រាជធានីភ្នំពេញ ៖ ប្រជាពលរដ្ឋនៅសង្កាត់គីឡូម៉ែត្រលេខ៦នៅវេលាម៉ោង១០ និង៣០នាទីព្រឹក ថ្ងៃទី ២៩ មករា នេះ បាននាំគ្នារៀបចំធ្វើពិធីបន់ស្រន់បួងសួងសុំសេចក្តីសុខនៅចំណុចផ្លូវភ្លោះភូមិក្រោលគោ សង្កាត់គីឡូម៉ែត្រលេខ៦ ខណ្ឌប្ញស្សីកែវ បន្ទាប់ពីមានស្ត្រីម្នាក់ជួបគ្រោះថ្នាក់ចរាចរណ៍ស្លាប់កាលពីយប់ថ្ងៃទី២៨ មករា ម្សិលមិញ។
ពិធីបន់ស្រន់បួងសួងសុំសេចក្តីសុខនេះរៀបចំឡើងក្រោមការដឹកនាំពីលោកយាយខន ដែលជាម្ចាស់ស្រុកនៅចំណុចខាងលើ ដោយក្នុងពិធីនោះមានលេងភ្លេង និងមានអ្នកស្នងរូបលោកតាឌីផងដែរ។
តាមការឱ្យដឹងពីស្ត្រីឈ្មោះយ៉ុង រិន អាយុ៥២ឆ្នាំ បានឱ្យដឹងថា ពិធីនេះត្រូវបានរៀបចំឡើងដើម្បីបួងសួង បន់ស្រន់នៅចំពោះអាស្រមអ្នកតាបាក់ ដែលជាម្ចាស់ទឹក ម្ចាស់ដីដើម្បីជួយបញ្ចៀសគ្រោះថ្នាក់ដែលកើតឡើងជាយថាហេតុនៅតាមផ្លូវខាងលើនេះ ។
ស្ត្រីខាងលើបន្តថា ពិធីនេះតែងតែធ្វើឡើងជារៀងរាល់ឆ្នាំ ប៉ុន្តែពេលនេះគេរៀបចំធ្វើដោយសារមានស្ត្រីម្នាក់ស្លាប់ដោយគ្រោះថ្នាក់ចរាចរណ៍។ ចំណែកលោកស្រី ពៅក្រពុំ អាយុ៤៩ឆ្នាំ ជាអ្នកស្នងរូបមេទ័ពលោកតាឌីបានឱ្យដឹងថា គាត់បានប្រមើលមើលឃើញថា នឹងមានគេមកយកក្មេងប្រុសម្នាក់ទៀតនៅចំណុចខាងលើ ទើបលោកស្រីធ្វើពិធីបួងសួងដើម្បីបញ្ចៀសគ្រោះថ្នាក់ផ្សេងៗដែលអាចកើតឡើងជាយថាហេតុ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