ខេត្តបន្ទាយមានជ័យ ៖ ជារៀងរាល់ថ្ងៃនគរបាលស្រុកព្រះនេត្រព្រះតែងតែធ្វើសកម្មភាពដឹកដៃសិស្សានុសិស្សដែលធ្វើដំណើរមកសាលារៀន និងចេញពីសាលារៀនត្រឡប់ទៅផ្ទះ ដើម្បីសុវត្ថិភាពពួកគេ។
ខេត្តបន្ទាយមានជ័យ ៖ ជារៀងរាល់ថ្ងៃនគរបាលស្រុកព្រះនេត្រព្រះតែងតែធ្វើសកម្មភាពដឹកដៃសិស្សានុសិស្សដែលធ្វើដំណើរមកសាលារៀន និងចេញពីសាលារៀនត្រឡប់ទៅផ្ទះ ដើម្បីសុវត្ថិភាពពួកគេ។ នេះបើតាមការឲ្យដឹងពីលោកវរសេនីយ៍ត្រីមាស ប្ញទ្ធី អធិការនគរបាលស្រុកព្រះនេត្រព្រះ នៅព្រឹកថ្ងៃទី២៥ មីនា ២០១៥នេះ ។
លោកវរសេនីយ៍ត្រីមាស ប្ញទ្ធី ក៏បានឲ្យដឹងទៀតថា ដោយពិនិត្យឃើញថា នៅក្នុងភូមិសាស្ត្រស្រុកព្រះនេត្រព្រះជាញឹកញាប់មានគ្រោះថ្នាក់ចរាចរណ៍ លោកឧត្តមសេនីយ៍ត្រីអាត់ ខែម ស្នងការនគរបាលខេត្តបានដាក់នូវបទបញ្ជាឲ្យគ្រប់បណ្តាស្រុក/ក្រុង យកចិត្តទុកដាក់ទៅលើសិស្សសាលាទាំងទៅទាំងត្រឡប់មកផ្ទះវិញត្រូវធ្វើចរាចរណ៍កាក់រថយន្ត ម៉ូតូឲ្យឈប់ និងនាំសិស្សដើរឆ្លងផ្លូវ ដើម្បីការពារសុវត្ថិភាពចរាចរណ៍ដល់ពួកគេ ។
លោកអធិការបានបញ្ជាក់ថា ទទួលបាននូវបទបញ្ជានេះ លោកបានណែនាំដល់នគរបាលជំនាញចរាចរណ៍ស្រុកជារៀងរាល់ថ្ងៃពេលដែលសិស្សទៅសាលារៀនត្រូវការឆ្លងផ្លូវ គឺត្រូវនាំគាត់ដើរឆ្លងផ្លូវ ពេលម៉ោងសិស្សចេញពីសាលារៀននគរបាលមួយចំនួនត្រូវធ្វើចរាចរណ៍ និងមួយចំនួនទៀតដឹកដៃសិស្សណាដែលត្រូវធ្វើដំណើរឆ្លងផ្លូវ។ ទន្ទឹមនោះដែរកម្លាំងជំនាញនគរបាលចរាចរណ៍ក៏បានធ្វើការផ្សព្វផ្សាយពីច្បាប់ចរាចរណ៍ផ្លូវគោកដល់សិស្សានុសិស្សនៃអនុវិទ្យាល័យ ជប់វារី ដើម្បីឲ្យពួកគាត់ចូលរួមគោរពច្បាប់ចរាចរណ៍ និងចូលរួមផ្សព្វផ្សាយពីច្បាប់ចរាចរណ៍នេះដល់សហគមន៍របស់ពួកគេផងដែរ៕
ចែករំលែកព័តមាននេះ