ្លាមនោះ គាត់បានស្រែកឱ្យគេជួយ ហើយក៏ឃើញមានមន្ត្រីនគរបាលបានទូរសព្ទ័ទៅក្រុមហ៊ុនអគ្គិសនីឱ្យផ្តាច់ចរន្តភ្លើង ទើបគាត់ដែលនៅលើបង្គោលដែលជិតជនរងគ្រោះដែរនោះ បានចូលមកជួយ និងក្រោយមកបានហៅរថយន្តស្ទូចរបស់អគ្គិសនីជួយស្ទូចជនរងគ្រោះមកដាក់នៅដី និងដឹកទៅសង្គ្រោះនៅមន្ទីរពេទ្យជាបន្ទាន់ ។
បុរសជាមេការរូបនោះបន្តថា ពេលគងដែកនឹងខ្សែភ្លើងបណ្តាលឱ្យផ្ទុះឆក់នោះ បើកុំតែជនរងគ្រោះធ្លាក់ចុះរបូតដែកពីដៃ ម្ល៉េះឆក់ស្លាប់ និងអាចបន្តឆក់ដល់ពួកគាត់២នាក់ទៀតជាពុំខាន ។ នៅក្នុងមន្ទីរពេទ្យ គេឃើញជនរងគ្រោះរលាកពេញខ្លួន មានបែកក្បាល និងមានចេញឈាមហូរតាមភ្នែកផងដែរ ដែលអាចពិការដែលពេលនេះកំពុងស្ថិតក្នុងការសង្គ្រោះរបស់ក្រុមគ្រូពេទ្យ ។
មេការក្រុមហ៊ុនអគ្គិសនីម្នាក់បាននិយាយថា ចរន្តអគ្គិសនីខ្សែស្រាតមានកម្លាំងភ្លើង២២០០០វ៉ុល ពេលចូលក្នុងត្រង់ហ្វូ ទើបបានកាត់បន្ថយ១០០ដង ស្មើនឹង២២០វ៉ុល សម្រាប់ចែកចាយអោយប្រើប្រាស់ ។ ចំណែកជនរងគ្រោះបានរួចផុតពីការឆក់ដល់ស្លាប់ គឺដោយសារតែក្រុមហ៊ុនបានបំពាក់ប្រព័ន្ធផ្តាច់ភ្លើងអគ្គិសនីស្វ័យប្រវត្តិ ទើបពេលជនរងគ្រោះគងដែកលើខ្សែភ្លើងដែលស្រាតនោះ
បណ្តាលឱ្យផ្ទុះឆក់ គឺចរន្តអគ្គិសនីបានផ្តាច់ដោយស្វ័យប្រវត្តតែម្តង សូម្បីតែមានគងមែកឈើក៏វាលោតដែរ ហើយបើគ្មានបែបនេះទេម្លេះនឹងឆក់ស្លាប់ទាំង៣នាក់នេះជាពុំខាន ៕
ចែករំលែកព័តមាននេះ