ខេត្តស្ទឹងត្រែង ៖ នារីវ័យក្មេងស្រស់សោភាម្នាក់ត្រូវគេសង្ស័យថាប្រើប្រាស់ថ្នាំញៀនរហូតបាត់បង់ស្មារតីបានស្រែកជេរ និងរើសដុំថ្មគប់កម្ទេចស្លាកយីហោសណ្ឋាគារ ព្រមទាំងហែកស្លាកគណបក្ស
ខេត្តស្ទឹងត្រែង ៖ នារីវ័យក្មេងស្រស់សោភាម្នាក់ត្រូវគេសង្ស័យថាប្រើប្រាស់ថ្នាំញៀនរហូតបាត់បង់ស្មារតីបានស្រែកជេរ និងរើសដុំថ្មគប់កម្ទេចស្លាកយីហោសណ្ឋាគារ ព្រមទាំងហែកស្លាកគណបក្សបង្កឱ្យមានការភ្ញាក់ផ្អើលកាលពីវេលាម៉ោងជាង១២ថ្ងៃត្រង់ ថ្ងៃទី២៣ មីនា ២០១៥ ស្ថិតនៅចំណុចផ្លូវ៦២ ទល់មុខសណ្ឋាគារមេគង្គ ភូមិរាជានុកូល សង្កាត់ស្ទឹងត្រែង។ ក្នុងហេតុការណ៍នោះមិនមាននរណាម្នាក់ហ៊ានចូលចាប់ ឬឃាត់នារីម្នាក់នោះទេ ដោយសារនាងរើសដុំថ្មគប់គ្រប់គ្នាឱ្យតែចូលកៀកសូម្បីតែអ្នកកាសែតក៏រត់គេចពីដុំថ្មរបស់នាងដែរ។
តាមប្រភពព័ត៌មានឲ្យដឹងថា នារីម្នាក់នោះមានស្រុកកំណើតនៅខេត្តកំពង់ស្ពឺ ហើយមកបម្រើការងារជានារីចាក់ស្រាបៀរនៅក្នុងខារ៉ាអូខេពិភពថ្មី តែដោយសារនាងធ្វើការមិនចុះសម្រុងនឹងគេថៅកែក៏បញ្ឈប់ការងារពីទីនោះ ហើយនាងត្រូវបុរសម្នាក់នាំឲ្យទៅស្នាក់នៅក្នុងសណ្ឋាគារមេគង្គនោះអស់រយៈពេលជាច្រើនថ្ងៃ ដោយមិនឲ្យលុយម្ចាស់សណ្ឋាគារទេ ក្រោយមកនៅព្រឹកថ្ងៃទី២៣ មីនា ២០១៥នេះនាងបានទៅដាក់ពាក្យប្តឹងនៅតុលាការ ដោយចោទបុរសម្នាក់ជាមន្ត្រីប៉ូលិសនៅស្នងការដ្ឋាននគរបាលខេត្តថា យកនាងទៅទុកចោលរាប់ថ្ងៃដោយមិនឲ្យលុយកាក់ចាយនោះទេ។
ប្រភពដដែលបានបន្តថា ម្ចាស់សណ្ឋាគារបានសម្រុះសម្រួលឲ្យនាងចេញពីទីនោះដោយរៀបចំសណ្ឋាគារនោះសម្រាប់ទទួលថ្នាក់ដឹកនាំយោធា ព្រោះសណ្ឋាគារមួយនោះជាសណ្ឋាគាររបស់យោធភូមិភាគ១សាងសង់ឡើងសម្រាប់ទទួលថ្នាក់ដឹកនាំចុះមកបំពេញភារកិច្ចធំៗក្នុងខេត្តស្ទឹងត្រែង តែនារីម្នាក់នោះបាននិយាយឆ្លើយតបទៅម្ចាស់សណ្ឋាគារខាងលើវិញថា ទុកឱកាសឲ្យនាងនៅត្រឹមថ្ងៃទី១៨ មីនា នាងនឹងរើចេញ ខណៈដែលគេយកនាងចូលទៅស្នាក់នៅក្នុងសណ្ឋាគារចាប់តាំងពីថ្ងៃទី៣ មីនា ២០១៥។
ប្រភពព័ត៌មានមួយទៀតចេញពីមាត់អ្នកបម្រើការងារជាមួយនាងបាននិយាយថា កាលពីដំបូងនាងមានប្តី និងកូន២នាក់ក្រោយមកបានលែងលះគ្នា ឈានដល់ការខូចចិត្តបែកគំនិតទៅធ្វើការនៅខារ៉ាអួខេ កាឡាក់ស៊ី ខេត្តរតនគិរី បន្ទាប់មកនាងក៏មកធ្វើការនៅខារ៉ាអូខេពិភពថ្មីស្ទឹងត្រែង តែដោយសារនាងតែងតែប្រចណ្ឌ និងវាយនារីដែលអង្គុយជាមួយភ្ញៀវដែលធ្លាប់អង្គុយជាមួយនាងរហូតដល់ថៅកែហៅមកធ្វើការណែនាំមិនស្តាប់ ក៏បញ្ឈប់ការងាររបស់នាង ។
