រាជធានីភ្នំពេញ ៖ប្រភពពីប៉ូលិសព្រហ្មទណ្ឌក្រសួងមហាផ្ទៃកម្ពុជាបានបង្ហើបឲ្យដឹងថា កាលពីយប់ថ្ងៃទី២៤ ធ្នូ ២០១៤ ប៉ូលិសអំាងទ័រប៉ូលថៃ បានជូនដំណឹងនិងផ្ញើរូបថតមកនាយកដ្ឋានកណ្តាលនគរបាលយុត្តិធ៌មក្រសួងមហាផ្ទៃថា លោកស្រី ឡាយ ហួង អតីតភរិយាលោកឧកញ៉ា ខូវ ផល្លាបុត្រ បានត្រូវអាជ្ញាធរថៃចាប់ខ្លួនបានជាផ្លូវការហើយ ។
គួរបញ្ជាក់ថា សំណុំរឿងអ្នកស្រី សេង ចិន្តា ពាក់ព័ន្ឋពីបទប៉ុនប៉ងមនុស្សឃាតតំាងពីអំឡុងឆ្នាំ២០១០ ទៅលើភរិយាលោកទេសរដ្ឋមន្រ្តី ស៊ុន ចាន់ថុល ដែលបច្ចុប្បន្នជារដ្ឋមន្រ្តីក្រសួងពាណិជ្ជកម្ម ។ សំណុំរឿងនោះមានមនុស្ស០៥នាក់ពាក់ព័ន្ឋ គឺអ្នកបម្រើផ្ទះលោក ស៊ុន ចាន់ថុល ចំនួន២នាក់ អ្នកយាមផ្ទះ២នាក់ (បុរស) ប៉ុន្តែមានម្នាក់បានរត់គេចខ្លួន ។ ឯអ្នកស្រី សេង ចិន្តា ជាប់ចោទជាអ្នករៀបចំគម្រោងសម្លាប់ប្រពន្ឋនិងកូនលោក ស៊ុន ចាន់ថុល ។ ជនពាក់ព័ន្ឋក្នុងសំណុំរឿងនេះ ត្រូវបាននាយកដ្ឋានកណ្តាលនគរបាលយុត្តិធ៌មក្រសួងមហាផ្ទៃឃាត់ខ្លួនបាន៤នាក់ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញ និងក្រោយមកត្រូវបានតុលាការគ្រប់លំដាប់ថ្នាក់តំាងពីក្រោមរហូតដល់កំពូល នៅតែចោទប្រកាន់ក្រុមអ្នកស្រី សេង ចិន្តា ពីបទប៉ុនប៉ងមនុស្សឃាត និងបានបញ្ចប់ត្រឹមសាលដីកាតុលាការកំពូលនោះ ។
ជាមួយគ្នានេះដែរ នៅតុលាការថ្នាក់ក្រោម មិនបានលេចឮព័ត៌មានថា ពាក់ព័ន្ឋនឹងអ្នកស្រី ឡាយ ហួងនោះទេ ប៉ុន្តែនៅតុលាការកំពូល ពេលប្រកាសសាលដីកាផ្តន្ទាទោសជនជាប់ចោទ៣ទៅ៤នាក់ហើយ ក៍ស្រាប់តែមានសាលដីកាឲ្យចាប់ខ្លួនអ្នកស្រី ឡាយ ហួង ម្នាក់ទៀត ក្រោយពីមានដីកាឲ្យចាប់ខ្លួន អ្នកស្រី ឡាយ ហួង ដឹងខ្លួនក៍ចាកចេញពីប្រទេសកម្ពុជាទំាងយប់នៅឆ្នាំ២០១២ គេចខ្លួនរហូតមកដល់សមត្ថកិច្ចថៃចាប់ខ្លួននៅពេលនេះ ។
សេចក្តីរាយការណ៍ចុងក្រោយ នៅពេលនេះប៉ូលិសនាយកដ្ឋានផ្ទៃក្នុងក្រសួងមហាផ្ទៃ នឹងចេញទៅទទួលយក អ្នកស្រី ឡាយ ហួង ពីអាជ្ញាធរថៃហើយ ៕
ចែករំលែកព័តមាននេះ