បន្ទាប់មកមានបុរសម្នាក់យកនាងទៅចូលស្នាក់នៅសណ្ឋាគារខាងលើអស់ជាច្រើនថ្ងៃមិនមានលុយបង់ថ្លៃស្នាក់នៅស្របពេលដែលសណ្ឋាគារខាងលើនេះត្រៀមរៀបចំទទួលការស្នាក់នៅរបស់ថ្នាក់ដឹកនាំយោធាជាន់ខ្ពស់នោះ ទើបម្ចាស់សណ្ឋាគារសុំឲ្យរើចេញ តែនាងមិនព្រមចេញដោយតបទៅវិញថា ទុកពេលឲ្យនាងបន្តិចទៀត ព្រោះនាងត្រូវប្តឹងបុរសម្នាក់យកនាងមកប្លុងចោលបែបនេះ ។ រហូតដល់ព្រឹកថ្ងៃទី២៣ មីនា២០១៥នេះ នាងបានទៅដាក់ពាក្យប្តឹងនៅតុលាការ ជាឱកាសដែលម្ចាស់សណ្ឋាគារខាងលើប្រាប់ឲ្យអ្នករៀបចំបន្ទប់រើកាបូបសម្លៀកបំពាក់ចេញមកទុកនៅខាងក្រៅរបងក្រោយមកនាងត្រឡប់មកពីតុលាការវិញឃើញបែបនេះក៏ផ្ទុះជាកំហឹងរើសដុំថ្មគប់កម្ទេចស្លាកយីហោសណ្ឋាគារ និងបំផ្លិចបំផ្លាញស្លាកគណបក្សអស់ចំនួនពីរផ្ទាំងធំៗទៀត ។
មួយសន្ទុះមកក៏ត្រូវកម្លាំងនគរបាលក្រុងស្ទឹងត្រែងចាប់ចញ្ចូលរថយន្តយកទៅអធិការក្រុងដើម្បីដោះស្រាយ និងស្វែងរកឪពុកម្តាយឲ្យទទួលយកទៅអប់រំឡើងវិញ។ តែទោះបីបែបណានារីម្នាក់ខាងលើនេះត្រូវគេសង្ស័យថា នឹងអាចពាក់ព័ន្ធធ្លាប់សេពគ្រឿងញៀនរហូតអាចលើសកំណត់ធ្វើឲ្យនាងនៅសុខៗស្រែកជេរគេឯង ពេលលខ្លះអង្គុយសើចក្តែងតែម្នាក់ឯង និងនិយាយមិនដឹងខុសត្រូវថែមទៀត។ ប្រភពព័ត៌មានមួយផ្សេងទៀតបានបង្ហើបថា នាងត្រូវអំពើរបស់គេ បូករួមនឹងធ្លាប់ប្រើប្រាស់ថ្នាំញៀនទើបធ្វើឲ្យនាងកើតទៅជារឿងបែបនេះ។
មន្ត្រីនគរបាលបានប្រាប់ថា នារីខាងលើនេះមានឈ្មោះ សម ភ័ក្ក្រកញ្ញា អាយុ២៧ឆ្នាំ មានស្រុកកំណើតនៅខេត្តកំពង់ស្ពឺ កម្រិតវប្បធម៌ប្រឡងជាប់សញ្ញាបត្រមធ្យមសិក្សាទុតិយភូមិ នៅមណ្ឌលអនុវិទ្យាល័យទីរួមខេត្តកំពង់ស្ពឺ បច្ចុប្បន្នស្នាក់នៅបណ្តោះអាសន្ន និងបម្រើការងារនៅហាងខារ៉ាអូខេ ពិភពថ្មី ។
មន្ត្រីនគរបាលបានបន្តថា ក្រោយហេតុការណ៍នេះជំនាញបានស្រាវជ្រាវទំនាក់ទំនងទៅឪពុកម្តាយរបស់នាងតាមរយៈទូរស័ព្ទ ហើយឪពុកម្តាយរបស់នាងបានប្រាប់មកវិញថា កូនរបស់គាត់មានជំងឺសរសៃប្រសាទនិងសុំឲ្យជួយមើលថែផងមុនពេលពួកគាត់ទៅទទួលយកត្រឡប់មកផ្ទះវិញនោះ៕
ចែករំលែកព័តមាននេះ